ក្រូចថាមិនសូវជោគជ័យ តែមេសាន់ដេថា ទទួលការពេញនិយមខ្លាំង

2015-04-28 16:04:42
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយ ក្រូច បានបញ្ជាក់ថា ចម្រៀងរបស់នាយក្នុងផលិតកម្មសាន់ដេហាក់មិនសូវល្បីដូចការរំពឹងទុក ព្រោះតែមានការប្រកួតប្រជែងពីអ្នករួមអាជីពច្រើនពេក។

“ធ្វើម៉េច? បើអ្នកកំប្លែងទាំងចាស់ ទាំងក្មេងសុទ្ធសឹងតែចេញបទចម្រៀងអស់ហើយ ដល់អញ្ចឹងទៅមិនដឹងស្ដាប់ខាងណា ចោលខាងណាទេ!”។ តារាកំប្លែងរូបនេះបញ្ជាក់មកកាន់Sabay។ នាយបន្តថា អារម្មណ៍របស់នាយបែបនេះ ចំពោះបទចម្រៀងរបស់ខ្លួនប៉ុណ្ណោះ មិនបានសំដៅលើបទចម្រៀងផ្សេងទៀតនៅក្នុងផលិតកម្មនោះទេ។ ព្រោះបទចម្រៀងមួយចំនួនមានមហាជនជាច្រើនគាំទ្រ ធ្វើអាល់ប៊ុមចូលឆ្នាំរបស់ផលិតកម្មខាងលើលក់ដាច់មិនស្ទើរឡើយ។

តារាកំប្លែងមានប្រភពមកខេត្តកំពង់ស្ពឺខាងលើឱ្យដឹងទៀតថា គ្រប់យ៉ាងគ្រាន់តែជាការសន្និដ្ឋានផ្ទាល់ខ្លួនប៉ុណ្ណោះ មិនដែលទទួលមតិយោបល់យ៉ាងណាពីមហាជននោះទេ។ នាយបន្តថា៖" វាគ្រាន់តែស្ដាប់ទៅដូចជា វ៉ល់ៗម៉េចមិនដឹងទេ នេះបើតាមការគិតទេណាស៎!”។ ម្ចាស់វង់តន្ត្រីសម័យដដែលអះអាងថា ចម្រៀងហាក់ដូចជាពិបាកស្វែងរកភាពល្បីល្បាញជាងកំប្លែងទៅទៀត។

ប៉ុន្តែប្រភពដដែលឱ្យដឹងទៀតថា មិនទាន់អស់សង្ឃឹមនោះទេ ត្រូវរង់ចាំមើលលទ្ធផលបទចម្រៀងបន្តបន្ទាប់ទៀតសិន។ បើតាមព័ត៌មានទទួលបាន ផលិតកម្មសាន់ដេ នឹងរៀបចំចម្រៀង១អាល់ប៊ុមទៀតសម្រាប់នាយ ដើម្បីបំបែកទីផ្សារ។ ក្នុងនោះតារាកំប្លែងប្រចាំCTNរូបនេះក៏មានចង្វាក់ប្រពៃណីបែបកំប្លែងផងដែរ។

ពាក់ព័ន្ធទៅនឹងបញ្ហានេះ លោក ឡាយ សុខចំរើន អ្នកចាត់ការទូទៅវ័យក្មេងក្នុងផលិតកម្មអះអាងផ្ទុយពីសាមីខ្លួនថា បទចម្រៀងរបស់នាយ ក្រូច បានទទួលការពេញនិយមខ្លាំងទៅវិញ។ តួលេខនេះផលិតកម្មបានទទួលពីប្រធានគ្រប់គ្រងទីផ្សារ។ អ្នកចាត់ការទូទៅរូបនេះ បានបញ្ជាក់ថា ផលិតកម្មមិនដែលមានតារាកំប្លែងមកច្រៀងពីមុនមកទេ ដែលកត្តានេះជំរុញឱ្យអ្នកស្ដាប់ចង់ដឹងយ៉ាងខ្លាំង ធ្វើឱ្យបទចម្រៀងលក់ដាច់ច្រើន។

លោកអះអាងថា សាន់ដេកំពុងរៀបចំចម្រៀងទាក់ទងទៅនឹងរដូវភ្លៀង១អាល់ប៊ុមទៀត សម្រាប់ក្រុមនាយ ក្រូច ហើយតម្រូវចិត្តកសិករ ដែលជាបទភ្លេងថ្មីសុទ្ធសាធ៕

អានអត្ថបទ៖ ហៃ ដារ៉ូ ភ្ជាប់ពាក្យជាមួយគូដណ្ដឹងដែលមានប្រវត្តិកម្សត់កម្រ

អានអត្ថបទ៖ មួយបទរបស់ ខេម ធ្វើឲ្យតារា ៥ រូប ស្ម័គ្រចិត្តកោរសក់