កញ្ញា សុខ ផាណានីដា៖ ភាពជាសហគ្រិនមិនស្ថិតលើដុង ឬទៅលើការសិក្សាតែមួយនោះទេ

2015-06-02 18:11:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាសហគ្រិនវ័យក្មេងមួយរូបដែលមានមុខជំនួញជាច្រើននៅក្នុងដៃរាប់បញ្ចូលទាំង DADANA Wedding Planner ហាងឯកទេសខាងដេគ័រ ផ្កាស្រស់សម្រាប់គ្រប់កម្មវិធីជាពិសេសក្នុងកម្មវិធីជាលក្ខណៈស្តង់ដារ កញ្ញា សុខ ផាណានីដា បានលើកឡើងថា ភាពជាសហគ្រិនមិនស្ថិតលើដុងពីកំណើត ឬអាស្រ័យទៅលើការសិក្សាតែមួយមុខនោះទេ។ មិនមែនដុង ឬអាស្រ័យទៅលើការសិក្សាតែមួយ តើអ្វីទៅដែលកញ្ញាចង់ផ្ដោតសំខាន់នៅពេលនេះ? Sabay ជួបសម្ភាសន៍ជាមួយកញ្ញាដូចតទៅ៖

Sabay) តើមានកត្តាអ្វីខ្លះដែលនាំឱ្យការនិយមថត Outdoor ជាលក្ខណៈគូស្នេហ៍មុនរៀបអាពាហ៍ពិពាហ៍មានការកើនឡើង?

កញ្ញា សុខ ផាណានីដា៖ ប្រសិនបើយោងលើកត្តាហេតុផលដែលនាំឲ្យការថតរូបជាលក្ខណៈគូស្នេហ៍មុនរៀបអាពាហ៍ពិពាហ៍មានការកើនឡើង Outdoor Pre Wedding Photo អ្វីដែលជាកំណត់សំគាល់គឺអ្នកក៏អាចសង្កេតឃើញខ្លួនឯងបានផងដែរថា នៅតាមប្រព័ន្ធផ្សព្វផ្សាយសង្គមមនុស្សម្នាក់ៗមានទំនោរតាមគ្នាដោយព្យាយាមធ្វើយ៉ាងណាឲ្យប្រសើរជាងគ្នា ទោះបីមានអ្នកខ្លះមានឧបសគ្គលើថវិកាមិនគ្រប់គ្រាន់ក៏ដោយ។

ដោយគ្មាននរណាម្នាក់បានគិតថាជាការព្យាយាមធ្វើឲ្យប្រសើរជាងគ្នាវាមានផលលំបាកនោះទេ។ អាកាសធាតុនៅប្រទេសកម្ពុជាមិនសូវជាអំណោយផលក្នុងការថតនៅខាងក្រៅទេជួនកាលមានភ្លៀង ឬក្តៅស្អុះស្អាប់ជ្រុលពេក អ្នកអាចដឹងហើយថាមានសភាពបែបម៉េចនោះ ម៉ាគីយ៉េនៅលើផ្ទៃមុខកូនក្រមុំតែងតែហៀរប្រតេកប្រតាកដែលចាំបាច់ត្រូវមានអ្នកផាត់មុខនៅជាប់តាមជាមួយក្នុងការថតដើម្បីឲ្យប្រាកដថាផ្ទៃមុខកូនក្រមុំនៅតែស្រស់ស្អាត។ ទោះបីជាដូច្នេះក៏ដោយការនិយាយតពីមាត់មួយទៅមាត់មួយ ការនិយាយតប្រាប់មិត្តភ័ក្ដិពីម្នាក់ទៅម្នាក់ទៀតបានជំរុញឲ្យមានមនុស្សជាច្រើនចង់ថត ទោះបីជាយើងមើលឃើញថាវាជាការលំបាក តែគេមើលទៅផ្ទុយទៅវិញដោយគេទទួលបានការផាត់មុខស្រស់ស្អាតជានិច្ច ជាកត្តាចម្បងមួយដែលជំរុញឲ្យមនុស្សជាច្រើនថត OUTDOOR តែភាពពិតជាក់ស្ដែង អ្នកអាចឃើញថាគូស្នេហ៍ទាំងនោះមានភាពលំបាកនៅក្រោមអាកាសធាតុ។

Sabay) តើកញ្ញាមានគំនិតបើក Wedding Planner នេះមកពីណា? អ្វីដែលជំរុញចិត្តរបស់កញ្ញាឱ្យបើកជំនួញមួយនេះឡើង?

