កីឡាករ​បាល់ទាត់​ ដែល​​កំពុង​លេង​នៅ​លីក​​កំពូលៗ​របស់​អឺរ៉ុប​ ក៏​មាន​មួយ​ចំនួន​ មាន​ដើម​កំណើត ឬ​ជាប់​​​សែស្រឡាយ​​មក​ពី​​ប្រទេស​តំបន់​អាស៊ីអាគ្នេយ៍​យើង​ដែរ។ តើ​មាន​កីឡាករ​​រូប​ណា​ខ្លះ ហើយ​កំពុង​លេង​ឲ្យ​ក្រុម​ណា​ខ្លះ​ទៅ? ​ប្រិយ​មិត្ត​ចង់​ដឹង​ច្បាស់ សូម​​មើល​​កីឡាករ​ទាំង​៧​នាក់​ ដូច​ខាង​ក្រោម៖

១. Radja Nainggolan – Roma

​ខ្សែ​បម្រើ​វ័យ​២៧​ឆ្នាំ កើត​នៅ​ទីក្រុង​ Antwerp ​ប្រទេស​បែលហ្សិក ​មាន​​ម្ដាយ​​ជនជាតិ​បែលហ្សិក និង​ឪពុក​ជន​ជាតិ​ឥណ្ឌូណេស៊ី។ កាល​វ័យ​១៧​ឆ្នាំ Nainggolan បាន​ទៅ​ប្រកប​អាជីព​នៅ​ប្រទេស​អ៊ីតាលី លេង​ឲ្យ​ក្រុម​ Piacenza មុន​ពេល​ទៅ​ចូល​រួម​ក្រុម​ Cagliari ​ក្របខ័ណ្ឌ​ Serie A ឆ្នាំ​២០១០។ បច្ចុប្បន្ន​​កីឡាករ​រូប​នេះ កំពុង​លេង​ឲ្យ​ក្រុម​ Roma ​និង​ជ្រើស​រើស​លេង​ឲ្យ​ក្រុម​ជម្រើស​ជាតិ​បែលហ្សិក។

២. ​David Alaba – Bayern Munich

Alaba កើត​នៅ​ទីក្រុង​ Vienna ​ប្រទេស​អូទ្រីស មាន​ឪពុក​ជនជាតិ​នីហ្សេរីយ៉ា និង​ម្ដាយ​ជនជាតិ​ហ្វីលីពីន។ បច្ចុប្បន្ន​ ​ខ្សែ​ការពារ​​វ័យ​២៣​ឆ្នាំ កំពុង​លេង​ឲ្យ​ក្រុម​ Bayern Munich និង​ក្រុម​ជម្រើស​ជាតិ​អូទ្រីស ទោះ​មាន​សិទ្ធ​ចូល​លេង​ឲ្យ​ជម្រើស​ជាតិ​នីហ្សេរីយ៉ា និង​​ហ្វីលីពីន​​ក៏​ដោយ។

៣. Dion Cools – Club Brugge

Dion Cools (អាវខៀវ, កណ្តាល)

Cools ​មាន​ឪពុក​ជនជាតិ​បែលហ្សិក និង​ម្ដាយ​ម៉ាឡេស៊ី កើត​នៅ​ទីក្រុង​ Kuching ​ប្រទេស​ម៉ាឡេស៊ី ប៉ុន្តែ​គ្រួសារ​របស់​គេ​ ទៅ​រស់​នៅ​ប្រទេស​បែលហ្សិក។ បច្ចុប្បន្ន​ ​ខ្សែ​ការពារ​វ័យ​១៩​ឆ្នាំ កំពុង​លេង​ឲ្យ​ក្លិប​ Club Brugge ​និង​លេង​ឲ្យ​ក្រុម​ជម្រើស​ជាតិ U-19 បែលហ្សិក ហើយ​កីឡាករ​រូប​នេះ ក៏​មាន​ជម្រើស​លេង​ឲ្យ​​ក្រុម​ជម្រើស​ជាតិ​ម៉ាឡេស៊ី​ផង​ដែរ។

