សាលាភាពយន្តដែលមិនធ្លាប់មានក្នុងប្រវត្តិសាស្ត្រកម្ពុជា ត្រៀមនឹងបង្ហាញខ្លួនចុងខែនេះ

2015-07-17 18:57:07
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាភាពយន្តដែលមិនធ្លាប់មានក្នុងប្រវត្តិសាស្ត្រកម្ពុជា ត្រៀមនឹងបង្ហាញខ្លួនបង្ហាញខ្លួននាចុងខែកក្កដានេះហើយ។ នេះបើតាមលោកគ្រូ អោក ប៊ុនធឿន ព្រឹទ្ធបុរសរង មហាវិទ្យាល័យសិល្បៈនាដសាស្ត្រ។

លោកគ្រូ អោក ប៊ុនធឿន ព្រឹទ្ធបុរសរង មហាវិទ្យាល័យសិល្បៈនាដសាស្ត្រ

វត្តមានដំបូងបំផុតរបស់សាលាភាពយន្តកម្ពុជានេះ ក្រោមគំនិតផ្ដួចផ្ដើមដោយ ផលិតកម្មតាន់តាន់ ផលិតកម្មរ័ត្នកញ្ញា សហការជាមួយមហាវិទ្យាល័យសិល្បៈនាដសាស្ត្រ និងសាកលវិទ្យាល័យភូមិន្ទវិចិត្រសិល្បៈ។ លោក អោក ប៊ុនធឿន ថ្លែងថា "រាប់តាំងពីមុនសម័យប៉ុលពត យើងមិនធ្លាប់មានទេសាលាភាពយន្ត អីចឹងនេះ គឺជាលើកទី១។ ហើយជំហានដំបូងដូច្នេះយើងបង្រៀនតែ៣ខែទេ យើងនឹងបង្រៀនតែលើការសម្ដែងសិន ពេលក្រោយបង្រៀនលើជំនាញផ្សេងៗទៀត"។

មានមុខវិជ្ជាក្នុងផ្នែកសម្ដែងចំនួន១០ ត្រូវបានដាក់បញ្ចូលក្នុងកម្មវិធីសិក្សារបស់សាលាភាពយន្តដែលត្រៀមនឹងកើត។ មុខវិជ្ជាទាំងនោះមាន ១.សម្ដែងភាពយន្ត(កាយវិការ និងពាក្យសំដី) ២.ប្រវត្តិភាពយន្ត និងប្រវត្តិតារាសម្ដែង ៣.វិភាគរឿងភាពយន្ត ៤.ក្បាច់គុនខ្មែរ និងបរទេស ៥.កំណាព្យ និងចម្រៀង ៦.កីឡា និងកាយសម្ព័ន្ធសិល្បៈ ៧.វិចេយ្យកោសល្យ(ការសម្ដែងពាក្យសំដីដោយឥតព្រាងទុក ប្រកបដោយទេពកោសល្យ) ៨.របាំបុរាណ និងសម័យ ៩.សីលធម៌ជំនាញ និងសង្គម និងទី១០.របាំបាល់ឡេ។ ទាំង១០ជំនាញនេះ នឹងសិក្សារយៈពេល៣ខែ។

លោកគ្រូ អោក ប៊ុនធឿន ដែលបានបញ្ចប់ការសិក្សាផ្នែកផលិតភាពយន្តនៅកូរ៉េខាងត្បូង ថ្លែងថា ការមកដល់របស់សាលាភាពយន្តខាងមុខនេះ គឺដើម្បីតម្រង់ទិសដល់សិល្បករដែលមានទេពកោសល្យហើយ តែមិនទាន់គ្រប់ជ្រុងជ្រោយ និងបណ្ដុះយុវជន យុវនារីជំនាន់ក្រោយឲ្យក្លាយជាសិល្បករអាជីព មានជំនាញច្បាស់លាស់ ត្រៀមសម្រាប់ការមកដល់នៃសមាហរណកម្មអាស៊ាន។

ដូច្នេះលោកគ្រូ សំណូមពរសិល្បករ យុវជន យុវនារីដែលមាននិស្ស័យចង់ក្លាយជាសិល្បករសម្ដែងអាជីពរួសរាល់មកចុះឈ្មោះចូលសិក្សាទាំងអស់គ្នា។ ចំពោះពាក្យសម្រាប់ចុះឈ្មោះ មានចែកជូនដោយឥតគិតថ្លៃ ដោយប្រិយមិត្ត រួមទាំងសិល្បករ សិល្បការិនី អាចទៅទទួលយកនៅសាកលភូមិន្ទវិចិត្រសិល្បៈ។

