ព្រះវិហារព្រះកែវមរកត កន្លែងទេសចរណ៍ដ៏ទាក់ទាញមួយនៅភ្នំពេញ

2015-06-21 15:08:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមកន្លែងទេសចរណ៍ជាច្រើនក្នុងប្រទេសកម្ពុជា ព្រះវិហារព្រះកែវមរកត ឬភ្ញៀវជាតិអន្តរជាតិស្គាល់ថា វត្តប្រាក់នោះ ជាតំបន់ទេសចរដ៏ទាក់ទាញមួយនៅភ្នំពេញ។ តើព្រះវិហារមានចំណុចទាក់ទាញអ្វីខ្លះ?

ទី១៖ ព្រះវិហារព្រះកែវមរកត កសាងឡើងពីឈើ ដោយព្រះបាទនរោត្ដមក្នុងឆ្នាំ១៨៩២ រួចសាងសង់ជាថ្មីពីថ្មឡើងវិញ ដោយព្រះបាទនរោត្តមសីហនុក្នុងឆ្នាំ ១៩៦២។ ព្រះវិហារនេះមានដំកល់ព្រះពុទ្ឋបដិមា១អង្គ ធ្វើអំពីត្បូងកែវដ៏មានតម្លៃ ដែលមានពណ៌ដូចមរកត។ ជាការពិត! រូបព្រះកែវមរកតពិត ត្រូវបានសៀមប្រមូលយកទៅជាមួយនឹងរូបព្រះគោ អំឡុងពេលវាយលុកបានក្រុងអង្គរក្នុងឆ្នាំ ១៤២០។ លើសពីនេះក្នុងព្រះវិហារនៅមានវត្ថុ និងព្រះពុទ្ឋបដិ មានតម្លៃជាច្រើនទៀត។

ទី២៖ បាតក្រោមនៃព្រះវិហារ មានក្រាលការ៉ូអំពីប្រាក់សុទ្ធ ដែលមានទំងន់១,១២៥គីឡូក្រាម ក្នុងមួយសន្លឹក ហើយមានចំនួនសរុប ៥,៣២៩សន្លឹកការ៉ូប្រាក់ ដូច្នេះហើយបរទេសនិយមហៅថាវត្តប្រាក់។

ទី៣៖ រូបគំនូរលើជញ្ជាំងថែវនៃព្រះវិហារ មានរូបគំនូរបុរាណ ដែលនិទានពីរឿងរាមកេរ្តិ៍ ពីដើមដល់ចប់។ គំនូរនេះត្រូវបានគូរឡើងនៅក្នុងឆ្នាំ១៩០៣-១៩០៤ ក្រោមការដឹកនាំរបស់ ឧកញ៉ា ទេពនិមិត្ត ឆ្លាក់រួមជាមួយវិចិត្រករខ្មែរចំនួន៤០នាក់។ គំនូរនេះចាប់ផ្ដើមរឿងពីថែវខាងកើត ផ្នែកខាងត្បូង ទៅព័ទ្ធមួយជុំថែវទាំងមូល ដែលមានប្រវែង៦៤២ម៉ែត្រ និងកំពស់៣ម៉ែត្រ។ អត្ថបទលំអិតសូមចុចត្រង់នេះ!

ប្រវត្តិវត្តព្រះកែវមរកត វត្តព្រះកែវមរកត ត្រូវបានកសាងឡើងតាំងពីឆ្នាំ១៨៩២ ដល់ឆ្នាំ១៩០២ តាមលំនាំស្ថាបត្យកម្មខ្មែរ ហើយត្រូវរុះរើសាងសង់ជាថ្មីឡើងវិញ នៅក្នុងឆ្នាំ១៩៦២។ វត្តនេះពីដើមមានឈ្មោះហៅថា វត្តឧបោសថរតនារាម ដោយមកពីព្រះមហាក្សត្រទ្រង់យកទីកន្លែងនេះ កាន់ឧបោសថសីលជារៀងរាល់ថ្ងៃ។ ក្រៅពីនេះក៏មានព្រះវត្តមានព្រះរាជ វង្សានុវង្ស និង នាម៉ឺនសព្វមុខមន្ត្រីក៏បានប្រារព្ធពិធីបុណ្យផ្សេងៗតាមទំនៀមទម្លាប់ព្រះពុទ្ធសាសនានៅទីនេះដែរ។

នៅវត្តនេះពុំមានព្រះសង្ឃគង់នៅទេ គឺមានតែព្រះបាទសម្ដេចព្រះនរោត្ដម សីហនុ មួយអង្គប៉ុណ្ណោះ គង់នៅក្នុងពេលព្រះអង្គសាងព្រះផ្នួស រយៈពេលមួយព្រះវស្សា (ថ្ងៃទី១៤កើត ខែទុតិយសាធ ឆ្នាំកុរ នព្វស័ក ព.ស២៤៩០ ត្រូវនឹងថ្ងៃទី៣១ ខែកក្កដា ឆ្នាំ១៩៤៧)។ នៅពេលណាដែលព្រះរាជាទ្រង់ប្រារព្ធព្រះរាជពិធីតាមព្រះពុទ្ធសាសនា គឺត្រូវនិមន្តព្រះសង្ឃគង់ពីវត្តដទៃទៀតក្នុងរាជធានីភ្នំពេញ ដូចជានៅវត្តឧណ្ណាលោម និងវត្តបទុមវត្តីជាដើម។

វត្តនេះស្ថិតនៅភាគខាងត្បូងនៃបរិវេណព្រះបរមរាជវាំង ដែលហ៊ុំព័ទ្ធទៅដោយថែវរាងខ្ពស់ស្រឡះ។ នៅតាមបណ្ដោយថែវ គេធ្លាប់បានប្រើប្រាស់ជាថ្នាក់រៀនភាសាបាលី សម្រាប់ព្រះសង្ឃដែលគង់នៅតាមវត្តក្នុងរាជធានីភ្នំពេញ និងតាមបណ្តាខេត្តមួយចំនួន មុនពេលបង្កើតសាលាបាលីនៅភ្នំពេញ នាថ្ងៃទី១៦ខែធ្នូឆ្នាំ១៩៣០៕

ចុចអាន៖ តំបន់ទេសចរណ៍៥កន្លែងទាក់ទាញបំផុតនៅកំពង់ចាម

ចុចអាន៖ រូងព្រះច័ន្ទ ភ្នំកំពង់ត្រាច ទីឋានដ៏ស្រស់ស្អាត

អត្ថបទ៖ អ៊ុំ សុភក្តិ ប្រភព និង រូបថត៖ wikipedia