ស្ថានីយ​ទូរទស្សន៍ CTN រសៀល​ថ្ងៃ​នេះ​បាន​ធ្វើ​សន្និសីទ​ត្រៀម​ដាក់​បញ្ចាំង​ជូន​នូវ​ខ្សែ​ភាពយន្ត​ខ្នាត​ធំ​មួយ​រឿង​ដែល​ចូល​រួម​សម្ដែង​ដោយ​តារា​ល្បី​ៗ​ខ្មែរ និង​តារា​ល្បី​ៗ​ប្រទេស​ហ្វីលីពីន ដែល​ជា​ការ​ជួប​គ្នា​លើក​ដំបូង។

ភាពយន្ត​នោះ មាន​ចំណង​ជើង​ថា "សង្គ្រាម​បង​ប្អូន" ដែល​តារា​ល្បី​ៗ​ខ្មែរ​យើង​មាន លោក ទេព រិន​ដារ៉ូ ថន ស្រីណៃ និង​លោក ខាត់ វៃ​ហាំង។ ដោយ​ឡែក​តារា​ល្បី​ៗ​របស់​ប្រទេស​ហ្វីលីពីន​វិញ​មាន លោក Mikael Deaz និង​កញ្ញា Andrea Torres។

លោក Bernard Anthony ជា​អ្នក​គ្រប់​គ្រង​ទូទៅ​របស់​ក្រុមហ៊ុន CBS បាន​មាន​ប្រសាសន៍​ថា នេះ​ជា​លើក​ទី​១​ដែល​តារា​ខ្មែរ និង​តារា​ហ្វីលីពីន​បាន​ជួប​សម្ដែង​ក្នុង​ខ្សែ​ភាពយន្ត​ជាមួយ​គ្នា ហើយ​ថា​លោក​មាន​ក្ដី​សោមនស្ស​ណាស់​ដែល​មាន​ចំណែក​ផលិត​ចេញ​នូវ​ខ្សែ​ភាពយន្ត​នេះ​ឡើង ដែល​នេះ គឺ​ជា​បេសកកម្ម​មួយ​របស់ CTN ដែល​តែង​តែ​រិះរក​អ្វី​ដែល​ថ្មី​មក​ផ្ដល់​ជូន​ទស្សនិកជន។

តាម​បេសកកម្ម​ខាង​លើ​នេះ អ្នក​គ្រប់​គ្រង​រូប​នេះ​បន្ត​ថា កន្លង​មក CTN បាន​ផ្ដួច​ផ្ដើម​ឲ្យ​តារា​ខ្មែរ ជួប​សម្ដែង​ជាមួយ​តារា​សិង្ហបុរី និង​ពេល​នេះ ជាមួយ​តារា​ហ្វីលីពីន ហើយ​ថា​អ្វី​ៗ​នឹង​មិន​ចប់​ត្រឹម​នេះ​ទេ ក្នុង​នោះ​លោក​លើក​ឡើង​ថា នឹង​រិះរក​អ្វី​ថ្មី​ៗ​ប្លែក​ៗ​ទៀត​នា​ពេល​ខាង​មុខ​មក​ជូន​ទូរទស្សនិកជន។

ភាពយន្ត "សង្គ្រាម​បង​ប្អូន" កើត​ឡើង​ក្រោម​កិច្ច​សហប្រតិបត្តិ​រួម​គ្នា​រវាង​៣​ភាគី ក្នុង​នោះ​មាន ស្ថានីយ​ទូរទស្សន៍ CTN ស្ថានីយ​ទូរទស្សន៍ GMA របស់​ហ្វីលីពីន និង​ផលិតកម្ម ភូមិ​ពេជ្រ​ភាពយន្ត។ លោក ដើង ពុទ្ធពណ៌ ចាងហ្វាង​ផលិតកម្ម​ភូមិ​ពេជ្រ​ភាពយន្ត បាន​មាន​ប្រសាសន៍​ថា លោក​ក៏​មាន​មោទនភាព​ដូច​គ្នា​ចំពោះ​សមិទ្ធផល "សង្គ្រាម​បង​ប្អូន"។

(រាប់​ពី​ឆ្វេង) ទេព រិនដារ៉ូ Andrea Torres តារា​ហ្វីលីពីន និង​ ខាត់ វៃហាំង ក្នុង​សន្និសីទ​សារព័ត៌មាន​ព្រឹក​មិញ

លោក​បន្ត​ថា​ដោយ​សង្ឃឹម​ថា ខ្សែ​ភាពយន្ត​នេះ នឹង​ទទួល​បាន​ការ​គាំទ្រ​ពី​ទស្សនិកជន នឹង​ជា​ឱកាស​មួយ​ដែល​អាច​នាំ​ឲ្យ​ភាពយន្ត​ខ្មែរ និង​សិល្បករ​ខ្មែរ​មាន​ឱកាស​កាន់​តែ​ច្រើន​ទៅ​កាន់​ទីផ្សារ​អន្តរជាតិ។