ពិធីការិនី ខៀវ សានសាណា

សិល្បករសិល្បការិនីមួយចំនួនមាន ខៀវ សានសាណា លាង ឧត្តម ថន ដារ៉ា ហេង ស្រីពេជ្រ និង ទេព សេរីវិជ្ជរ៉ា ដែលមានវត្តមានក្នុងសន្និសីទសារព័ត៌មានម្សិលមិញ បានឲ្យដឹងព្រមគ្នាថា ពួកគេរីករាយចំពោះការមកដល់នៃសាលាភាពយន្តកម្ពុជាគ្រានេះ។ សាណា ថ្លែងថា "នៅពេលដឹងថាមានសាលាភាពយន្ត នាងខ្ញុំចាប់អារម្មណ៍ ហើយគិតថាធ្វើជាពិធីការិនី១២ឆ្នាំហើយ ប្រហែលជាល្មមដល់ពេលដែលខ្ញុំចាប់យកពិសោធន៍ថ្មី...អីចឹងហើយខ្ញុំមកទីនេះ ដើម្បីមើលថា មានបង្រៀនអ្វីខ្លះ ហើយខ្ញុំនឹងឆ្លៀតរៀន"។

តារាសម្ដែង លាង ឧត្តម និង ហេង ស្រីពេជ្រ

ជាតារាសម្ដែងម្នាក់ជិត១០ឆ្នាំ លាង ឧត្ដម បានប្រាប់ថា លោកក៏មកទទួលសាកលវិទ្យាល័យភូមិន្ទវិចិត្រសិល្បៈដើម្បីទទួលពាក្យដែរ។ "អ្នកសិល្បៈយើងភាគច្រើន គឺចូលសិល្បៈតាមៗគ្នា អត់បានឆ្លងការបណ្ដុះបណ្ដាលពិតប្រាកដទេ អីចឹងខ្ញុំសង្ឃឹមថា សាលានឹងផ្ដល់នូវចំណេះដឹងផ្នែកសិល្បៈច្បាស់លាស់ដល់ខ្ញុំ។ ហើយកាលណាសិល្បករគ្រប់គ្នាមានសញ្ញាប័ត្រ មានជំនាញពិតប្រាកដ គឺលើកតម្លៃសិល្បៈយើងទាំងមូល"។

សុះ ម៉ាច ប្រធានសមាគមសិល្បករខ្មែរ ក៏បានសាទរចំពោះវត្តមានដំបូងបំផុតរបស់សាលាភាពយន្តកម្ពុជាក្នុងសិល្បៈភាពយន្តខ្មែរ។ ប្រធានសមាគមសិល្បៈរូបនេះ លើកឡើងថា នេះជាបំណងប្រាថ្នារបស់លោកជាយូរមកហើយ។

"ប្រទេសជិតខាងយើងគេសាលាបង្រៀនសិល្បៈអស់ហើយ ហើយនេះជាមូលដ្ឋានគ្រឹះរបស់សិល្បៈ។ ងាកមកសិល្បករយើងវិញ ខ្លះក៏ធ្លាប់បានបណ្ដុះបណ្ដាល ខ្លះក៏នៅ អីចឹងការសម្ដែងរបស់គាត់នៅមានកម្រិតនៅឡើយ។ ដូច្នេះ បើគាត់មកបណ្ដុះបណ្ដាលនៅទីនេះ គាត់កាន់តែល្អ សមត្ថភាពគាត់កាន់តែកើនឡើង"។

លោកគ្រូ អ្នកគ្រូចំនួន ១៥នាក់ សុទ្ធជាធនធានក្នុងស្រុក ត្រៀមសម្រាប់ផ្ដល់ការបណ្ដុះបណ្ដាល។សិក្ខាកាមដែលឆ្លងកាត់ការបណ្ដុះបណ្ដាល នឹងទទួលបានសញ្ញាប័ត្របញ្ជាក់ពីគុណភាព។ លោកគ្រូ អោក ប៊ុនធឿន ថ្លែងថា ចំណុចល្អមួយទៀត ពួកគេទាំងនោះ ស្ថិតជាអាទិភាព ក្នុងករណីផលិតកម្មមកពីក្រៅស្រុក គេចុះមកជ្រើសរើសតួសម្ដែងក្នុងភាពយន្តរបស់គេ។

ក្រៅពីនេះ សូម្បីផលិតកម្មក្នុងស្រុកនានា ក៏អាចមកជ្រើសតួសម្ដែងដែលមានជំនាញពិតប្រាកដទទួលបានពីការសិក្សាដែរ ហើយសាលាបើកចំហលើកិច្ចការនេះ៕

អត្ថបទ៖ ទារិកា