ខ្សែជីវិតពិតក្មេងប្រុសដ៏កម្សត់ ខំប្រឹងសិក្សាក្រោមពន្លឺភ្លើងហាង
- 2015-07-12 16:47:14
- ចំនួនមតិ 0 | ចំនួនចែករំលែក 0
ខ្សែជីវិតពិតក្មេងប្រុសដ៏កម្សត់ ខំប្រឹងសិក្សាក្រោមពន្លឺភ្លើងហាង
ចន្លោះមិនឃើញ
រូបថតប្រកបទៅដោយអត្ថន័យដ៏ជ្រាលជ្រៅមួយសន្លឹក បានធ្វើឲ្យរំជួលចិត្តមនុស្សរាប់លាននាក់នៅលើពិភពលោកត្រឹមពេលយ៉ាងខ្លី។ មិនមែនជារូបដ៏ស្រស់បំព្រង ក៏មិនមែនជារូបលក្ខណៈអាជីពអ្វីដែរ ប៉ុន្តែជារូបថតក្មេងប្រុសក្រីក្រម្នាក់ ខំប្រឹងជម្នះវាសនាលុតជង្គង់ធ្វើកិច្ចការសាលាក្រោមពន្លឺភ្លើងព្រាលៗនៃហាងអាហារមួយ។ គ្រាន់តែឃើញទិដ្ឋភាពនេះក៏ធ្វើឲ្យមនុស្សជាច្រើនបាក់ចិត្តអាណិតទៅហើយ ចុះទម្រាំខ្សែជីវិតពិតរបស់គេ តើកម្សត់ប៉ុណ្ណាទៅ?
ក្មេងប្រុសដ៏កម្សត់រូបនេះមានឈ្មោះពិត Daniel Cabrera អាយុ ៩ឆ្នាំ និងកំពុងរស់នៅក្នុងរដ្ឋធានីម៉ានីលជាមួយម្ដាយ។ មនុស្សជាច្រើននៅលើពិភពលោកបានស្គាល់រូបគេ បន្ទាប់ពីនិស្សិតផ្នែកវេជ្ជសាស្ត្រម្នាក់ឈ្មោះ Joyce Torrefrancaបង្ហោះរូបបង្ហាញពីសកម្មភាពលុតជង្គង់ធ្វើកិច្ចការសាលា ក្រោមពន្លឺភ្លើងព្រាលៗនៃហាងអាហារ McDonald ចូលក្នុងបណ្ដាញសង្គម។ ក្រោយមក សារព័ត៌មានជាច្រើន បានយកទៅចុះផ្សាយព្រោងព្រាត ឆក់យកបេះដូងមនុស្សរាប់លាននាក់ទូទាំងពិភពលោក។
បើតាមប្រភពព័ត៌មានបានឲ្យដឹងថា Daniel ពុំមានផ្ទះនៅទេ ហើយរាល់ថ្ងៃរូបគេកំពុងស្នាក់អាស្រ័យជាមួយម្ដាយមេម៉ាយក្នុងខ្ទមតូចមួយក្រោយហាងអាហារដែលគាត់កំពុងធ្វើការ។ ចំណែកផ្ទះដែលធ្លាប់រស់នៅពីមុនមក ត្រូវអគ្គីភ័យលេបត្របាក់រាបដល់ដីកាលពីប្រាំឆ្នាំមុន។
នៅក្នុងខ្ទមតូចនោះ Daniel និងបងប្អូនស្រីផ្សេងទៀត ត្រូវគេងលើកៅអីឈើ។ អ្វីដែលរឹតតែសង្វេគ គឺខ្ទមនោះគ្មានជញ្ជាំងពេញលេញ គ្មានអគ្គិសនីប្រើប្រាស់ ខណៈរដូវរងាចូលមកដល់ត្រជាក់ស្ទើរទ្រាំពុំបាន។ ម្ដាយរបស់ Daniel អ្នកស្រី Christina Espinoza បានប្រឹងធ្វើការដោយមិនគិតពីក្ដីនឿយហត់ ដើម្បីចិញ្ចឹមកូនទាំងបីនាក់ក្នុងបន្ទុក។
