ប្រទះឃើញដបទឹកសុទ្ធម៉ាឡេស៊ីនៅលើកោះ ធ្វើឲ្យគ្រួសារជនរងគ្រោះ MH370 កាន់តែភ័យរន្ធត់

2015-08-04 16:02:43
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រទះឃើញផ្នែកមួយនៃស្លាបយន្តហោះ ព្រមទាំងសាក់កាដូរហែកធ្លុះធ្លាយនៅលើកោះ Reunion របស់ប្រទេសបារាំង បំណែកជាច្រើនទៀតត្រូវបានប្រទះឃើញបន្តបន្ទាប់ រួមជាមួយដបទឹកសុទ្ធដែលផលិតនៅប្រទេសម៉ាឡេស៊ីផងដែរ។ ការប្រទះឃើញវត្ថុគួរឲ្យសង្ស័យជាច្រើននេះ បានធ្វើឲ្យគ្រួសារអ្នកដំណើរលើជើងហោះហើរ MH370 កាន់តែមានភាពភ័យរន្ធត់។

មេធាវី Creissen Philippe នៅលើកោះ Reunion បានប្រទះឃើញដបទឹកសុទ្ធបី ដែលក្នុងនោះមានពីរជាផលិតផលរបស់ប្រទេសម៉ាឡេស៊ី ឯមួយទៀតមានដាក់លក់នៅតៃវ៉ាន់។ ដបទឹកសុទ្ធទាំងអស់ ត្រូវបានបញ្ជូនទៅឲ្យក្រុមអ្នកស៊ើបអង្កេត MH370 ដើម្បីកំណត់ថាជារបស់អ្នកដំណើរលើជើងហោះហើរបាត់ខ្លួន ឬយ៉ាងណា។

ការប្រទះឃើញវត្ថុគួរឲ្យសង្ស័យបន្តបន្ទាប់ នៅលើកោះភាគខាងលិចមហាសមុទ្រឥណ្ឌា បានផ្ដល់ក្ដីសង្ឃឹមឲ្យក្រុមការងារអាចស្វែងរកតឹកតាងពីការបាត់ខ្លួន MH370។ យ៉ាងណាក្ដី ស្ថានភាពនេះក៏កំពុងធ្វើឲ្យគ្រួសារជនរងគ្រោះកាន់តែមានភាពភ័យរន្ធត់ផងដែរ។

យន្តហោះដឹកអ្នកដំណើររបស់ក្រុមហ៊ុនអាកាសចរណ៍ម៉ាឡេស៊ី MH370 បានបាត់ខ្លួនយ៉ាងអាថ៌កំបាំងកាលពីថ្ងៃទី០៨ ខែមិនា ឆ្នាំ២០១៤ ដោយនាំទៅជាមួយអាយុជីវិតមនុស្ស ២៣៩នាក់។ រហូតមកដល់ពេលនេះ ការស្រាវជ្រាវរុករកធំបំផុតក្នុងប្រវត្តិសាស្ត្រ មិនទទួលបានដានអ្វីឡើយ៕