តារា​ឆ្នើម​ Neymar របស់​ក្លិប​ FC Barcelona ​បាន​លើក​ឡើង​ថា ខ្លួន​ចង់​លើក​ពាន​៦ ​នៅ​រដូវ​កាល​ថ្មី​ ២០១៥/១៦ ខាង​មុខ​នេះ ​បន្ទាប់​ក្លិប​ឈ្នះ​ពាន​៣​រដូវ​កាល​មុន។

Barcelona ​បាន​ឈ្នះ​ពាន​ La Liga, UEFA Champions League និង​ Copa del Rey ​កាល​រដូវ​កាល​២០១៤/១៥ ខណៈ​ដែល​ Neymar ​រក​គ្រាប់​បាល់​បញ្ចូល​ទី​​សរុប​ទាំង​អស់​បាន​ ៣៩​គ្រាប់។

យ៉ាងណាក្ដី ប្រធាន​ក្រុម​ជម្រើស​ជាតិ​សំបា​ប្រេស៊ីល​​រូប​នេះ មិន​ទាន់​ស្កប់ស្កល់​នៅ​ឡើយ​ ដោយ​ចង់​ឈ្នះ​ទាំង​ពាន​រង្វាន់​ European Super Cup, Spanish Super Cup និង​ Club World Cup បន្ថែម​ទៀត​ នៅ​រដូវ​កាល​ថ្មី។

​ខ្សែ​បម្រើ​ប្រយុទ្ធ​វ័យ​២៣​ឆ្នាំ ​បាន​ប្រាប់​ដល់​ Sport ថា៖ "ខ្ញុំ​មិន​ដែល​បាត់បង់​សេចក្ដី​ស្រេកឃ្លាន​ឡើយ។ ​រដូវ​កាល​នេះ​​យើង​ធ្វើ​បាន​អស្ចារ្យ​មិន​គួរ​ឲ្យ​ជឿ ប៉ុន្តែ​ខ្ញុំ​តែង​តែ​ចង់​បាន​ជាង​នោះ​ទៀត។ ខ្ញុំ​មិន​ទាន់​ស្កប់ស្កល់​ទេ។ ខ្ញុំ​ចង់​​ឈ្នះ​ La Liga, UEFA Champions League និង​ Copa del Rey ទៀត។ ពាន​៣ គឺ​ជា​ពាក្យ​ល្អ ប៉ុន្តែ​ខ្ញុំ​ចង់​ស្គាល់​ពាក្យ​ថ្មី​គឺ​​ ពាន​៦។ នេះ​ជា​គោលដៅ​របស់​យើង​ ហើយ​យើង​នឹង​ត្រៀម​ខ្លួន​ឲ្យ​បាន​រួច​រាល់"៕

​ចុះ​ប្រិយមិត្ត​ជឿ​ថា Neymar អាច​ឈ្នះ​ពាន​៦ ជាមួយ​​ Barca ​បាន ឬ​អត់​រដូវ​កាល​ថ្មី?

-ចុចអាន៖ Neymar ជួយ​ក្មេងៗ​ពិការ​​ជើង ឲ្យ​​អាច​ទាត់បាល់​​​បាន​លើក​ដំបូង​ក្នុង​ជីវិត

​ប្រែ​សម្រួល៖ វិន ជីវ័ន្ត ​ប្រភព៖ goal