៤. Yohan Cabaye – Crystal Palace

ខ្សែ​បម្រើ​ Cabaye ​គឺជា​តារា​ឆ្នើម​របស់​ក្រុម​ជម្រើស​ជាតិ​បារាំង​ ចាប់​តាំង​ពី​លេង​ឲ្យ​ Lille ឆ្នាំ​២០០៤។ កីឡាករ​វ័យ​២៩​ឆ្នាំ ​​ក៏​មាន​ជាប់​សែស្រឡាយ​ជន​ជាតិ​វៀតណាម​ដែរ ដោយសារ​មាន​​​យាយ​ជា​ជនជាតិ​វៀតណាម។ អតីត​កីឡាករ​​ក្រុម​ Paris Saint-Germain និង​ Newcastle United ​រូប​នេះ បច្ចុប្បន្ន​កំពុង​លេង​ឲ្យ​ក្រុម​ Crystal Palace នៅ​ English Premier League។

៥. Emilio Audero Mulyadi – Juventus

អ្នកចាំទី​វ័យ​១៨​ឆ្នាំ ​មាន​ឪពុក​ជនជាតិ​ឥណ្ឌូណេស៊ី និង​ម្ដាយ​អ៊ីតាលី កើត​នៅ​ទីក្រុង​ Mataram ​ប្រទេស​ឥណ្ឌូណេស៊ី។ Emilio ចូល​ហាត់​នៅ​ក្លិប​ Juventus តាំង​ពី​ក្មេង​ ហើយ​រដូវ​កាល​២០១៥/១៦ នេះ​ រូប​គេ​ក៏​ជាប់​ជា​អ្នកចាំទី​ដៃ​ទី​៤ របស់​ក្រុម​ជើង​ឯក​អ៊ីតាលី​ដែរ។ បច្ចុប្បន្ន​ កីឡាករ​រូប​នេះ លេង​ឲ្យ​ឈុត​​យុវជន​របស់​ក្រុម​ជម្រើស​ជាតិ​អ៊ីតាលី។

៦. Shaun Maloney – Chicago Fire (MLS)

តារា​ឆ្នើម​របស់​ក្រុម​ជម្រើស​ជាតិ​ស្កុតឡែន​រូប​នេះ កើត​នៅ​រដ្ឋ​ Sarawak ​ប្រទេស​ម៉ាឡេស៊ី ​មាន​ឪពុកម្ដាយ​ជនជាតិ​អង់គ្លេស ​មុន​ពេល​ទៅ​នៅ​ស្កុតឡែន តាំង​ពី​រូប​គេ​នៅ​វ័យ​៥​ឆ្នាំ។ កីឡាករ​វ័យ​៣២​ឆ្នាំ បច្ចុប្បន្ន​កំពុង​លេង​​នៅ​លីក​កំពូល​អាមេរិក​ MLS ​ក្រុម​ Chicago Fire។

៧. John Heitinga – Ajax

ខ្សែ​ការពារ​ដែល​ចូល​លេង​ឲ្យ​ក្រុម​ជម្រើស​ជាតិ​ហុល្លង់ តាំង​ពី​ឆ្នាំ​២០០៤ និង​ធ្លាប់​លេង​ឲ្យ​ក្រុម​ Atletico Madrid, Everton, Fulham,​ Hertha Berlin និង​បច្ចុប្បន្ន​លេង​ឲ្យ​ Ajax ​រូប​នេះ កើត​នៅ​ប្រទេស​ហុល្លង់ ប៉ុន្តែ​កីឡាករ​វ័យ​៣១​ឆ្នាំ ធ្លាប់​បង្ហើប​ប្រាប់​ថា​ ខ្លួន​មាន​ជាប់​សែស្រឡាយ​ជនជាតិ​ឥណ្ឌូណេស៊ី ព្រោះ​មាន​ឪពុក​​​មាន​ដើម​កំណើត​នៅ​កោះ​ស៊ូម៉ាត្រា ប្រទេស​ឥណ្ឌូណេស៊ី៕

-ចុចអាន៖ ១០​ក្លិប​នៅ​អាស៊ី​អាគ្នេយ៍ មាន​អ្នក​ទស្សនា​ច្រើន​ជាង​គេ​បំផុត

​ប្រែ​សម្រួល៖ វិន ជីវ័ន្ត ​ប្រភព៖ footballchannel.asia