តារា​សម្ដែង និង​​​ផលិតករ Vin Diesel បាន​ប្រកាស​ជា​ផ្លូវការ​​នៅ​សណ្ឋាគារ Caesar’s Palace ក្នុង​ទីក្រុង Las Vegas ថា លោក​នឹង​ថត​ រឿង​ "Furious 8” បន្ត​ទៀត​ ហើយ​រឿង​នេះ នឹង​​​អាច​ចាក់​បញ្ចាំង ​នៅ​ថ្ងៃ​ទី​១៤ ខែ​មេសា ឆ្នាំ​២០១៧។ តារា​រូប​នេះ​បន្ថែម​ថា "វា​នឹង​ជា​រឿង​​​ល្អ​បំផុត ដែល​ទស្សនិកជន ​មិន​ធ្លាប់​ទស្សនា" ។

ចំពោះ​​អ្នកដឹកនាំ​រឿង សម្រាប់​ភាពយន្ត​​វគ្គ​​ទី៨​នេះ មិន​ទាន់​ប្រកាស​ជា​ផ្លូវការ​ថា ជាអ្នកណា​នៅ​ឡើយ​ទេ ប៉ុន្តែ​មាន​ពាក្យ​ចចាមអារ៉ាម​ថា ភាពយន្ត​ប្រណាំង​ឡាន​នេះ នឹង​ថត​នៅ​ទីក្រុង​ញីវយ៉ក ហើយ​យក​តួសម្ដែង​ចាស់ៗ​មក​វិញ រួម​ទាំង​តារា​ចំណូល​ថ្មី Kurt Russell ជា​តួអង្គ​ម្នាក់​បាន​សម្ដែង​ក្នុង​រឿង "Furious 7”។ ​

"Furious 8” នឹង​ចេញ​បញ្ចាំង ប្រជែង​ជាមួយ​រឿង "Ghost in the Shell” របស់​តារា​សម្ដែង​ Scarlett Johansson និង​​ក្រោយ​​រឿង “Pacific Rim 2” របស់​លោក Guillermo del Toro ​មួយ​សប្តាហ៍។

ការប្រកាស​របស់ Vin Diesel ធ្វើ​ឡើង​ក្រោយ​ភាពយន្ត "Furious 7” ទទួល​បាន​ការ​គាំទ្រ​ច្រើន។ កាល​ពី​ពេល​ថ្មីៗ​កន្លង​មក រឿង​នេះ​រក​ចំណូល​ទូទាំង​ពិភពលោក​​ ឬ Worldwide Box Office បាន ១,១៥ពាន់​លាន​ដុល្លារ  ហើយ​រក​បាន​ ២៥០​លាន​ដុល្លារ​អាមេរិក ក្នុង​ប្រទេស​ចិន ច្រើន​ជាងគេ​បំផុត បើ​ធៀប​នឹង​ភាពយន្ត​ផ្សេងៗ​ទៀត។ យ៉ាងណា​ ការថត​ចាប់​ផ្ដើម​ពេល​ណា​នោះ ប្រភព​មិន​បាន​បញ្ជាក់​ទេ។

តើ​អ្នក​ចាប់​អារម្មណ៍​​វគ្គ​ទី​ ៨ ​របស់​ភាពយន្ត​ជា​ស៊េរី "Fast and Furious” ​នេះ​ឬ​អត់? តើ​អ្នក​យល់​ថា ​រឿង​ស៊េរីក្រោយ​នេះ អាច​​រក​ចំណូល​បាន​ច្រើន ​ទៀត​ដែរ​ឬ​ទេ?

ដឹង​ថា “Furious 7” នៅ​ចិន រក​ចំណូល​បាន​ប៉ុន្មានអត់​?

‘Furious 7′ រក​​លុយ​​បាន​​១​​ពាន់​​លាន​​​ដុល្លារ​ត្រឹម​១៧​ថ្ងៃ

ប្រែ​សម្រួល៖ អ៊ុំ សុភក្តិ ប្រភព៖ slashfilm , ryanseacrest