ចំណុចស្នូល៦យ៉ាងនាំឱ្យយុវជនខ្មែរមានគំនិតចង់បង្កើតរបរផ្ទាល់ខ្លួន

2015-05-07 17:26:23
ចំនួនមតិ 0 | ចំនួនចែករំលែក 0

ចន្លោះមិនឃើញ

គំនិតសហគ្រិនភាព ក្នុងចំណោមយុវជនខ្មែរ នាពេលបច្ចុប្បន្ន កំពុងមានការកើនឡើង ជាពិសេស អំឡុងឆ្នាំ២០១៣ និងដើមឆ្នាំ២០១៤។ យើងអាចកត់សំគាល់ ពីគំនិតច្នៃប្រឌិតទាំងនោះ តាមរយៈការបង្កើត របរលក់បាយ និងការហ្វេចល័ត ការបើកហាងទំនិញ២៥០០រៀល និងហាងលក់ភេសជ្ជៈរួមគ្នាជាដើម។ តើអ្វីជាអាថ៌កំបាំងស្ថិតនៅពីក្រោយគំនិតសហគ្រិនភាពរបស់យុវជន ខ្មែរ។ កញ្ញា តាក់ ពិសិដ្ឋរដ្ឋលីដា ប្រធានក្រុមហ៊ុន We Are (VR)Trading Co.ltd បានមើលឃើញចំណុចសំខាន់ៗចំនួន ៦ ចំណុចដូចខាងក្រោម៖

-ការផ្លាស់ប្ដូរផ្នត់គំនិត ៖ យុវជនបច្ចុប្បន្ន ជឿថាទោះកើត ក្នុងត្រកូលអ្នកមានឬអ្នកក្រ ក៏អាចមានឱកាសដូចៗគ្នា។ យុវជនឲ្យតម្លៃទៅលើការពង្រីកគំនិត និងការបង្កើតឱកាសដល់ខ្លួនឯង។

-ការចេះមើលឱកាស៖ យុវវ័យ ដែលប្រកបរបរទាំងអស់នោះ មិនមែនពួកគេចេះតែនឹកឃើញ ហើយក៏បើកនោះទេ។ ពួកគេយ៉ាងហោចណាស់ក៏បានសិក្សាអំពីរបៀបបោះទុន និងការគិតគូរពីលំហូរដើមទុន ដែលដាក់ និងប្រាក់ចំណេញដើម្បីបង្វិល។

-មានចំណេះដឹងខ្ពស់៖ អ្នកមានគំនិតបើកអាជីវកម្មភាគច្រើន បានបញ្ចប់ការសិក្សាថ្នាក់បរិញ្ញាបត្រ ។ មានចំណេះដឹងពេញខ្លួន មិនមែនជាមនុស្ស ដែលគ្មានឱកាសរៀនសូត្រដូចមុនទេ។ ប៉ុន្តែហេតុអ្វីបានជាពួកគេនៅតែចង់បើករបរផ្ទាល់ខ្លួន? ចម្លើយក៏ព្រោះតែ ការមានគំនិតអាជីវកម្ម។

-ចង់សាកអ្វីដែលថ្មី៖ មានន័យថាអ្នកទាំងនោះ ធ្លាប់តែធ្វើជាកូនសិស្ស និងសិក្សាតែទ្រឹស្ដី Business នៅសាលា ហើយក៏បានឃើញពីទ្រឹស្ដីអ្នកជោគជ័យល្បីៗដូចជា Bill Gates ។ ដូច្នេះអ្នកទាំងនោះមានគំនិតចង់ធ្វើតាម។ អ្នកខ្លះទៀតអាចអត់ចង់ធ្វើការងារឲ្យគេ ព្រោះជឿលើគំនិតច្នៃប្រឌិតផ្ទាល់ខ្លួន។ បើទោះជាបរាជ័យ យុវជនក៏អាចដឹងពីចន្លោះប្រហោង ដែលខ្វះខាតលើកទីមួយ ហើយគំនិតភាពជាសហគ្រិននេះនឹងមិនរលាយបាត់នោះទេ។

-ប្លែកមានលក្ខណៈច្នៃប្រឌិត៖ យុវជនចេះឈ្មុសឈ្មុលរកអ្វីដែលថ្មី មិនធ្វើតាមគ្នា មានការព្យាយាមមិនប្រកាន់ខ្លួន មានភាពក្លាហាន និងហ៊ានប្រឈមមុខនឹងដៃគូ ដោយបើកចំហ។

-ចង់បង្កើនប្រាក់ចំណូល៖ យុវវ័យមានគំនិតចង់បង្កើនប្រាក់ចំណូលផ្ទាល់ខ្លួនឲ្យបានច្រើន ជាជាងធ្វើ ការងារឲ្យគេតែមួយមុខ ពិសេសចង់យកបទពិសោធន៍ និងចំណេះដឹងសាលាមកអនុវត្ត។ ម្យ៉ាងយុវជនមានទស្សនៈចង់ពង្រីកការងារឲ្យកូនខ្មែរដទៃទៀត។ អ្នកទាំងនោះយល់ថា ជាការល្អ ដែលយើងជាម្ចាស់ប្រទេសក្លាយជាសហគ្រិនដោយខ្លួនឯង៕

អានអត្ថបទ៖ CEO ស្រស់ស្អាត៦ រូបនៅភ្នំពេញមានទាំងសម្រស់ និងសមត្ថភាពខ្ពស់

អត្ថបទ៖មៃ សុខលីម