ខេមរៈ សិរីមន្ត ស្នើពលរដ្ឋខ្មែរទាំងមូលទុកខ្លួនឯងជាប៉ូលិសចរាចរ

2015-06-10 15:34:50
ចំនួនមតិ 0 | ចំនួនចែករំលែក 0

ចន្លោះមិនឃើញ

“ខ្ញុំចង់ឱ្យប្រជាពលរដ្ឋខ្មែរទាំងមូលទុកខ្លួនឯង ជាប៉ូលិសចរាចរម្នាក់ រាល់ពេលធ្វើដំណើរ"។ នេះជាការលើកឡើងតារាចម្រៀង ខេមរៈ សិរីមន្ត ក្នុងសន្និសីទសារព័ត៌មានប្រធានបទ "រួមគ្នាគោរព និងអនុវត្តន៍ច្បាប់ចរាចរណ៍នៅកម្ពុជា" នាក្រសួងព័ត៌មាន។

សិរីមន្ត បញ្ជាក់ថា ប្រជាពលរដ្ឋទាំងអស់គួរតែដឹង និងចូលរួមគោរពច្បាប់ចរាចរណ៍ទាំងអស់គ្នា។ ដើម្បីកាត់បន្ថយគ្រោះថ្នាក់ចរាចរណ៍នៅប្រទេសកម្ពុជា មិនអាចពឹងផ្អែកលើស្ថាប័នពាក់ព័ន្ធ និងសិល្បករ សិល្បការិនីនោះទេ ប៉ុន្តែទាមទារឱ្យមានការចូលរួមពីប្រជាពលរដ្ឋទាំងអស់គ្នា។ អតីតជនរងគ្រោះក្នុងគ្រោះថ្នាក់ចរាចរណ៍រូបនេះ បន្តម្យ៉ាងទៀតថា សូម្បីជនបរទេស ដែលកំពុងរស់អាស្រ័យនៅប្រទេសកម្ពុជា ក៏ត្រូវចូលរួមគោរពច្បាប់ប្រទេសកម្ពុជាផងដែរ។

តារាចម្រៀងល្បីខាងលើជឿជាក់ថា នៅពេលពលរដ្ឋម្នាក់ៗ ចាត់ទុកខ្លួនឯងជាសមត្ថកិច្ចចរាចររាល់ពេលធ្វើដំណើរហើយនោះ គ្រោះថ្នាក់ចរាចរណ៍ប្រាកដជាត្រូវបានកាត់បន្ថយ ហើយក៏មានន័យថា ការគោរពច្បាប់នៅប្រទេសកម្ពុជាកើនឡើងផងដែរ។ សិរីមន្ត ស្នើឱ្យមានការអនុវត្តទាំងអស់គ្នាចាប់ពេលនេះតទៅ ប្រសិនបើយល់ថា ទស្សនៈខាងលើត្រឹមត្រូវ។

ហើយរូបគេ ក៏នឹងចូលរួមច្រៀងក្នុងកម្មវិធីប្រគំតន្ត្រី ដ៏ធំមួយនាពេលខាងមុខ ដោយមិនយកប្រាក់កម្រៃ ដើម្បីផ្សព្វផ្សាយពីការគោរពច្បាប់ចរាចរណ៍ ដែលរៀបចំឡើងដោយ Home Media សហការជាមួយក្រសួងព័ត៌មាន។ ទោះបីជាកាលបរិច្ឆេទមិនទាន់បានប្រាប់ឱ្យដឹងយ៉ាងណាក្ដី ប៉ុន្តែតារាចម្រៀង ខេមរៈ សិរីមន្ត និងមានការចែកមួកសុវត្ថិភាពដល់អ្នកទស្សនាមួយចំនួនជាមួយ ខាន់ ជែមស៍ ទៀតផង៕

អានអត្ថបទ៖ តារាចាស់ថ្មី ចូលរួមសន្និសីទសារព័ត៌មាន ស្ដីពីចរាចរណ៍ម្សិលមិញ

អានអត្ថបទ៖ អតីតជយលាភីលេខ១ប្រឡងចម្រៀងទូទាំងប្រទេស រត់មកលេងកំប្លែង

អត្ថបទ៖ សំ ជំនាញ