អបិយជំនឿខ្មែរ ថតរូបគ្នា៣នាក់ជួបរឿងមិនល្អ?

2015-05-28 18:00:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ការថតរូបកំពុងពេញនិយម ពីសំណាក់យុវវ័យសម័យស្មាតហ្វូន ខណៈពីមុនមានជំនឿថា ថតរូបជុំគ្នាបីនាក់ អាចនឹងនាំឱ្យជួបរឿងអាក្រក់ផ្សេងៗក្នុងជីវិត។ ចុះបច្ចុប្បន្ន យុវវ័យយល់យ៉ាងណា ចំពោះជំនឿនេះ? ពួកគេជឿដែរឬទេ?

ឆ្លើយតបនឹងសំនួរ យុវតីស្រលាញ់ចូលចិត្តបាល់ទាត់ មកពីខេត្តសៀមរាប ឈឿន សុជាតា បានប្រាប់ Sabay ថា ៖« ទោះគ្មានហេតុផលច្បាស់លាស់ តែខ្ញុំជឿ។ ខ្ញុំអត់ហ៊ានថតរូបគ្នាបីនាក់។ ខ្ញុំឮថាបើថតបីនាក់ នឹងមានម្នាក់ឈឺ ឬអាចមានគ្រោះថ្នាក់ដល់ជីវិត (ស្លាប់) រីឯម៉ាក់ខ្ញុំវិញ គាត់អត់ឱ្យខ្ញុំ ថតរូបគ្នាបីនាក់ទេ»។

ពាក់ព័ន្ធនឹងប្រធានបទ "ថតរូបបីនាក់ជួបរឿងអាក្រក់មែនអត់?" កញ្ញា សែ ចិន្ដា បុគ្គលិកក្រុមហ៊ុនឯកជនមួយ ក៏មិនហ៊ានថតរូបបីនាក់ដែរ ៖«ឱ្យតែថតបីនាក់ ខ្ញុំដឹងតែសុំគេធ្វើជាអ្នកថតហើយ ព្រោះអីខ្ញុំខ្លាច (សើច)។ មិត្តភ័ក្ដិ គេហៅខ្ញុំថតតែខ្ញុំអត់ព្រម ទាល់តែមានគូៗទើបថត»។ ចិន្ដាប្រាប់បញ្ជាក់ពីដំណឹងឮតគ្នាថា បើថតបីនាក់ ឬសេះគូ ច្បាស់ជាមានអ្នកណាម្នាក់ ជួបគ្រោះអាក្រក់មិនខាន។

រូបតំណាង

ផ្ទុយពីការលើកឡើង របស់យុវតីទាំងពីរខាងលើ កញ្ញា ឈឹម សុវណ្ណច័ន្ទលក្ខិណា និស្សិតឆ្នាំទីមួយផ្នែកទេសចរណ៍ នៃសាកលវិទ្យាល័យប្រៀបប្រាយ ក៏ធ្លាប់ឮតគ្នាដែរ តែកញ្ញាមិនជឿទេ ៖«ពីមុនខ្ញុំក៏ខ្លាចដែរ តែពេលនេះខ្ញុំមិនខ្វល់។ ឥលូវជាសម័យ Selfies សម័យថតរូប សម័យកុំព្យូទ័រ អ៊ីចឹងខ្ញុំអត់ជឿ។ ខ្ញុំគិតថានេះគ្រាន់តែជា ពាក្យចចាមអារ៉ាមដើម្បីបន្លាចយើងតែប៉ុណ្ណឹង»។

ងាកមកស្ដាប់ការរៀបរាប់របស់យុវតី សន ស្រីខួច ឯណេះវិញ កញ្ញាក៏មិនជឿដែរ បើទោះបីធ្លាប់ឮយ៉ាងណាក្ដី។ បុគ្គលិកមីក្រូហិរញ្ញវត្ថុហត្ថាកសិកររូបនេះបន្តថា កញ្ញាថតរូបបីៗនាក់ តាំងពីនៅក្មេងៗម្ល៉េះ ចំណែកសព្វថ្ងៃក៏នៅតែថត តែគ្មានឃើញអ្វីមិនល្អកើតឡើងឡើយ៖ «ចំពោះខ្ញុំអត់ជឿទេ តែមានមិត្តភ័ក្ដិខ្ញុំម្នាក់គេជឿ ឱ្យតែថតរូបបីនាក់គេអត់ថតហ្មង»។

ចំណែកលោក សុផា ថ្វីបើមានការហាមប្រាមពីមិត្តភ័ក្តិ តែនិស្សិតនៃសាកលវិទ្យាល័យ CamEd Business School មិនជឿជំនឿគ្មានភស្តុតាងច្បាស់លាស់នេះដែរ ដោយលោកបញ្ចេញយោបល់ថា គ្រាន់តែជាពាក្យចចាមអារ៉ាមឮតគ្នាប៉ុណ្ណោះ ៖« ពីមួយជំនាន់ទៅមួយជំនាន់ ពាក្យនេះតែងឮតគ្នា ខ្ញុំមិនជឿទេ។ ខ្ញុំតែងថតរូបបីនាក់ៗរហូតមកហ្នឹង ហើយក៏គ្មានបញ្ហាអ្វីកើតឡើងដែរ»។

មិនខុសពីយុវវ័យខាងលើទេ លោក កឹម សុវណ្ណា អ្នកថតរូបអាជីពម្នាក់នៅកម្ពុជា ក៏ធ្លាប់គេនិយាយតគ្នាអំពីរឿងនេះពីមុនដែរ។ បើសិនថតរូបមានគ្នាបីនាក់ ម្នាក់កណ្ដាលគេ នឹងជួបគ្រោះកាច ដែលដក់ជាប់ក្នុងផ្នត់គំនិត ប្រជាជនខ្មែររហូតដល់បច្ចុប្បន្ននេះដែរ។យ៉ាងណាមិញ អ្នកនិយមថតរូប Reflection បានបរិយាយទៀតថា សព្វថ្ងៃគេលែងជឿអប្បិយជំនឿនេះហើយ ៖« ឥលូវសម័យថតរូបសម័យទំនើប គេលែងគិតអ៊ីចឹងទៀតហើយ ខ្ញុំឧស្សាហ៍ថតណាស់ តែគ្មានអ្វីមិនល្អកើតឡើងទេ»៕

ចុចអាន៖ លោក អ៊ឹម បូរិន ៖ អាជីពគ្រូទាយវគ្គបណ្ដុះបណ្ដាលថ្មីកំពុងទទួលការចាប់អារម្មណ៍

ចុចអាន៖ អ្នកភូមិម្តុំវត្តទឹកថ្លា ល្បីហោរាវ័យក្មេងទាយឆុត!

អត្ថបទ៖ អ៊ុំ សុភក្តិ