ប្អូនស្រី សាន់ ឆាយ ជិះកង់ដួល ឈាមហូរស្រោចមុខ

2015-04-25 18:23:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ជិះកង់ជាមួយប្ដី និងមិត្តភ័ក្ដិឡើងចំណោទ តារាសម្ដែង Dee Hsu ដែលជាប្អូនស្រីបង្កើតរបស់ Barbie Hsu ឬអ្នកស្គាល់ថា សាន់ ឆាយ ក្នុងរឿង "F4" នោះ បានបាត់បង់ការគ្រប់គ្រង ហើយក៏បណ្ដាលឱ្យដួលលើថ្នល់ ឈាមហូរស្រោចមុខ។

តារាវ័យ៣៦ឆ្នាំ បានសរសេរលើហ្វេសប៊ុកថា "ដងខ្លួនទាំងមូល និងមុខរបស់ខ្ញុំ ដួលអូសដី។ ពួកយើងភ្លាមៗនោះ បាន Call ទៅឡានពេទ្យ ខ្ញុំភ័យនិងឈឺខ្លាំងណាស់។ អរគុណបងស្រី ដែលជួយមើលការខុសត្រូវការងារខ្ញុំ ហើយអរគុណប្ដីសំឡាញ់ ដែលមើលថែអូន និងអរគុណដល់ក្រុមគ្រូពេទ្យផងដែរ"។

ចំណែក Mike Hsu ដែលជាប្ដីនិយាយថា "ខ្ញុំពិបាកចិត្តណាស់។ មុខ និងដៃរបស់គាត់ សុទ្ធតែរបួស។ គាត់ត្រូវការពេលសម្រាក យ៉ាងហោចណាស់មួយខែ។ សូមពាក់មួកការពារ ពេលជិះកង់ តែកុំជិះលឿនពេក"។

Dee សម្រាកពេទ្យបានមួយយប់ ហើយនាងបានត្រឡប់ទៅផ្ទះវិញហើយ ក្រោយរបួសធូរស្រាល ។ ចំពោះរូបភាពគ្រោះថ្នាក់នេះ ត្រូវបានគេសង្ស័យថា នាងរងនូវអំពើហិង្សា តែត្រូវតារាស្រីរូបនេះច្រានចោល "វាមិនមែនជាអំពើហិង្សាក្នុងគ្រួសារទេ"។

ក្រោយជួបគ្រោះថ្នាក់នេះ ការងារពិធីការិនីក្នុងកម្មវិធីទូរទស្សន៍ Kangxi Lai Le ត្រូវបាន សាន់ ឆាយ ជាបងស្រីជាអ្នកជំនួស។ គួរបញ្ជាក់ដែរថា បញ្ហាដួលកង់របស់ Dee គឺបានកើតឡើង កាលពីថ្ងៃទី ២៣ ខែមេសា ឆ្នាំ២០១៥មកម្ល៉េះ៕