"សង្គ្រាម​បង​ប្អូន" បាន​ចំណាយ​ពេល​ផលិត​អស់​ប្រមាណ​កន្លះ​ឆ្នាំ​ទើប​បញ្ចប់​ជា​ស្ថាពរ ក្នុង​នោះ​ទីតាំង​ថត​មាន​ទាំង​នៅ​កម្ពុជា និង​ហ្វីលីពីន។ ប្រសិន​បើ​មិន​មាន​អ្វី​ផ្លាស់​ប្ដូរ​ទេ ខ្សែ​ភាពយន្ត​ទី​១​ដែល​តារា​ខ្មែរ​បាន​ជួប​សម្ដែង​ជាមួយ​តារា​ហ្វីលីពីន​នេះ នឹង​អាច​ដាក់​បញ្ចាំង​ជូន​ទស្សនិកជន​កម្ពុជា​បាន​ទស្សនា​ក្នុង​រង្វង់​សប្ដាហ៍​ទី​២​នៃ​ខែ​សីហា​ខាង​មុខ មុន​បន្ត​ទៅ​បញ្ចាំង​នៅ​ហ្វីលីពីន។

យល់​ស្រប​នឹង​ប្រសាសន៍​លោក ដើង ពុទ្ធពណ៌ ប្រធាន​នាយកដ្ឋាន​ភាពយន្ត ស៊ិន ច័ន្ទសាយ៉ា ថ្លែង​ថា តាម​រយៈ​កិច្ចសហការ​រវាង​ភាគី​ទាំង​៣​នេះ នឹង​ធ្វើ​ឲ្យ​កម្ពុជា ទទួល​បាន​ផល​ចំណេញ​ជា​ច្រើន។ លោក​លើក​ឡើង​ថា ផល​ចំណេញ​ទី​១ បង្កើត​ឱកាស​ការងារ និង​ប្រាក់​កម្រៃ​ដល់​បង​ប្អូន​សិល្បករ​ខ្មែរ​យើង ទី​២​ជួយ​ពួក​គេ​ឲ្យ​ទទួល​បាន​ការ​ដក​ស្រង់​បទ​ពិសោធន៍ និង​ទី​៣​ជួយ​ផ្សព្វផ្សាយ​សិល្បៈ​វប្បធម៌​ខ្មែរ​ទៅ​កាន់​អន្តរជាតិ និង​ផល​ប្រយោជន៍​សំខាន់​មួយ​ទៀត ជួយ​ទាក់​ទាញ​ទេសចរណ៍។

ថន ស្រីណៃតារា​ខ្មែរ និង​តារា​ហ្វីលីពីន Mikael Deaz

“នេះ​ជា​អ្វី​ដែល​រាជរដ្ឋាភិបាល​ចង់​បាន​ជា​យូរ​មក​ហើយ រដ្ឋាភិបាល​តែង​ចង់​បាន​ឱកាស​បែប​នេះ កាន់​តែ​ច្រើន គឺ​កាន់​តែ​ល្អ ដូច​បាន​និយាយ​ពី​ខាង​លើ អីចឹង​ហើយ​តាង​នាម​ក្រសួង​វប្បធម៌ ខ្ញុំ​សូម​គាំទ្រ​អស់​ពី​ចិត្ត និង​សង្ឃឹម​ថា​រឿង​នេះ នឹង​ទទួល​បាន​ជោគជ័យ​ទាំង​ទីផ្សារ​ជាតិ និង​អន្តរជាតិ"។ លោក ស៊ិន ច័ន្ទ​សាយ៉ា បន្ថែម។

វិល​មក​តារា​សម្ដែង​ខ្មែរ​វិញ សិល្បករ​ជើង​ចាស់ ទេព រិនដារ៉ូ ថ្លែង​ថា ថ្វី​ត្បិត​មិន​មែន​ជា​បទ​ពិសោធន៍​ទី​១​សម្រាប់​ការ​សម្ដែង​ជា​តារា​បរទេស ប៉ុន្តែ​លោក​អះអាង​ថា លោក​មាន​ក្ដី​សោមនស្ស​រីករាយ​ណាស់។ លោក បន្ត​ថា ថ្វី​បើ​និយាយ​ភាសា​ខុស​គ្នា​ដែល​ធ្វើ​ឲ្យ​មាន​ការ​លំបាក​តិច​តួច ប៉ុន្តែ​តារា​ខ្មែរ​យើង និង​ហ្វីលីពីន​សហការ​គ្នា​បាន​ល្អ ស្រប​នឹង​អ្នក​ដឹក​នាំ​គ្រប់​ផ្នែក​មាន​បទ​ពិសោធន៍ និង​ជំនាញ​ច្បាស់​ទៀត លោក សង្ឃឹម​ថា "សង្គ្រាម​បង​ប្អូន" នឹង​ទទួល​បាន​ការ​គាំទ្រ​ខ្លាំង​ពី​ទស្សនិកជន៕

អត្ថបទ៖ ទារិកា