កញ្ញា សុខ ផាណានីដា៖ នាងខ្ញុំបានចូលរួមពិធីអាពាហ៍ពិពាហ៍ជាច្រើន មិត្តភ័ក្ដិនាងខ្ញុំមួយចំនួនធំក៏បានរៀបអាពាហ៍ពិពាហ៍រួចហើយប៉ុន្តែក៏នៅមានអ្នកនៅលីវជាច្រើននាក់ដែលជាមិត្តជិតស្និទ្ធ ដែលនឹងរៀប អាពាហ៍ពិពាហ៍ជាបន្តបន្ទាប់។ នាងខ្ញុំទៅចូលរួមពិធីអាពាហ៍ពិពាហ៍ដែលក្រុមហ៊ុនផ្សេងៗរៀបចំតុបតែង អ្វីដែលនាងខ្ញុំឃើញកត់សំគាល់ជាកត្តារួមមួយស្ទើរតែគ្រប់គ្នាគឺស្រឡាញ់ការតុបតែងផ្កា អាចថាបានថាជាទំនោរនិយមរបស់កម្ពុជាគ្រប់គ្នាស្រឡាញ់ផ្កា ហើយការផ្គត់ផ្គង់ផ្កានៅកម្ពុជាគឺមានកំណត់។ សម្រាប់នាងខ្ញុំមានបទពិសោធន៍ក្នុងក្រុមហ៊ុនCreative Agencyពីមុនមក ដូចនេះនាងខ្ញុំនិងមិត្តរបស់នាងខ្ញុំមានអារម្មណ៍គិតថាយើងអាចធ្វើអ្វីបានប្រសើរជាងនេះ។ យើងចង់ផ្ដល់ជូនដល់ពលរដ្ឋកម្ពុជាទាំងអស់ឲ្យបានល្អប្រសើរជាងនេះ និងយ៉ាងហោចណាស់ដល់មិត្តភ័ក្ដិនាងខ្ញុំក្នុងថ្ងៃអនាគតដែលមិនទាន់រៀបការ នូវអ្វីដែលស្រស់ស្អាតជាងដែលយើងធ្លាប់ឃើញនិងដែលគេកំពុងតែអនុវត្ត យើងឃើញស្ទើរតែគ្រប់គ្នាសុទ្ធតែតុបតែងនឹងផ្កាដែលក្លាយជារឿងធម្មតា អ្វីដែលប្លែកគឺការរចនាឌីហ្សាញ ជម្រើស ការចេះដាក់តុបតែងឲ្យត្រូវលំនាំ និងការជ្រើសរើសផ្កាទាំងឡាយ ព្រមទាំងការច្នៃប្រឌិតដែលនាំឲ្យមានភាពលេចធ្លោរបស់ផ្កាដែលធ្វើឲ្យពិធីអាពាហ៍ពិពាហ៍នេះ មានសោភ័ណភាពខុសប្លែកពីអ្នកដទៃ ហើយនេះជាហេតុផលដែលនាងខ្ញុំនិងមិត្តនាងខ្ញុំពីរនាក់ទៀតរួមគ្នាបង្កើតជាក្រុមហ៊ុនឡើង។មិត្តរបស់នាងខ្ញុំទាំងពីរនាក់គឺសុទ្ធតែមានជំនាញខាងផ្នែកហិរញ្ញវត្ថុ ពួកគាត់ពិតជាពូកែឆ្លាតវៃ ពួកគាត់យល់ដឹងពីរបៀបរៀបចំថវិកានិងការសន្សំសំចៃសម្រាប់អតិថិជន នៅពេលដែលយើងឃើញគម្រោងអាជីវកម្មភ្លាមពិតជាមានក្ដីរំភើប ក្នុងខណៈនោះ ដែលជាចំណុចចាប់ផើ្តមនៃការកកើតក្រុមហ៊ុន DADANA នាងខ្ញុំមានជំនាញខាងច្នៃប្រឌិត ហើយពួកគាត់ក៏មានជំនាញខាងផ្នែកហិរញ្ញវត្ថុផងដែរ។

Sabay) តើកញ្ញាគិតថាសេវាកម្មរបស់ DADANA Flower Shop វាមានភាពខុសប្លែកយ៉ាងណាទៅជាមួយនឹងដៃគូប្រកួតប្រជែងផ្សេងទៀត?