ស្ត្រីមេម៉ាយរូបនេះ ចាប់ផ្ដើមក្លាយជាអ្នកចិញ្ចឹម Daniel តែម្នាក់ឯង បន្ទាប់ពីប្ដីស្លាប់ដោយសារជំងឺជំងឺរាគធ្ងន់ធ្ងរក្នុងពន្ធនាគារកាលពីបីឆ្នាំមុន។ ទោះយ៉ាងណា អ្នកស្រីមិនបានបញ្ជាក់ថា ប្ដីជាប់ពន្ធនាគារដោយសារបទល្មើសអ្វីនោះទេ។ ក្រៅពីធ្វើការឲ្យហាងអាហារ អ្នកម្ដាយរូបនេះ តែងស្វែងរកការងារបន្ថែមដើម្បីទប់ទល់ការចំណាយប្រចាំថ្ងៃ។
អ្នកស្រី Christina រកកម្រៃបានតិចតួចបន្ថែមពីការលក់បារី និងស្ករគ្រាប់ ហើយឆ្លៀតពេលបោកសំលៀកបំពាក់ឲ្យគេទៀត។ ទោះយ៉ាងណាកូនអ្នកស្រីមិនបានបោះបង់ចោលការសិក្សាទេ ហើយកូនប្រុស Daniel ត្រូវដើរចម្ងាយមួយគីឡូម៉ែត្ររៀងរាល់ព្រឹក ដើម្បីចូលរៀននៅម៉ោង៨។
អ្វីដែលកាន់តែពិបាក គឺ Daniel ត្រូវប្រុងប្រយ័ត្នជាប់ជានិច្ចចំពោះរបស់ប្រើប្រាស់ ព្រោះមានខ្មៅដៃតែពីរសម្រាប់រៀន ហើយមួយក្នុងចំណោមនោះមានគេលួចបាត់។ ចំណែកនៅផ្ទះ Daniel គ្មានអគ្គិសនីសម្រាប់រៀនដូចសិស្សដទៃឡើយ ដូចនេះហើយទើបរូបគេជ្រើសរើសពន្លឺដ៏ស្រទន់នៃហាងអាហារ McDonald ជាយានចម្លងអនាគត។ នៅពេលមិត្តភ័ក្ដិថ្នាក់ទី៣ផ្សេងទៀតកំពុងលេងបាល់នាពេលល្ងាច Daniel តែងយកពេលនេះទៅធ្វើកិច្ចការសាលាក្រោមពន្លឺដែលជះចេញមកពីហាងអាហារ។
ម្ដាយរបស់ Daniel បានប្រាប់អ្នកយកព័ត៌មានដោយមោទនភាពថា "គេ(Daniel) ជាក្មេងដែលប្រឹងរៀន និងប្ដេជ្ញាខ្ពស់... គេតែងតែទទូចចង់ទៅសាលា បើទោះគ្មានលុយញ៉ាំបាយថ្ងៃ ព្រោះខ្ញុំគ្មានលុយឲ្យក្ដី"។ អ្នកស្រីបានបន្តទៀតថា Daniel តែងនិយាយ "ម៉ាក់ម៉ាក់! ខ្ញុំមិនចង់នៅក្រទេ... ខ្ញុំចង់សម្រេចក្ដីស្រមៃរបស់ខ្ញុំ"។
ក្ដីស្រមៃរបស់ Daniel គឺចង់ក្លាយជាវេជ្ជបណ្ឌិត ឬមន្ត្រីប៉ូលិសម្នាក់ ដើម្បីជួយប្រទេសហ្វីលីពីនទាំងមូល។ ទោះយ៉ាងណា បន្ទាប់ពីរូបភាពរបស់គេចែកចាយពេញបណ្ដាញសង្គមមក មានមនុស្សជាច្រើនអាណិតចង់ជួយ។ លើសពីនេះ Daniel ថែមទាំងទទួលបានអាហារូបករណ៍សិក្សារហូតដល់សាកលវិទ្យាល័យ និងជំនួយចំពោះគ្រួសារផងដែរ៕
ចុចអាន៖ មួយសន្លឹកខ្លោចចិត្ត! ក្មេងអនាថាធ្វើកិច្ចការសាលាក្រោមពន្លឺភ្លើងភោជនីយដ្ឋាន
ប្រែសម្រួល៖ គង់ វិសាល ប្រភព៖ dailymail