Lionel Messi ​ចូល​លេង​ឈុត​ធំ Barcelona ​តាំង​ពី​ឆ្នាំ​២០០៤ ហើយ​រយៈ​ពេល​១១​ឆ្នាំ​មក​នេះ រូប​គេ​បាន​ជួយ​ក្រុម​លើក​ពាន​រហូត​ដល់​ទៅ​២២​ពាន​រង្វាន់​ផ្សេង​គ្នា​ឯ​ណោះ បើ​រាប់​បញ្ចូល​ទាំង​ពាន La Liga ​ដែល​ទើប​តែ​ឈ្នះ​កាល​ពី​យប់​មិញ​នេះ​ទៀត។

ត្រឹម​រយៈ​ពេល​ជាង​១០​ឆ្នាំ​ Messi អាច​ជួយ​ក្រុម​ឈ្នះ​ពាន​២២​ពាន​រង្វាន់​ផ្សេង​គ្នា ​ ​ដែលធ្វើ​ឱ្យ​អ្នក​គាំទ្រ​អ្នក​មាន​បុណ្យ​ទាំង​អស់​សប្បាយ​ចិត្ត​ និង​អរគុណ​ដល់​ម្ចាស់​ពាន Ballon d'Or ​៤​សម័យ​ខាង​លើ​នេះ​ខ្លាំង​ណាស់ ព្រោះ​រូប​គេ​បាន​សាង​ប្រវត្តិសាស្ត្រ​ច្រើន​ចំពោះ​ក្រុម​ទាំង​មូល។  ​២២​ពាន​រង្វាន់​នេះ​រួម​មាន La Liga ​៧​ដង , Copa del Rey ​២​ដង , UEFA Champions League ​៣​ដង , Supercopa ​៦​ដង , European Super Cup ​២​ដង​ និង​ FIFA Club World Cup ​២​ដង។

មិន​ត្រឹម​តែ​ប៉ុណ្ណោះ ​រដូវ​កាល​នេះ​ទៀត​សោត Barca ​ក៏​នៅ​មាន​ពាន​រង្វាន់​២​ទៀត​ក្នុង​ដៃ​គឺ Copa del Rey ​វគ្គ​ផ្ដាច់​ព្រ័ត្រ​ប៉ះ Athletic Bilbao ​នៅ​ថ្ងៃ​ទី​៣០​ខែ​ឧសភា​នេះ និង​មួយ​ទៀត UEFA Champions League ​វគ្គ​ផ្ដាច់​ព្រ័ត្រ​ប៉ះ Juventus ​នៅ​ថ្ងៃ​ទី​៦ ​ខែ​មិថុនា​ខាង​មុខ។ ទន្ទឹម​និង​ការ​ជោគជ័យ ហើយ​ក្រុម​មាន​ទម្រង់​លេង​ល្អ​ផង​នោះ អ្នក​គាំទ្រ​អ្នក​មាន​បុណ្យ​ទាំង​អស់​មាន​សង្ឃឹម​ខ្ពស់​ណាស់​ថា​នឹង​អាច​លើក​ពាន​ទាំង​ពីរ​នេះ​ទៀត​បាន ដោយ​ពឹង​លើ​ទ័ព​ស្រួច​ Messi , Saurez ​និង Neymar។

បើ​និយាយ​ពី​ស្ថិតិ​គ្រាប់​បាល់​ដែល​ខ្សែ​ប្រយុទ្ធ​វ័យ​២៧​ឆ្នាំ​ខាង​លើ​ធ្វើ​បាន​ឱ្យ​ក្រុម Barca ​វិញ​គឺ​​ចូល​លេង​បាន​៥១២​ប្រកួត និង​រក​គ្រាប់​បាល់​បាន​៤១៩​គ្រាប់​ហើយ៕

ចុចអាន៖Barca ឈ្នះ Atletico លើក​ពាន La Liga លើក​ទី​២៣ ទោះ CR7 ស៊ុត​ហ៊ែតទ្រីក

​ប្រែ​សម្រួល៖ មុន្នី រម្យ ប្រភព៖ livesoccertv