គ្រូពេទ្យវះកាត់យកកូន ភ្លេចទូរសព្ទក្នុងពោះម្ដាយ

2015-05-14 16:57:59
ចំនួនមតិ 0 | ចំនួនចែករំលែក 0

ចន្លោះមិនឃើញ

អាចជារឿងកម្រកើតមាន ហើយក៏ជាកំហុសដ៏ធ្ងន់ធ្ងរមួយក្នុងវិជ្ជាជីវៈពេទ្យ ខណៈវេជ្ជបណ្ឌិតនៅប្រទេសហ្សកដានីភ្លេចទូរសព្ទនៅក្នុងពោះស្ត្រីម្នាក់ពេលវះកាត់បង្កើតកូន។ រឿងអាស្រូវមួយនេះកំពុងក្លាយជាប្រធានបទក្ដៅក្នុងប្រទេសហ្សកដានី ហើយសមាជិកសភាម្នាក់ថែមទាំងទាមទារឲ្យរដ្ឋាភិបាលប្រទេសនេះចុះចេញពីតំណែងផងដែរ។

ស្ត្រីវ័យ ៣៦ឆ្នាំឈ្មោះ Hanan Mahmoud Abdul Karim បានទទួលការវះកាត់នៅមន្ទីរពេទ្យឯកជនមួយក្នុងក្រុង Amman កាលពីថ្ងៃទី២៤ ខែមេសាកន្លងទៅ។ អំឡុងពេលប្រតិបត្តិការវះកាត់នោះ គ្រូពេទ្យបានភ្លេចទូរសព្ទនៅក្នុងពោះនារីរងគ្រោះ។

លោកស្រី Majeda Abdul Hamid ជាម្ដាយរបស់នារីរងគ្រោះ បានប្រាប់ប្រព័ន្ធផ្សព្វផ្សាយថា បន្ទាប់ពីកូនស្រីខ្លួនផ្ដល់កំណើតឲ្យទារកទម្ងន់ ៤,៨គីឡូក្រាមរួច នាងបានចាកចេញពីមន្ទីរពេទ្យទៅសម្រកនៅផ្ទះ។ យ៉ាងណាមិញ ក្រោយមកគ្រួសារនាងចាប់ផ្ដើមសម្គាល់ឃើញថា ពោះនារីរងគ្រោះចាប់ផ្ដើមញ័រ។

“កូនស្រីខ្ញុំឈឺចាប់ខ្លាំងណាស់ មិនអាចទៅណារួចទេ... ខ្ញុំនាំនាងទៅពេទ្យ ដែលធ្លាប់វះកាត់នោះវិញ តែគេមិនមើលនាងសោះ"។ ម្ដាយនារីរងគ្រោះនិយាយ។ ក្រោយមកនាង Hanan ត្រូវបញ្ជូនបន្តទៅមន្ទីរពេទ្យរដ្ឋ Al Bashir នៅក្រុង Amman។ បន្ទាប់ពីថតកាំរស្មីអ៊ិច ទើបគេរកឃើញថាមានវត្ថុចម្លែកនៅក្នុងពោះរបស់នាង។ ក្រុមគ្រូពេទ្យនៅមន្ទីរពេទ្យនោះ បានវះកាត់ឲ្យនារីរងគ្រោះ និងយកទូរសព្ទចេញពីពោះវិញដោយជោគជ័យ។

ករណីវះកាត់ភ្លេចទូរសព្ទនៅក្នុងពោះនេះ បានក្លាយជាប្រធានបទក្ដៅក្នុងសភាហ្សកដានី ខណៈសមាជិកសភាម្នាក់ឈ្មោះ Salim Al Bataynah បានទាមទារឲ្យរដ្ឋាភិបាលប្រទេសមួយនេះលាលែងពីតំណែង។

លោក Salim បាននិយាយថា "នៅក្នុងប្រទេសជាច្រើនដែលគោរពប្រជាជន ហើយមានរឿងអាស្រូវបែបនេះ រដ្ឋាភិបាលរបស់គេតែងលាលែងពីតំណែង... រដ្ឋសភាគួរបង្ហាញពីទំនួលខុសត្រូវ និងចាត់វិធានការទៅលើករណីនេះ"។ យ៉ាងណាក៏ដោយ អ្នកនាំពាក្យក្រសួងសុខាភិបាល លោក Hatem Al Azrae បាននិយាយថា ករណីរបស់នារីរងគ្រោះ Hanan ពុំមានភស្តុតាងគ្រប់គ្រាន់ និងគ្រាន់តែជាការប្រឌិតឡើងប៉ុណ្ណោះ ប៉ុន្តែលោកក៏បញ្ជាក់ដែរថាក្រសួងនឹងតាមដានរឿងនេះដោយយកចិត្តទុកដាក់៕

ចុចអាន៖ ការវះកាត់ប្ដូរក្បាលដំបូងគេក្នុងលោក នឹងធ្វើឡើងលើបុរសស្ម័គ្រចិត្តម្នាក់

ប្រែសម្រួល៖ គង់ វិសាល ប្រភព៖ gulfnews