ស្ដាប់និស្សិត និង អ្នកជំនាញនិយាយពីរឿងដាក់ CV ធ្វើការ

2015-06-23 21:13:07
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតជាច្រើនដឹង និង ស្គាល់ថា ក្នុង CV ត្រូវមានអ្វីខ្លះ ប៉ុន្តែពួកគេនៅតែបារម្ភ និង ស្រពិចស្រពិល មិនដឹងរៀបចំ CV បែបណាឲ្យគេឃើញហើយ ពេញចិត្តហៅសម្ភាស។

និស្សិត ៤ នាក់ បានឲ្យ Sabay ដឹងថា ការសរសេរ CV សម្រាប់ពួកគេ មិនសូវជាជួបការលំបាកណាស់ណាទេ ដោយសារកន្លងមកពួកគេបានទទួលការណែនាំរួមទាំងមើលគំរូតាមពីរៀមច្បង សាស្ត្រាចារ្យ និង Internet។ តែអ្វីដែលលំបាកខ្លាំងបំផុតគឺ ស្មុគស្មាញមិនច្បាស់ថា CV បែបនេះមានលក្ខណៈត្រឹមត្រូវអាចឲ្យក្រុមហ៊ុនចាប់អារម្មណ៍ហៅមកបំពេញការងារបានឬក៏អត់។

ចំណែក លោក លន់ ដានេ ប្រធានផ្នែកគ្រប់គ្រងធនធានមនុស្សនៅក្រុមហ៊ុន RMA Cambodia និយាយថា នៅក្នុងក្រុមហ៊ុនលោក មានមុខតំណែងជាច្រើនជាង ៣០០ កំពុងត្រូវការបុគ្គលិក ប៉ុន្តែ អ្វីដែលលោកផ្ដោតខ្លាំងជាងគេ គឺ CV ដែលបង្ហាញពីអត្តចរិតល្អរបស់បុគ្គល។

លោក បន្តថា "ខ្ញុំសូមជូនយោបល់ឲ្យប្អូនៗទាំងអស់ ចេះបង្កើតអីខុសពីគេ។ យើងរៀនចប់ដូចគ្នា តែយើងគួរសរសេរ CV បានពាក់ព័ន្ធនឹងសង្គម និង ស្ថាប័នណាមួយ"។ វាជាការបង្ហាញក្នុងអំលុងពេលសិក្សា ក្រៅពីរៀន គាត់ក៏ឆ្លៀតពេលផ្សារភ្ជាប់ខ្លួននឹងសកម្មភាពខាងក្រៅល្អៗជាមួយសង្គម និង ការចូល Internship នៅស្ថាប័នណាមួយ ទោះក្នុងរយៈពេលខ្លីក៏ដោយ ដែលជាសកម្មមួយបង្ហាញថា គាត់ចិត្តរៀនអ្វីដែលថ្មី ដែលមិនមែនមានតែទ្រឹស្ដីក្នុងសាលា។

ចំពោះ អ្នកស្រី ថន ថាណារ៉ែន អ្នកពិគ្រោះខាងធនធានមនុស្សនៅក្រុមហ៊ុន Job Cambodia បានផ្ដល់ជាយោបល់ថា កន្លងមកអ្នកស្រីសង្កេតឃើញថា ការសរសេរ CV របស់សិស្ស និស្សិតមួយចំនួននៅមានភាពខ្វះចន្លោះផងដែរ។ ដូចជា លេងពណ៌ស្ទីលច្រើនពេក ដាក់លេខទូរសព្ទទំនាក់ទំនងមិនត្រឹមត្រូវ និង ការសរេសរ CV ច្រើនទំព័រពេក ព្រមទាំងការសរសេរបន្លំព័ត៌មាន។ សិស្ស និស្សិតគួរតែរៀបចំ CV ឲ្យមានលំដាប់លំដោយ ខ្លីៗដោយសរសេរអ្វីដែលខ្លួនអាចធ្វើបាន ដើម្បីចៀសវាងឱកាសបាត់បង់នូវការហៅសម្ភាសពីក្រុមហ៊ុន៕