បេក្ខជន១២រូបត្រូវបានជ្រើសរើសដើម្បីឈានទៅវគ្គផ្ដាច់ព្រ័ត្រសហគ្រិនឆ្នើម

2015-05-08 01:18:15
ចំនួនមតិ 0 | ចំនួនចែករំលែក 0

ចន្លោះមិនឃើញ

សហគ្រិន១២ រូបត្រូវបានជ្រើសរើសដើម្បីឈានទៅវគ្គផ្ដាច់ព្រ័ត្រ ក្នុងកម្មវិធីពានរង្វាន់សហគ្រិនវ័យក្មេង នារសៀលនេះនៅសណ្ឋាគារសុខាភ្នំពេញ។ នេះគឺជាការរៀបចំជាលើកដំបូងបំផុតក្នុងប្រទេសកម្ពុជា ដោយក្រុមអ្នកដឹកនាំប្រកបដោយវិជ្ជាជីវៈ JCI និង YEAC ។ វគ្គផ្ដាច់ព្រ័ត្រនឹងប្រកាសលទ្ធផលនៅ ថ្ងៃទី ៣០ ខែឧសភា ឆ្នាំ២០១៥ ខាងមុខនេះ។

លោក សុខ ពិសិដ្ឋ អគ្គនាយកក្រុមហ៊ុន G Gear បានថ្លែងថា សហគ្រិនឆ្នើមទាំង១២រូប ត្រូវបានជ្រើសរើស ក្នុងចំណោមសហគ្រិនជាង ១០០ ក្រុមហ៊ុនដែលដាក់ពាក្យមកប្រកួតប្រជែង។ លោកថា ជំហានបន្ទាប់មកគណៈកម្មាធិការនឹងចុះទៅក្រុមហ៊ុនទាំង១២ ដើម្បីសិក្សាឱ្យស៊ីជម្រៅអំពីក្រុមហ៊ុន ហើយបើមានចំណុចងឿងឆ្ងល់នឹងមានការសាកសួរបន្ថែម។ "គណៈកម្មាធិការយើងនឹងឱ្យពិន្ទុបន្ថែមទៀតលើទស្សនៈវិស័យ និងផែនការអនាគតរបស់ក្រុមហ៊ុននីមួយៗ ហើយយើងនឹងជ្រើសរើស៤ ក្រុមហ៊ុនក្នុងចំណោម១២ក្រុមហ៊ុនហ្នឹង”។

សហគ្រិនឆ្នើមទាំង១២រូបមាន៖ ទី១លោក ខន ឈន់តារា ជាម្ចាស់ និងអ្នកគ្រប់គ្រងទូទៅនៃហាងតែគុជ និងកាហ្វេ KOI Café ,ទី២លោក ជា សារិន ប្រធានក្រុមហ៊ុន Champei Spa ,ទី៣ លោកលីម នីរ៉ា អគ្គនាយករបស់ក្រុមហ៊ុន Brands Management Limited , ទី៤ លោក Bou Panha ខាងក្រុមហ៊ុន Legend Tiger Co(a production company),ទី៥ អ្នកស្រី Ngorn Vanntha ខាងColor Silk,ទី៦ អ្នកស្រី កែវ មុំ អគ្គនាយិកាក្រុមហ៊ុន នំស្រួយ លី លី ,ទី៧ កញ្ញា San Vannary ខាង Lotus Silk,ទី៨ លោក Khim Bunlene ខាង Cambodia Farmer Rice,ទី៩ កញ្ញា Sok Sopheap ខាង Heng Kea Import Co.Ltd,ទី១០ លោក Hong Leng Y ខាង Lotus Green Team Co.Ltd ,ទី១១ លោក Ear Uy ខាង Osja studios,ទី ១២ កញ្ញា Koung Sorita ខាង Ocean Technology Co ។

បេក្ខជន ៤ នាក់ ក្នុងចំណោម ១២ នាក់ ដែលបានជ្រើសរើស នឹងប្រកាសឱ្យឈ្នះពាន ៤ ផ្នែករួមមាន ពានអាជីវកម្មលេចធ្លោប្រចាំឆ្នាំ (Outstanding Business of The Year) ពានអាជីវកម្មប្រយោជន៍សង្គម (Outstanding Social Business) ពានស្ត្រីសហគ្រិនឆ្នើម (Outstanding Woman Entrepreneur) និង ពានរង្វាន់អាជីវកម្មប្រើប្រាស់បច្ចេកវិទ្យាខ្ពស់ (High Tech Award) ៕