កញ្ញា សុខ ផាណានីដា៖ ដាដាណាគឺជាការរួមគ្នារវាងអ្នកជំនាញខាងផ្នែកហិរញ្ញវត្ថុដែលមានចំណេះដឹងខាងរៀបចំកញ្ចប់ថវិកា ដាដាណា មានក្រុមអ្នកជំនាញឌីហ្សាញនៅពីក្រោយខ្នង ដោយដឹងពីវិធីរៀបចំគម្រោងសម្រាប់អតិថិជន ដាដាណា មានទំនាក់ទំនងផ្ទាល់ទៅនឹងប្រភពធនធានដើម ហើយអតិថិជនរបស់យើងទាំងអស់គឺសុទ្ធតែបញ្ជាក់បាននូវគុណភាពនិងការរចនាឌីហ្សាញច្នៃប្រឌិតក្នុងការតុបតែងដែលយើងអាចធ្វើបាន និងមានភាពខុសគ្នាពីមួយទៅមួយ ។ នេះជាជំនាញមួយដែលយើងអាចធ្វើឲ្យ កូនក្រមុំទាំងអស់ញញឹមចេញមកពោរពេញទៅដោយសេចក្ដីសុខ និងចូលទៅគេងជាមួយនឹងអារម្មណ៍ប្រតិព័ទ្ធ អ្វីដែលសំខាន់បំផុតនោះ ដាដាណា អាចធ្វើឲ្យកូនក្រមុំដក់ជាប់នូវការចងចាំនៃការរចនាដ៏អស្ចារ្យជារៀងរហូត ដែលយើងហៅថា “ការតុបតែងពោរពេញដោយរសនិយមThe Touch of Class”។ក្នុងគំនិតរបស់យើងខ្ញុំមិនគិតថាមានគូប្រកួតប្រជែងទេ តាមពិតទៅជាការល្អទៅវិញទេដែលមានក្រុមហ៊ុនជាច្រើនផ្តល់សេវាកម្មអាពាហ៍ពិពាហ៍។ ហើយក៏មិនដែលគិតថាការរចនាឌីហ្សាញរបស់ក្រុមហ៊ុនដទៃខ្សោយមិនល្អនោះដែរ គឺយើងយកចិត្តទុកដាក់លើការឌីហ្សាញរបស់គេ មានខ្លះធ្វើបានល្អ នៅពេលដែលយើងមើលការឌីហ្សាញទាំងអស់នោះយើងត្រូវគិតថាចំណុចណាខ្លះដែលយើងត្រូវបន្ថែមលើការឌីហ្សាញនោះ និងធ្វើឲ្យប្រសើរជាងមុនទៀតដើម្បីធ្វើឱ្យពិធីមង្គលការកាន់តែអស្ចារ្យ និងចំណាយអស់ថវិកាតិចជាងមុន។ ជាធម្មតាអតិថិជនរបស់យើងនឹងប្រាប់ពីខ្ទង់ចំណាយថវិការបស់គាត់ ហើយយើងព្យាយាមនិងធ្វើការក្នុងរង្វង់ថវិកានោះ សូមកុំភ្លេចថាដៃគូអាជីវកម្មរបស់នាងខ្ញុំគឺជាអ្នកជំនាញខាងផ្នែកហិរញ្ញវត្ថុ។

Sabay)តើកញ្ញាគិតថា ភាពជាសហគ្រិនគឺជាអ្វីដែលអាចរៀនបាន ឬក៏ចាំបាច់ត្រូវមានដុងពីកំណើត?

