ល្បីថាកុំព្យូទ័រ Mac អត់ឆ្លងមេរោគ ឥឡូវឆ្លងដោយងាយ ទោះបីអត់អ៊ីនធឺណិត

2015-08-07 17:11:14
ចំនួនមតិ 0 | ចំនួនចែករំលែក 0

ចន្លោះមិនឃើញ

កុំព្យូទ័រ Mac ល្បីថាមាន Firmware សុវត្ថិភាពខ្ពស់ មេរោគមិនអាចឆ្លងចូលបាន តែឥឡូវនេះគឺមិនអាចទៀតនោះទេដោយសារតែមានមានមេរោគថ្មីមួយបានបង្ហាញខ្លួន ហើយកំពុងតែធ្វើការវាយលុកលើកុំព្យូទ័រ Mac បានដោយងាយ បើទោះបីជាគ្មានអ៊ីនធឺណិតក៏ដោយ។

តាមរបាយការណ៍នៅលើគេហទំព័រ Wired បានឲ្យដឹងថា មេរោគថ្មីនេះមានឈ្មោះថា Thunderstrike 2 គឺត្រូវបានបង្កើតឡើងដោយអ្នកស្រាវជ្រាវផ្នែកសុវត្ថិភាពចំនួនពីរនាក់ មានឈ្មោះថា Xeno Kovah និង Trammell Hudson។ Thunderstrike 2 គឺត្រូវបានបង្កើតឡើងដោយយកតាមគំរូមេរោគមុនមានឈ្មោះថា Thunderstrike។ មេរោគនេះអាចដំណើរការតាមរយៈ Thunderbolt Option ROM និងអាចចូលទៅបំផ្លាញ Firmware ប្រភេទ EFI របស់ Mac។

បើតាមការចុះផ្សាយនៅលើគេហទំព័រ thenextweb បានឲ្យដឹងថា នៅពេលដែលមេរោគនេះបានចូលហើយ វាមិនអាចលុបចេញដោយការប្ដូរប្រព័ន្ធប្រតិបត្តិការថ្មី ឬប្ដូរ Hard Drive ចេញនោះទេ។

យោងតាមក្រុមអ្នកស្រាវជ្រាវបានឲ្យដឹងថា ពួក Hacker អាចលាក់មេរោគនេះតាមរយៈ Phishing Email (អ៊ីមែលបោកបញ្ឆោត) ឬ malicious website ដែលមានផ្ទុកមេរោគ។ ដូច្នេះនៅពេលដែលអ្នកប្រើប្រាស់បានទាញយក ហើយដំណើរការ Thunderstrike 2 ចូលទៅក្នុងកុំព្យូទ័រ វាអាចវាយប្រហារចូលទៅកាន់កុំព្យូទ័រផ្ទាល់ ឬ ឧបករណ៍ផ្សេងៗទៀតដែលប្រើ Option ROM ដូចជាឧបករណ៍ Thunderbolt adapter, USB flash និង External Hard Drive ផ្សេងទៀត។ បន្ទាប់ពីនោះ នៅពេលយកឧបករណ៍នេះទៅដោតកុំព្យូទ័រ Mac ផ្សេងទៀត វានឹងឆ្លងចូលទៅកាន់ Firmware ដោយស្វ័យប្រវត្តិ។

ចង់ដឹងថា វាដំណើរការយ៉ាងណាសូមទស្សនាវីដេអូខាងក្រោម៖