ការពិត!...តួឯកស្រីរឿង "៣កន្លះ" ជាតំណាងរាស្ត្រនៅសិង្ហបុរី

2015-04-28 20:33:44
ចំនួនមតិ 0 | ចំនួនចែករំលែក 0

ចន្លោះមិនឃើញ

តួឯកស្រីក្នុងរឿង "៣កន្លះ" ជាបុគ្គលនយោបាយសំខាន់មួយរូបក្នុងប្រទេសសិង្ហបុរី ដែលជាតំណាងរាស្ត្រជាប់ឆ្នោតទៀតផង និង កំពុងបំពេញការងារបម្រើប្រជាពលរដ្ឋនៅទីនោះ។ នេះបើតាម លោក ឆាយ បូរ៉ា ផលិតករភាពយន្តខាងលើ ប្រាប់ឲ្យដឹង។

លោកបន្ដថា អ្នកនាង Uenice Olsen Willson ជាស្ត្រីម្នាក់ ដែលបានចូលរួមក្នុងសកម្មភាពសង្គមច្រើន មុនពេលប្រឡូកក្នុងឆាកនយោបាយ និង ក្លាយខ្លួនជាតំណាងរាស្ត្រតាមរយៈការបោះឆ្នោត ដោយធ្លាប់បានថតរឿងបែបអប់រំមួយចំនួនផងដែរ ហើយទទួលបានការគាំទ្រពេញផ្ទៃប្រទេស។

“ខ្ញុំយល់ថា គាត់ជាមនុស្សមានទេពកោសល្យម្នាក់ ក្នុងការសម្ដែងភាពយន្ត និង មានឆន្ទៈលើកស្ទួយស្ត្រី"។ ប្រជាពលរដ្ឋនៅទីនោះ មានការគាំទ្រចំពោះការសម្ដែងរបស់នាង ដោយមិនបានប្រកាន់លើនិន្នាការនយោបាយនោះទេ ប៉ុន្តែ ផ្ដល់តម្លៃលើទេពកោសល្យ ជាហេតុធ្វើឲ្យរឿង "៣កន្លះ" មានការគាំទ្រនៅទីនោះ។

ទោះបីជាមានការមមាញឹក ក្នុងការងាររដ្ឋយ៉ាងណាក្ដី តែស្ត្រីរូបនេះក៏បានចំណាយពេល ដើម្បីសម្ដែងភាពយន្ត ហើយនេះ ក៏ជាផ្នែកមួយនៃការស្វែងរកការគាំទ្រពីស្ត្រីផងដែរ។ ក្រៅពីនេះ តំណែងតួឯក អតីតបវរកញ្ញាប្រចាំប្រទេសខាងលើ ក៏ធ្លាប់បានចូលរួមក្នុងសកម្មភាពមនុស្សធម៌ច្រើននៅកម្ពុជា។

លោកបន្តថា រឿង "៣.៥០" មានការគាំទ្រនៅប្រទេសសិង្ហបុរី សូម្បីតារាសម្ដែងហូលីវូដល្បីល្បាញនាង Angelina Jolie ក៏បានចូលរួមទស្សនារឿងនេះ នៅក្នុងកម្មវិធីប្រឆាំងការជួញដូរមនុស្សមួយរបស់ពិភពលោកនាទីក្រុងឡុងដ៍កាលឆ្នាំទៅ ព្រោះនាងក៏ជាមនុស្សម្នាក់ដែលខ្វល់ខ្វាយលើបញ្ហាស្ត្រីដូចគ្នាដែរ។

លោកបានបន្តថា រឿង"៣កន្លះ" មានការអប់រំជារួមពាក់ព័ន្ធទៅនឹងការជួញដូរមនុស្ស មិនបានសំដៅលើកម្ពុជានោះទេ គ្រាន់តែថតនៅក្នុងប្រទេសកម្ពុជាប៉ុណ្ណោះ។ តាមរយៈទូរទស្សន៍ CNN កន្លងទៅនេះ រដ្ឋមន្ត្រីការបរទេសសហរដ្ឋអាមេរិក មិនបានចាត់ទុកប្រទេសកម្ពុជាជាប្រទេសមានការជួញដូរមនុស្សនោះទេ គឺមានតែប្រទេស ៤ប៉ុណ្ណោះ រួមមាន ថៃ ម៉ាឡេស៊ី ហ្ស៊ីមបាវ៉េ និង វេណេហ្ស៊ុយអេឡា។

ទីបំផុតនាយកដ្ឋានភាពយន្តនៃក្រសួងវប្បធម៌របស់ លោក ស៊ិន ច័ន្ទសាយ៉ា ទើបបានផ្ដល់ទិដ្ឋាការអនុញ្ញាតឱ្យចាក់បញ្ចាំងរឿង "៣កន្លះ" នៅប្រទេសកម្ពុជាអំឡុងពាក់កណ្ដាលខែមេសានេះ ក្រោយជាប់គាំងជាង១ឆ្នាំ។ លោក ឆាយ បូរ៉ា បញ្ជាក់មកកាន់ Sabay ថា កំពុងចរចាជាមួយរោងភាពយន្តនានា ដើម្បីរកពេលចាក់បញ្ចាំងជាផ្លូវការភាពយន្តនេះ៕

អានអត្ថបទ៖ រឿង “បីកន្លះ” បើកភ្លើងខៀវពីក្រសួងវប្បធម៌វិញហើយ

អានអត្ថបទ៖ ក្រូចថាមិនសូវជោគជ័យ តែមេសាន់ដេថា ទទួលការពេញនិយមខ្លាំង