សុនខញីមួយក្បាលក្លាយជាអ្នកជួយសង្គ្រោះទារិកាពីសំរាម

2015-05-05 21:58:54
ចំនួនមតិ 0 | ចំនួនចែករំលែក 0

ចន្លោះមិនឃើញ

សុនខញីមួយក្បាលបានក្លាយជាវីរនារីជួយសង្គ្រោះទារិកា ដែលម្ដាយបោះបង់ចោលជិតធុងសំរាមនៅបុរីផ្ទះល្វែងមួយ ក្នុងស្រុក Muang ខេត្ត Chon Buri ប្រទេសថៃ។ នេះបើតាមការបញ្ជាក់របស់សាក្សី និងចុះផ្សាយលើសារព័ត៌មាន Bangkok Post កាលពីព្រឹកមិញ។

សុនខញី Nom Sod

សកម្មភាពសុនខជួយទារិកានេះ បានកើតឡើងនៅមុខផ្ទះមួយល្វែងនៃបុរី Pattana Villa។ លោក Noi Phongsakorn ដែលជាសាក្សីឃើញហេតុការណ៍ផ្ទាល់ភ្នែក បានរៀបរាប់ថា កាលពីយប់ថ្ងៃអាទិត្យ លោកបានឃើញសុនខអនាថាជាច្រើនក្បាលខាំគ្នាដណ្ដើមរបស់អ្វីម្យ៉ាងដូចជាកូនក្រមុំជ័រ នៅជិតធុងសំរាមមុខបុរីនៅតាមផ្លូវទៅផ្សារ។

បុរសចំណាស់វ័យ ៦៣ឆ្នាំបាននិយាយថា “ដំបូងខ្ញុំស្មានតែពួកវាខាំគ្នាដណ្ដើមកូនក្រមុំជ័រ... តែដល់ពេលឮសំឡេងក្មេងយំ ទើបខ្ញុំមានការភ្ញាក់ផ្អើលយ៉ាងខ្លាំង... នោះគឺជាទារិកាម្នាក់”។ លោកបានបន្តទៀតថា ឆ្កែញីអនាថាដែលអ្នកស្រុកហៅឈ្មោះ Nom Sod (មានន័យថាទឹកដោះគោស្រស់) បានព្យាយាមជួយសង្គ្រោះទារិកាពីឆ្កែច្រើនក្បាលទៀតដែលកំពុងខាំជាមួយ។

ឆ្កែញីបានខាំពាំទារិកាកម្សត់ ចេញទៅចម្ងាយប្រហែល ១០ម៉ែត្រ ដើម្បីគេចចេញពីចង្កូមឆ្កែផ្សេងទៀត។ ឃើញដូចនេះ លោក Noi បានផ្ដល់ព័ត៌មានទៅឲ្យមូលនិធិជួយសង្គ្រោះ ដើម្បីជួយទារិកាដែលមានស្នាមចង្កូមជាច្រើនកន្លែង។

មន្ត្រីប៉ូលិសខេត្តឈុនបុរី បាននិយាយថា នៅក្នុងវីដេអូថតជាប់ដោយកាមេរ៉ាសុវត្ថិភាព បង្ហាញពីនារីម្នាក់ដែលអាចជាម្ដាយទារិកា នៅជិតតំបន់ដែលលោក Noi ប្រទះឃើញទារិកាត្រូវឆ្កែញីជួយសង្គ្រោះនោះ។

រឿងរ៉ាវនេះ បានទាក់ទាញចំណាប់អារម្មណ៍អ្នកលេងអ៊ីនធឺណិតជាច្រើនក្នុងប្រទេសថៃ។ ម្នាក់ក្នុងចំណោមនោះ បានសរសេរថា "ពិតជាគួរឲ្យខ្មាសអៀនណាស់ ឪពុកម្ដាយមិនទទួលខុសត្រូវបោះបង់កូនខ្លួនឯងចោល... ឯឆ្កែបែរជាព្យាយាមជួយសង្គ្រោះ"៕

ចុចអាន៖ ឆ្កែស្មោះស្ម័គ្រទទួលទោសជាមួយម្ចាស់ដែលប្រើគ្រឿងញៀន

ប្រែសម្រួល៖ គង់ វិសាល ប្រភព៖ bangkokpost