វិធីងាយៗកម្ចាត់ក្លិនខោអាវផ្អួរ និងទូរសំលៀកបំពាក់ក្លិនមិនល្អ

2015-08-03 22:18:55
ចំនួនមតិ 0 | ចំនួនចែករំលែក 0

ចន្លោះមិនឃើញ

សំលៀកបំពាក់ដែលមានក្លិនផ្អួរ គឺដោយសារបោកហាលមិនត្រូវពន្លឺថ្ងៃគ្រប់គ្រាន់ ជាពិសេសគឺអំឡុងរដូវភ្លៀងនេះតែម្ដង។ ចំណែកទូរដាក់សម្លៀកបំពាក់វិញ ក៏អាចមានក្លិនមិនល្អដែរ ប្រសិនបើអ្នកផ្ដុំខោអាវគរគ្នាច្រើនថ្ងៃនោះ។ ដើម្បីកម្ចាត់បញ្ហាទាំងនេះ អ្នកអាចអនុវត្តតាមវិធីខាងក្រោម៖

ចំពោះសំលៀកបំពាក់

១. ប្រើទឹកខ្មេះ

ទឹកខ្មេះអាចប្រើដើម្បីបំបាត់ក្លិនមិនល្អពីសម្លៀកបំពាក់បាន។ លាយទឹកខ្មេះ (មានជាតិអាស៊ីតទាប) ក្នុងបរិមាណស្មើគ្នាក្នុងដបបាញ់ទឹក រួចសាកល្បងរកក្រណាត់ស្អាតមួយមកបាញ់បន្តិចសាកល្បងមើល ឃើញថាមិនមានពណ៌ប្រែប្រួល អ្នកអាចយកទៅបាញ់លើសម្លៀកបំពាក់បាន។ បន្ទាប់មកដាក់ព្យួរសំលៀកបំពាក់ឲ្យត្រូវខ្យល់នោះក្លិនមិនល្អនឹងរសាយអស់។

២. ប្រើទឹកក្រូចឆ្មារ

សម្រាប់ទឹកក្រូចឆ្មារក៏មានប្រសិទ្ធភាពដូចទឹកខ្មេះដែរ ។ លាយទឹកក្រូចឆ្មារមួយស្លាបព្រាបាយជាមួយទឹកមួយពែង ដាក់ចូលក្នុងដបបាញ់ទឹក។ ដាក់ព្យួរសំលៀកបំពាក់រួចបាញ់ទឹកក្រូចឆ្មារដាក់ ទុកឲ្យស្ងួត នោះក្លិនមិនល្អនឹងបាត់បង់ និងធ្វើឲ្យមានក្លិនល្អឡើងវិញ។

ចំពោះកន្លែងដាក់សំលៀកបំពាក់

១. អំបិល

សម្រាប់ទូខោអាវដែលដាក់អាវផ្ដុំគ្នាច្រើន អាចមានក្លិនមិនល្អ ដូចនេះអំបិលអាចកម្ចាត់ក្លិននោះបាន ព្រោះអំបិលជួយកម្ចាត់ជាតិសំណើម។ ដាក់អំបិលបរិមាណសមល្មមក្នុងកូនថង់ឬក្រណាត់មួយ ចងមាត់ឲ្យជិតរួចយកទៅដាក់ទូឬកន្លែងទុកខោអាវ នោះអាចបំបាត់ក្លិនមិនល្អបាន។ គប្បីប្ដូរអំបិលយ៉ាងតិចណាស់ពីរឬបីថ្ងៃម្ដង។

២. ស្លឹកស្ដៅ

ស្លឹកស្ដៅមិនត្រឹមតែយកមកទទួលទានបាន ប៉ុន្តែអ្នកអាចយកស្លឹកស្ដៅដែលមានជាប់ទាំងមែកមកជាមួយ ទៅដាក់នៅកន្លែងដាក់ខោអាវដែលមានក្លិនមិនល្អ ដោយវាអាចកម្ចាត់ក្លិនផ្សិតផ្អួរ។ ក្រៅពីនេះកន្លែងទុកដាក់របស់របរដែលមានធំក្លិនអាក្រក់ ស្លឹកស្ដៅអាចប្រើការបាន។

គួរបញ្ជាក់ផងដែរថាវិធីសាស្រ្ដបំបាត់ក្លិនក្នុងទូរសម្លៀកបំពាក់ខាងលើនេះ ក៏អាចយកទៅអនុវត្តដើម្បីបំបាត់ក្លិនមិនល្អផ្សេងៗក្នុងផ្ទះរបស់អ្នកបានផងដែរ៕

ចុចអាន៖ របៀបបត់សម្លៀកបំពាក់ឲ្យបានត្រឹមត្រូវពេលធ្វើដំណើរ

ប្រែសម្រួល៖ មាន រតនា ប្រភព៖ hubpages , thehealthsite 