ការពិតលេងហ្គេមមានប្រយោជន៍អីចឹងទេ!

2014-09-16 17:03:51
ចំនួនមតិ 0 | ចំនួនចែករំលែក 0

ចន្លោះមិនឃើញ

Sabay ជឿថាមិត្តៗអ្នកអានទាំងអស់សុទ្ធតែធ្លាប់លេងហ្គេមគ្រប់គ្នាហ្នឹង! បើថាមិនធ្លាប់លេងហ្គេមក៏ Sabay ពិបាកជឿដែរ ព្រោះប្រិយមិត្តសុទ្ធតែមានទូរសព្ទនៅក្នុងដៃទាំងអស់។ ហើយសួរថា ក្នុងទូរសព្ទទាំងនោះមានហ្គេមអត់? ប្រាកដជាមាន ជាពិសេសគឺប្រភេទទូរសព្ទទំនើបៗតែម្ដង។ មានសំណួរតទៀតហើយគឺ ដឹងថាហ្គេមមានប្រយោជន៍អត់ពេលលេងហ្នឹង?

ប្រិយមិត្តប្រាកដជាឆ្លើយថា លេងហ្គេមអាចកាត់បន្ថយស្ត្រេស Stress និងផ្ដល់ភាពសប្បាយរីករាយ ក៏ដូចជាបំបាត់ភាពអផ្សុករបស់ប្រិយមិត្តបាន។ ការពិតផលប្រយោជន៍នៃការលេងហ្គេមមិនមែនមានតែប៉ុណ្ណឹងទេ នៅមានច្រើនទៀតណាស់ គ្រាន់តែប្រិយមិត្តមិនសូវបានចាប់អារម្មណ៍ប៉ុណ្ណោះ។

មកដល់ចំណុចនេះ ប្រិយមិត្តអ្នកអានមួយចំនួនប្រាកដជាអាចពេបមាត់ខ្វែងគំនិតហើយ ខណៈប្រិយមិត្តខ្លះទៀតយល់ស្របក្រោយពីបានចូលរួម (ខ្លះអង្គុយ ខ្លះឈរក្នុងបន្ទប់ ខ្លះទៀតឈរស្ដាប់ក្រៅបង្អួច) ស្ដាប់ វាគ្មិន ងួន សុភី ដែលជាអ្នកជំនាញអភិវឌ្ឍកម្មវិធីលើទូរសព្ទមួយរូប រៀបរាប់ពីផលប្រយោជន៍នៃការលេងហ្គេម កាលពីថ្ងៃសៅរ៍ក្នុងព្រឹត្តិការណ៍បារខែម។ តើ សុភី ចែករំលែកពីការលេងហ្គេមដល់មិត្តៗអ្នកអាននាឱកាសនោះយ៉ាងម៉េចខ្លះ?

ចំណុចទីមួយដែលកញ្ញាបានលើកឡើងនោះគឺថា ការលេងហ្គេមអាចធ្វើឲ្យខួរក្បាលមានដំណើរការឆ្លាត និងដោះស្រាយបញ្ហាបានរហ័សជាងមុន។ អ្នកលេងហ្គេមអាចទទួលយកកិច្ចការជាច្រើនក្នុងពេលតែមួយ ហើយបែងចែកយ៉ាងច្បាស់ពីកិច្ចការនីមួយៗថាត្រូវធ្វើកិច្ចការណាមុនឬក្រោយ។ ក្រោយពីបានបែងចែកកិច្ចការ ឬបញ្ហាច្បាស់ហើយ ពួកបានយកចិត្តទុកដាក់ក្នុងការដោះស្រាយបញ្ហាឲ្យបានសម្រេច និងលឿនជាទីបំផុតដែលអាចខ្លួនអាចធ្វើបាន ព្រោះពួកគេមិនចង់បាត់បង់ពេលវេលាសម្រាប់ដោះស្រាយបញ្ហាមួយផ្សេងទៀតឡើយ។

