Facebook បង្ហាញមុខងារថ្មី បង្ហោះព័ត៌មានលឿនជាងមុនដល់ទៅ១០ដង

2015-05-14 23:10:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ហ្វេសប៊ុកបានបង្ហាញមុខងារថ្មី មានឈ្មោះថា Instant Articles ដែលមុខងារនេះ នឹងអនុញ្ញាតឱ្យបណ្ដាសារព័ត៌មាន ចែករំលែកអត្ថបទព័ត៌មានរបស់ខ្លួន បានលឿនជាងមុន លើ News Feed របស់អ្នកលេងហ្វេសប៊ុក។

ហ្វេសប៊ុកបញ្ជាក់ថា មុខងារថ្មីនេះនឹងធ្វើឱ្យអ្នកលេងបណ្ដាញសង្គមយក្ស ទទួលបានបទពិសោធន៍ថ្មី ដោយអត្ថបទព័ត៌មាន នឹងលេចឡើងលើទូរសព្ទដៃរបស់ពួកគេលឿន។ តាមស្តង់ដារ អត្ថបទមួយបង្ហាញលើហ្វេសប៊ុក មានរយៈពេល៨វីនាទី តែ Instant Articles នឹងធ្វើលឿនជាងមុនដល់ទៅ១០ដងឯណោះ។

មិនតែប៉ុណ្ណោះមុខងារខាងលើ នឹងអាចឱ្យអ្នកលេងហ្វេសប៊ុក មើលរូបភាព វីដេអូ ស្ដាប់ច្បាស់ល្អ រួមទាំងអាចចុច Like, Comment លើអត្ថបទបានផងដែរ។ កាន់តែពិសេសនោះ ក្រុមស្ថាប័នសារព័ត៌មាន អាចដាក់ការផ្សាយពាណិជ្ជកម្មរបស់ពួកគេលើអត្ថបទ ដោយទទួលប្រាក់ចំណូល១០០% បើមិនដូច្នេះទេស្ថាប័នសារព័ត៌មាន អាចឱ្យហ្វេសប៊ុកជួយផ្សព្វផ្សាយ add របស់ពួកគេជុំវិញអត្ថបទក៏បាន តែត្រូវចែកប្រាក់ចំណេញ ទៅបណ្ដាញសង្គមមួយនេះ៣០%។ ហ្វេសប៊ុកបន្ថែមថា ពួកគេអាចក៏តាមដានទិន្នន័យ និងចរន្តនានា តាមរយៈ ComScore ឬឧបករណ៍តាមដានផ្សេងៗទៀតជាដើម។

ប្រធានផ្នែកផលិតរបស់ហ្វេសប៊ុក លោក Chris Cox និយាយថា នេះជាមុខងារមួយ ដែលអាចឱ្យស្ថាប័នសារព័ត៌មាន ផ្ដល់នូវបទពិសោធន៍ល្អ សម្រាប់អ្នកអានរបស់ពួកគេលើហ្វេសប៊ុក។ Instant Articles នឹងឱ្យពួកគេ ចែកចាយអត្ថបទបានលឿនភ្លាមៗផងដែរ។

មុខងារ Instant Articles នឹងដាក់ឱ្យដំណើរការជាមួយស្ថាប័នព័ត៌មាននានា រួមទាំង The New York Times, National Geographic, BuzzFeed, NBC News, The Atlantic, The Guardian, BBC News, Spiegel និង Bild៕