ស៊ុន សាមឌី៖ "ទោះពិបាកទ្រាំ ខ្ញុំនឹងប្រឹងដើម្បីខ្លួនឯង”

2015-06-29 23:02:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ខុសប្លែកពីយុវជនដទៃ ដែលទទួលបានការឧបត្ថម្ភគាំទ្រស្ទើរសព្វបែបយ៉ាង ដើម្បីការសិក្សាយុវជន ស៊ុន សាមឌី កំពុងប្រឈមការខ្វះខាតទាំងសម្ភារៈសិក្សា ការហូបចុក និងការស្នាក់នៅ។ បច្ចុប្បន្នយុវជនរូបនេះបានការសន្ដោសពីថ្នាក់ដឹកនាំសាលាឱ្យស្នាក់នៅបន្ទប់តូចមួយនៃវិទ្យាល័យក្រុងព្រះសីហនុ ក្នុងទីរួមខេត្តព្រះសីហនុ។

មែនទែនទៅ សាមឌី មានទីកន្លែងកំណើត នៅភូមិស្រម៉រ ឃុំទឹកជ្រៅ ស្រុកតំបែរខេត្តត្បូងឃ្មុំឯណោះទេ តែត្រូវឪពុក ម្ដាយប្តូរឱ្យមករស់នៅជាមួយម្តាយមីង និងរៀនសូត្រក្នុងទីរួមខេត្តព្រះសីហនុពីរនាក់ប្អូនស្រីបង្កើត។ សាមឌី និងប្អូនស្រីដំបូង បានចូលរៀននៅសាលាឯកជនមួយក្នុងខេត្តព្រះសីហនុ ប៉ុន្តែដោយសារស្ថានភាពគ្រួសារធ្លាក់ចុះ មិនមានលទ្ធភាពបង់ថ្លៃសិក្សានៅសាលាឯកជនក៏ប្តូរមករៀនសាលារដ្ឋវិញ។

សិស្សថ្នាក់ទី១១ នៃវិទ្យាល័យក្រុងព្រះសីហនុបានរៀបរាប់ថា ខ្លួនបានសុំម្ដាយមីងរស់នៅខាងក្រៅ និងស្វែងរកការងារធ្វើដោយខ្លួនឯង ដើម្បីផ្គត់ផ្គង់ដល់ការហូបចុក និងការសិក្សា ខណៈជីវភាពម្តាយមីងក៏មានភាពយ៉ាប់យ៉ឺនដែរ។ "ការងារខ្ញុំជាសន្តិសុខចាប់ពីម៉ោង ៦ ល្ងាចដល់ម៉ោង ៦ព្រឹក បានជិត១ឆ្នាំដែរក៏លាឈប់ ព្រោះខួរក្បាលស្ពឹកពេករៀនអត់កើត ឡានចេញចូលម៉ាយប់ទល់ភ្លឺអត់បានសម្រាកសោះ”។

ក្រោយលាឈប់ពីការងារ សាមឌី កំពុងប្រឈមនឹងបញ្ហាធំៗ ចំនួនបី ក្នុងនោះ ការហូបចុក សម្ភារៈ សិក្សា និងសំលៀកបំពាក់។ "រាល់ថ្ងៃ ខ្ញុំរកបានព្រឹកខ្វះល្ងាច បានល្ងាចខ្វះព្រឹក ចំពោះខោអាវវិញមានតែបួនកំប្លេប៉ុណ្ណោះ”។

ទោះប្រឈមភាពខ្វះខាតក៏ពិតមែន តែការសិក្សារបស់ សាមឌី ទទួលបានលទ្ធផលល្អបង្គួរ ហើយទៅថ្ងៃអនាគតយុវជនរូបនេះមានបំណងចាប់យកអាជីពជាគ្រូពេទ្យ បើសិនជាប្រលងជាប់សញ្ញាបត្រមធ្យមសិក្សាទុតិយភូមិ(បាក់ឌុប)។ សាមឌី កំពុងប្រឹងរៀនគួរបន្ថែម ក្នុងនោះមានមុខវិជ្ជា គណិត គីមី និងភាសាចិន ហើយការសិក្សានេះលោកគ្រូ-អ្នកគ្រូមិនតម្រូវឱ្យបង់ថ្លៃសិក្សានោះឡើយ។ "បច្ចុប្បន្ន ខ្ញុំអត់ដឹងថាអនាគតនឹងទៅជាយ៉ាងណានោះទេ ព្រោះរាល់ថ្ងៃលំបាកយ៉ាងហ្នឹង ខ្ញុំនឹងប្រឹងដើម្បីខ្លួនឯង ខ្ញុំស្រលាញ់អាជីពជាគ្រូពេទ្យ។ ដូច្នេះហើយទើបខ្ញុំប្រឹងរៀន គណិត និងគីមី ហើយសល់ម៉ោងខ្ញុំរៀនភាសាចិន។ដូច្នេះបើមុជមិនជ្រៅទៅមិនឆ្ងាយទេ គ្រាន់បានភាសាចិនរកការងារធ្វើថ្ងៃក្រោយដែរ”៕