កញ្ញា សុខ ផាណានីដា៖ ចំពោះទស្សនៈរបស់នាងខ្ញុំ នាងខ្ញុំគិតថាវារួមផ្សំគ្នាទាំងអស់។ ភាពជាសហគ្រិនយើងត្រូវតែរៀន ហ្វឹកហាត់លត់ដំឱ្យស្ទាត់ជំនាញ យល់ដឹងឱ្យបានច្រើន សន្សំជាគំនិតទុនឱ្យបានច្រើនដើម្បីវិនិយោគនៅពេលដែលយើងត្រៀមខ្លួនរួចជាស្រេច។ សម្រាប់កិច្ចការងារដូចនាងខ្ញុំ ដុងដែលជានិស្ស័យបានមកពីការចូលចិត្តដែលចេញពីសេចក្ដីស្រឡាញ់មានពីកំណើតបណ្ដុះជាកម្លាំងជំរុញនិងគំនិតនៃការច្នៃប្រឌិត។ គំនិតនៃការច្នៃប្រឌិតជាការពិតទៅ បានមកការសិក្សាដែលមិនចេះចប់ គឺវាមានច្រើនដូចជាដៃមឹកអ៊‍ីចឹង។ គំនិតច្នៃប្រឌិតមានលក្ខណៈទូលំទូលាយ នៅពេលដែលយើងកាន់តែឈានទៅមុខគឺកាន់តែរៀនបន្ថែម យើងមើលការរៀបមង្គលការរបស់បរទេស គឺយើងពិនិត្យមើលលើវប្បធម៌ប្រពៃណី ដោយមិនមែនយកតែគំនិតគេទេ គឺយើងមើលអ្វីដែលអាចផ្តល់បន្ថែមដល់កូនក្រមុំរបស់យើង ដូច្នេះការរៀនសូត្របន្ថែមជាដំណើរការដែលមិនចេះចប់។ អ្វីដែលសំខាន់សម្រាប់ក្នុងខ្សែបន្ទាត់ចុងក្រោយនេះគឺ នាងខ្ញុំចង់ផ្តល់ជូនអតិថិជនរបស់នាងខ្ញុំនូវការតុបតែងមង្គលការដែលមិនអាចបំភ្លេចបាននិងតម្លៃសមរម្យ ដែលនេះជាអ្វីដែលមានមនុស្សតិចណាស់អាចសម្រេចបាន។

Sabay)តើDADANA Flower Shop ធ្លាប់បានសហការជាមួយដៃគូអាជីវកម្មក្រៅប្រទេសដែរទេ?

កញ្ញា សុខ ផាណានីដា៖ ចាស៎! យើងមានការគាំទ្រនិងសហការ ជាមួយដៃគូអាជីវកម្មក្រៅប្រទេស ក៏ដូចប្រភពធនធានដែលជាសម្ភារៈនិងឧបករណ៍តុបតែងដែលចាំបាច់ គឺយើងបូកបញ្ចូលគ្នានូវគំនិងច្នៃប្រឌិតដើម្បីបង្កើតនូវការតុបតែងមួយដ៏អស្ចារ្យមិនថាពិធីមង្គលការនោះតូចឬធំប៉ុណា្ណនោះទេ។ ដូចកាលថ្មីៗនេះយើងបានរៀបចំពិធីមង្គលការនៅមុខប្រាសាទក្នុងខេត្តសៀមរាប គឺពិតជាពិធីដ៏អស្ចារ្យមួយដែលមានវង់ភ្លេងអ័រកេស្ត្រាវង់ធំ ដោយគ្រប់គ្នាមានអារម្មណ៍សប្បាយរីករាយពេញចិត្តជាខ្លាំងលើការដេគ័រតុបតែងដ៏ស្អាតប្លែក នេះហើយជាអ្វីដែលយើងគិតថាសេវាកម្មរបស់យើងមានភាពលេចធ្លោជាងអ្នកដទៃ។

Sabay) ទាក់ទងទៅនឹងទម្លាប់ផ្ទាល់ខ្លួនរបស់កញ្ញាវិញ តើកញ្ញាមានទម្លាប់ល្អអ្វីខ្លះ ដែលអាចចែករំលែកដល់យុវវ័យដទៃទៀត ដើម្បីឱ្យទទួលបានជោគជ័យដូចកញ្ញា?