ចំណុចទី ២ នោះគឺថា អ្នកលេងហ្គេមទទួលបានសុខភាពល្អផ្នែករាងកាយនិងភ្នែករហ័សជាងមុន ដោយមិនដឹងខ្លួន ព្រោះហ្គេមមួយចំនួនមិនត្រឹមតែផ្ដល់ភាពសប្បាយរីករាយជូនអ្នកលេងឡើយ តែវាក៏ជាផ្នែកមួយនៃការហាត់ប្រាណដែរ។ ជាក់ស្ដែង ដូចជាហ្គេមទំនើបវាយឬហ្គេមរាំនៅតាមផ្សារទំនើបជាដើម ដែលតម្រូវឲ្យប្រិយមិត្តធ្វើកាយវិការយ៉ាងខ្លាំង ទើបអាចឆ្លងផុតពីវគ្គមួយទៅវគ្គមួយរហូតឈានដល់ជ័យជម្នះ។

រីឯចំណុចទី ៣ នោះគឺថា ការសិក្សាអប់រំបានបង្កប់ជាច្រើននៅក្នុងហ្គេម។ ហ្គេមបានធ្វើឲ្យក្មេងៗជាច្រើនឆ្លាតជាងអាយុ ព្រោះដោយសារតែគេចង់ ឬធ្លាប់លេងហ្គេម ពួកបានធ្វើការស្រាវជ្រាវ ក៏ដូចជាស្គាល់នូវការប្រើប្រាស់ឧបករណ៍បច្ចេកវិទ្យាទំនើបយ៉ាងច្បាស់ទាំងពួកគេនៅក្មេងនៅឡើយ។

អ្នកលេងហ្គេមមានជំនាញពិសេសមួយគឺការទំនាក់ទំនង។ ពួកគេតែងតែជជែក Chat សួរនរណាម្នាក់ភ្លាមៗនៅពេលដែលគេមានចម្ងល់ទាក់ទងនឹងហ្គេមនោះ ទោះជាគេមិនធ្លាប់ស្គាល់ម្នាក់នោះក៏ដោយ។ តាមរយៈការជជែក Chat ជាមួយគ្នានេះ ពួកគេអាចនឹងទទួលបានព័ត៌មានថ្មីៗជាច្រើនពីមិត្តភ័ក្ដិទាំងនោះ ព្រោះពួកគេតែងតែចែករំលែកពីព័ត៌មានថ្មីៗ ក៏ដូចជាបទពិសោធន៍ផ្សេងៗទៅគ្នា ក្រោយពីស្គាល់គ្នាតាមរយៈការជជែកកម្សាន្តនោះ។

ហើយអ្វីដែលអ្នកលេងហ្គេមចូលចិត្តធ្វើគឺការសហការជួយគ្នាទៅវិញទៅមកក្នុងក្រុម។ ពួកគេភាគច្រើនប្រកាន់ខ្ជាប់នូវសង្គមចែករំលែក និងសហការគ្នាជានិច្ច ព្រោះអ្នកលេងហ្គេមទាំងអស់សុទ្ធតែចង់ទទួលបាននូវជ័យជម្នះដូចគ្នា ហើយពួកគេក៏យល់យ៉ាងច្បាស់ដែរថា ជ័យជម្នះក្រុម Clan គឺកើតមកពីការសហការជួយគ្នាទៅវិញទៅមក។

បន្ទាប់ពីបានរ៉ាយរ៉ាប់ពីផលប្រយោជន៍ទាំងនេះជូនអ្នកចូលរួមស្ដាប់រួចហើយ កញ្ញា ងួន សុភី បានបញ្ជាក់ប្រាប់ទៀតថា "ធ្វើអ្វីក៏ដោយ កុំឲ្យតែពេក តែធ្វើដល់ពេក ផលប្រយោជន៍នឹងរត់គេចបាត់ ហើយផលអវិជ្ជមាននឹងកើតមានឡើង" "Too Much of Everything Is Bad"។

ប្រិយមិត្តយល់យ៉ាងណាដែរ?

សូមបន្តអាន៖ CCC 2014 ខេត្តព្រះសីហនុបើកឲ្យចុះឈ្មោះប្រកួតហើយ....

សូមបន្តអាន៖ រឿង១០យ៉ាង អ្នកប្រើ iPhone បើមិនទាន់ដឹង ត្រូវដឹងភ្លាម...

អត្ថបទ៖ ភីឆាយ