Ronaldo៖ ខ្ញុំចង់ឃើញកូនប្រុសមានអនាគតជាកីឡាករបាល់ទាត់ឬល្អជាងនេះ

2015-06-26 17:54:55
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo បាននាំកូនប្រុសសំណព្វចិត្ត Cristiano Jr ទៅដើរលេងនៅ Miami សហរដ្ឋអាមេរិក។ ក្នុងដំណើរកម្សាន្តនេះដែរ ខ្សែប្រយុទ្ធរបស់ Real Madrid រូបនេះបាននិយាយថាខ្លួនចង់ឃើញកូនប្រុស បានក្លាយជាកីឡាករបាល់ទាត់ម្នាក់ឬល្អជាងនេះប្រសិនបើអាចទៅថ្ងៃអនាគត។

Ronaldo បានចំណាយពេលច្រើនជាមួយកូនប្រុសរបស់លោកក្នុងវិស្សមកាលរដូវក្ដៅនេះ ពោលគឺមិនសូវជាឃើញទៅដើរលេងជាមួយតារាស្រីស្អាតៗ រូបណាឡើយ។ ចំពោះរឿងនេះ បុរសវ័យ៣០ឆ្នាំរូបនេះបានឆ្លើយថារូបលោកចង់មានពេលវេលាឱ្យបានច្រើនជាមួយ Cristiano Jr ដើម្បីផ្ដល់ភាពកក់ក្ដៅដល់លកូន។ ណាមួយលោកដឹងច្បាស់ពីអារម្មណ៍ដែលមិនមានឪពុកនៅក្បែរ ដូច្នេះអតីតកីឡាករ Man Utd រូបនេះនឹងមិនឱ្យអារម្មណ៍នោះកើតមានចំពោះកូនគេឡើយ (ឪពុក Ronaldo បានស្លាប់ក្នុងគ្រោះថ្នាក់ចរចាតាំងពីរូបគេមានអាយុ១៩ឆ្នាំ)។

ទៅថ្ងៃអនាគតវិញ ខ្សែប្រយុទ្ធមុតស្រួចរបស់ក្រុមជម្រើសជាតិព័រទុយហ្គាល់រូបនេះចង់ឃើញកូនប្រុសសម្លាញ់របស់ខ្លួនអាចក្លាយជាកីឡាករល្អមួយរូបដែរ ប៉ុន្តែរឹតតែល្អថែមទៀត ប្រសិនបើកុមារាវ័យ៥ឆ្នាំរូបនេះអាចធ្វើអ្វីលើសពីលេងបាល់ទាត់ដូចឪពុកទៀតនោះ។

រហូតមកដល់ពេលនេះ ម្ដាយរបស់ Cristiano Jr នៅមិនទាន់មាននរណាម្នាក់បានដឹងច្បាស់ថាជាស្ត្រីរូបណានៅឡើយទេ ប៉ុន្តែមានរបាយការណ៍មួយកាលពីឆ្នាំ២០១១បានបញ្ជាក់ថាកុមារារូបនេះជាកូនរបស់និស្សិតស្រីអង់គ្លេសម្នាក់ ដែលត្រូវបាន Ronaldo លាក់បាំងពីអ្នកកាសែត ដោយផ្ដល់ប្រាក់១៥លានដុល្លារអាមេរិកដើម្បីទិញសិទ្ធិជាឪពុកម្ដាយដាច់តែម្នាក់ឯងតែម្ដង៕