កញ្ញា សុខ ផាណានីដា៖ សម្រាប់ទម្លាប់ល្អរបស់នាងខ្ញុំ ដែលត្រូវអនុវត្តសម្រាប់ជីវិតប្រចាំថ្ងៃនោះ គឺនាងខ្ញុំប្រកាន់ខ្ជាប់នូវភាពស្មោះត្រង់ សុក្រឹត និងការទទួលខុសត្រូវលើខ្លួនឯង និងចំពោះអ្នកដទៃ ក៏ដូចជាអតិថិជនរបស់នាងខ្ញុំ។ ទាំងអស់នេះ ហើយដែលនាំនាងខ្ញុំឱ្យមានថ្ងៃនេះ។

Sabay) តើក្នុងមួយជីវិតរបស់កញ្ញាធ្លាប់គិតថា អ្វីដែលជាកំហុសធំបំផុត ក្នុងនាមជាសហគ្រិនមួយរូប?

កញ្ញា សុខ ផាណានីដា៖ តាមពិតទៅបទពិសោធន៍ការងារ ឬកំហុសឆ្គងរបស់សហគ្រិននីមួយៗមានលក្ខណៈខុសៗគ្នា ប៉ុន្តែសម្រាប់នាងខ្ញុំនិយាយឱ្យចំទាក់ទងជាមួយនឹង Business របស់នាងខ្ញុំ កំហុសឆ្គងផ្ទាល់របស់ខ្លួនឯងគឺមិនបានបើក ដាដាណាឲ្យបានលឿនជាងនេះ។ សម្រាប់អ្នកអានបទសម្ភាសន៍នេះ អ្វីដែលនាងខ្ញុំសូមជូនជាគំនិត គឺសូមហ៊ានគិតស្រមៃធំនិងហ៊ានដេញតាមក្តីស្រមៃដោយមិនរួញរា( dare to dream big and go ahead chase after your dream don’t hesitate) មានអ្វីជាច្រើនទៀតដែលយើងត្រូវរៀនសូត្រ ហើយសូមកុំរំពឹងថាភាពជោគជ័យទទួលបានក្នុងពេលឆាប់រហ័សនោះ តែសូមហ៊ានដេញតាមក្តីស្រមៃដោយមិនរួញរា។

Sabay) តើអ្វីខ្លះ ជាឧបសគ្គកន្លងមក ដែលកញ្ញាបានជួបប្រទះ ហើយតើវានៅតែមានទៀតទេមកដល់ពេលបច្ចុប្បន្ននេះ?

កញ្ញា សុខ ផាណានីដា៖ ជាធម្មតា តែងតែមានកើតឡើងចំពោះក្រុមហ៊ុនសេវាកម្មដូចជារបស់យើងខ្ញុំ ប៉ុន្តែនាងខ្ញុំមិនហៅថា ជាឧបសគ្គនោះទេ ព្រោះអ្វីៗត្រូវការពេលវេលាដែលអាចធ្វើឲ្យអតិថិជនហ៊ានទទួលយកគំនិត គឺមានពេលខ្លះយើងត្រូវលើកគម្រោងស្នើចេញជារូបរាង ហើយអតិថិជនពិនិត្យមើលគំនិតនោះ ដោយពេលខ្លះសឹងតែគិតថាសំណើនេះ អាចនឹងមិនអាចធ្វើទៅបាន តែសម្រាប់យើងមានបទពិសោធន៍ជាច្រើនឆ្នាំក្នុងការតុបតែងពិធីមង្គលការដ៏អស្ចារ្យជាច្រើនកន្លងមក យើងមានភាពជឿជាក់និងច្បាស់លាស់ក្នុងការធ្វើការងារនោះ ឱ្យចេញមកល្អដូចតាមគំរោង។ ចំពោះឧបសគ្គភាគច្រើនកូនក្រមុំមានភាពងាយស្រួលក្នុងការប្រាស្រ័យទាក់ទង ប៉ុន្តែមិត្តភ័ក្តិ របស់គាត់ចូលរួមចំណែកក្នុងការបញ្ចេញយោបល់ ដោយនិយាយប្រាប់ពីនេះពីនោះណែនាំកូនក្រមុំដែលបង្អាក់ការសម្រេចចិត្តកូនក្រមុំមិនដឹងជាជ្រើសរើសយោបល់មួយណា ទាំងនេះហើយគឺជាឧបសគ្គដែលយើងបានជួបប្រទះ។

