អេនឌី បន្ទោសខ្លួនឯងគោរពច្បាប់អត់បានខ្ជាប់ខ្ជួន
- 2015-08-03 18:37:50
- ចំនួនមតិ 0 | ចំនួនចែករំលែក 0
អេនឌី បន្ទោសខ្លួនឯងគោរពច្បាប់អត់បានខ្ជាប់ខ្ជួន
ចន្លោះមិនឃើញ
អេនឌី បានពោលពាក្យសោកស្ដាយ និងបន្ទោសខ្លួនឯងដែលមិនបានគោរពច្បាប់ចរាចរណ៍ឲ្យបានខ្ជាប់ខ្ជួន ទើបជាហេតុបណ្ដាលឲ្យមានគ្រោះ។
តារាប្រុសដែលទើបជ្រុះបាត់កាបូបអស់ប្រាក់រាប់ពាន់ដុល្លារកាលពីខែមុននោះ ថ្លែងដូច្នេះ បន្ទាប់លោកបានជួបគ្រោះថ្នាក់ចរាចរណ៍កាលពីយប់ថ្ងៃទី ៣១ កក្កដា វេលាម៉ោង១១យប់ ដោយរថយន្តរបស់លោកបានប៉ះជាមួយម៉ូតូមួយគ្រឿង បណ្ដាលឲ្យមានមនុស្សម្នាក់របួស ឯរថយន្តរបស់លោក ខូចខាតតិចតួចផ្នែកខាងមុខ។
អេនឌី ថ្លែងថា "ខ្ញុំបាទសូមអភ័យទោសចំពោះកំហុសឆ្គងរបស់ខ្ញុំ ដែលមិនបានគោរពច្បាប់ចរាចរណ៍អោយបានត្រឹមត្រូវ ទើបបណ្ដាលអោយមានបញ្ហាដូច្នេះកើតឡើង តែខ្ញុំបាទសូមនិយាយដោយស្មោះដោយមានព្រះជាសាក្សី បើខ្ញុំនិយាយមិនពិតក្នុងពាក្យណាមួយនោះ សូមអោយខ្ញុំអន្តរាយដល់ជីវិតចុះ"។
តារាប្រុសរូបនេះ បន្តរៀបរាប់ថា នៅថ្ងៃកើតហេតុប្រហែលម៉ោងជិត ១១យប់ លោកបានចេញពីផ្ទះមិត្តម្នាក់នៅម្ដុំកន្លែងកើតហេតុ ដោយបើកបរក្នុងល្បឿនប្រហែល 20km/h ប៉ុណ្ណោះ។ យ៉ាងណាក៏ដោយ លោកទទួលស្គាល់ថា ពិតជាបានបើកបញ្ច្រាសទិសពិតមែន ប៉ុន្តែលោកមិនបានបើកទៅបុកជនរងគ្រោះទេ។
"ខ្ញុំមិនបានទៅបុកជនរងគ្រោះទេ តែគាត់ជិះម៉ូតូយ៉ាងលឿនមកបុកឡានរបស់ខ្ញុំតែម្ដង បងប្អូនទាំងអស់អាចទៅសួរសាក្សីនៅកន្លែងកើតហេតុបាន ហើយខ្ញុំហ៊ានអះអាងដោយជីវិតខ្ញុំថា ខ្ញុំមិនបានប៉ះពាល់នូវជាតិស្រវឹងអី សូម្បីបន្តិច ព្រោះខ្ញុំមិនចេះញាំជាតិស្រវឹងអីទេ អ្នកណាៗក៏ដឹងអំពីរឿងនេះដែរ មិនដូចពាក្យដែលគេចេះតែផ្សាយទាំងទទឹងទិស ថាខ្ញុំបើកបរបញ្ច្រាសទិសក្នុងល្បឿនលឿននោះទេ ហើយនៅក្នុងឡានគឺមានតែខ្ញុំម្នាក់ឯងប៉ុណ្ណោះ មិនពាក់ព័ន្ធហ្នឹងអ្នកណាឡើយ" អេនឌី បន្ថែម។
ក្រោយពីកើតរឿង កាលពីថ្ងៃទី០១.០៨.២០១៥ អេនឌី បញ្ជាក់ថា លោកបានទៅសួរសុខទុក្ខជនរងគ្រោះ និងសូមអភ័យទោសចំពោះក្រុមគ្រួសារជនរងគ្រោះរួចហើយ។ ប៉ុន្តែដំណើរការដោះស្រាយនៅបន្តជជែកគ្នានៅឡើយ។
តារាប្រុសបានឱបស្រីស្អាតរាប់សិបនាក់រូបនេះ បន្តថា "កំហុសនេះគ្មានអ្នកណាម្នាក់ចង់អោយវាកើតឡើងនោះទេ វាជាកំហុសអចេតនា តែខ្ញុំបានទទួលកំហុសដោយអចេតនារបស់ខ្ញុំរួចហើយ ដោយមិនបានរត់គេចទៅណាទេ ដូច្នេះហើយគួរតែបងប្អូនទាំងអស់យល់អំពីខ្ញុំផង កុំអោយឃើញមនុស្សមានកំហុសបន្តិចបន្តួចចេះតែមកជាន់បន្ថែម"។
លោកបន្តទៀតថា " អ្នកសិល្បៈក៏ជាមនុស្សដូចអ្នកទាំងអស់គ្នាដែរ ដែលតែងមានកំហុស គ្មានមនុស្សណាម្នាក់កើតមកហើយមិនចេះខុសនោះទេ អ្នកនិយាយចេះតែនិយាយបានហើយចុះបើប៉ះខ្លួនឯង រឺក៏ក្រុមគ្រួសារខ្លួនឯងវិញទើបដឹងថាវាយ៉ាងម៉េច នេះខ្ញុំមិនបានរត់ទៅណាផង នៅទទួលខុសត្រូវ ចុះអ្នកដែលមានបញ្ហាដូចខ្ញុំហើយគាត់រត់បាត់នោះតើអ្នកទាំងអស់គ្នាគិតម៉េចវិញ?”
អេនឌី បន្ថែមទៀតថា "ខ្ញុំគ្មានអីបកស្រាយទៀតទេក្រៅពីសូមអភ័យចំពោះជនរងគ្រោះ ក្រុមគ្រួសារជនរងគ្រោះ និងបងប្អូនទាំងអស់ ចំពោះកំហុសដោយអចេតនារបស់ខ្ញុំ ដោយមិនបានគោរពច្បាប់ចរាចរណ៍អោយបានត្រឹមត្រូវ ហើយខ្ញុំសូមសន្យាថាមិនអោយមានជាលើកទីពីរជាដាច់ខាត ពីខ្ញុំ អែនឌី "។
ជាមួយនឹងការដឹងកំហុស និងបង្ហាញពីការទទួលខុសត្រូវចំពោះទង្វើរបស់ អេនឌី នៅពេលនេះ។ ប្រិយមិត្តជាច្រើន បានសាទរ និងស្នើឲ្យប្រជាពលរដ្ឋដទៃទៀតយកគំរូតាម៕
ស្រីស្អាត បេនីយុំាង និង អេនឌី បកស្រាយរឿងគ្រោះថ្នាក់ចរាចរណ៍យប់មិញ
អត្ថបទ៖ ទារិកា