ជាទូទៅបន្ទាប់ពីចប់ពិធីមង្គលហើយអតិថិជនរបស់យើងមានក្តីសប្បាយរីករាយពេញចិត្តនឹងការងារដែលយើងផ្តល់ជូន មានពេលខ្លះអតិថិជនអញ្ជើញយើងជប់លៀង ប៉ាវញុំាអាហារក៏មាន។ ដូចេ្នះឧបសគ្គដែលយើងជួបប្រទះ ជាធម្មតាគឺមិនមែនមកពីអតិថិជនទេ បានមកពីមិត្តបំណងល្អរបស់គាត់។ ដូច្នេះជារួមមក បើសួរនាងខ្ញុំម្តងទៀតថានេះជាឧបសគ្គទេ? ចាស៎! ទាំងអស់នេះគឺពិតជាមិនមែនជាឧបសគ្គអ្វីទេ។

(សេវាកម្ម របស់ DADANA )

Sabay) ប្រសិនជាកញ្ញាមានឱកាស តើកញ្ញានឹងធ្វើអ្វីខ្លះឱ្យខុសពីមុន?

កញ្ញា សុខ ផាណានីដា៖ ប្រសិនបើមានឱកាស នាងខ្ញុំចង់បើកវិទ្យាស្ថានដើម្បីបង្រៀនដល់ពលរដ្ឋខ្មែរ ឱ្យចេះផ្នែកតុបតែងកាន់តែច្រើនឡើង។ កម្ពុជាយើងមានទំនៀមទម្លាប់និងវប្បធម៌ល្អដ៏សំបូរបែបមួយ ពិធីមង្គលការគឺជាពិធីសប្បាយរីករាយ ជាពិសេសនៅពេលដែលនាងខ្ញុំធ្វើដំណើរទៅតាមខេត្ត នាងខ្ញុំឃើញការរៀបចំតុបតែងពិធីមង្គលការ ពិតណាស់យើងយល់ពីឧបសគ្គរបស់ពួកគាត់ដោយភាគច្រើន ខ្ទង់ថវិកាចំណាយរបស់គាត់មានកំណត់ បើនាងខ្ញុំមានឱកាស គឺចង់បើកសាលាបង្រៀនជូនពួកគាត់នៅតាមខេត្តក្រុងនានា ដូច្នេះការតុបតែងដ៏ស្រស់ស្អាតនឹងកើតមានសម្រាប់ពិធីមង្គលការតាមគ្រប់ខេត្តក្រុង។

Sabay)តើទៅថ្ងៃអនាគតក្រុមហ៊ុនរបស់កញ្ញាមានគម្រោងយ៉ាងណាដែរ?

កញ្ញា សុខ ផាណានីដា៖ នាងខ្ញុំចង់ចែករំលែកជំនាញរបស់យើងក្នុងទម្រង់ទ្រង់ទ្រាយធំ នាងខ្ញុំចង់បង្កើតសាខាតាមខេត្តក្រុង ពីព្រោះមានអតិថិជនត្រូវការតុបតែងពិធីមង្គលការជាច្រើន គឺគាត់មករកយើងដល់ភ្នំពេញ យើងត្រូវធ្វើដំណើរទៅតាមខេត្ត ហេតុដូច្នេះទើបបានជានាងខ្ញុំចង់បណ្តុះបណ្តាលមនុស្សជាច្រើននៅតាមខេត្ត។ ហើយនាងខ្ញុំនឹងទទួលយកអ្នកស្ម័គ្រចិត្តធ្វើការទាក់ទងនឹងសិល្បៈនៃការតុបតែងផ្កានិងក្រណាត់ផងដែរ៕

អានអត្ថបទ៖ បេក្ខជន ៤ រូប ជាប់ជាសហគ្រិនឆ្នើមវ័យក្មេងរបស់កម្ពុជាប្រចាំឆ្នាំ ២០១៥

អត្ថបទ៖មៃ សុខលីម

រូបភាព៖ផ្តល់ឲ្យ