ស្រីអ៊ីត បកស្រាយរឿងបានល្បី ភ្លេចប្ដីជាគ្រូបឋម

2015-08-26 20:40:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រីអ៊ីត បញ្ជាក់ប្រាប់ Sabay ថា នាងមិនបានភ្លេចប្ដីដូចព័ត៌មានចុះផ្សាយកន្លងមកនោះទេ ហើយក៏គ្មានបញ្ហារកាំរកូសណាមួយនៅក្នុងគ្រួសារដែរ។ ប៉ុន្តែការដែលឃ្លាតឆ្ងាយគ្នា ក៏ព្រោះតែម្នាក់ៗមានអាជីពរៀងខ្លួន ហើយត្រូវប្រឹងរកលុយទាន់នៅក្មេងប៉ុណ្ណោះ។

ស្រីអ៊ីត និយាយថា៖" ប្ដីខ្ញុំមានការងាររបស់គាត់ ហើយខ្ញុំមានការងាររបស់ខ្ញុំ យើងនៅក្មេងៗ នៅខំរកស៊ីសិន ដល់ពេលចាស់ទៅ នរណាគេត្រូវការទៀត"។ តារាកំប្លែងរូបនេះបន្ថែមថា នាងបានទៅលេងស្រុកជួបប្ដីជារឿយៗ អាស្រ័យលើស្ថានភាពការងារជាក់ស្ដែង មានការមមាញឹក ឬក៏អត់។ ចំណែកប្ដីរបស់នាង ក៏មមាញឹកក្នុងការបង្រៀនព្រឹកល្ងាចក្នុងនាមជាគ្រូបឋម និងមើលការខុសត្រូវក្រុមតន្ត្រី "ស្រីអ៊ីត" នៅស្រុកទៀតផង។

ជាមួយគ្នានោះ តារាកំប្លែងដដែលបន្ថែមថា ស្វាមីរបស់នាងតែងធ្វើដំណើរមកលេងម្ដងម្កាល ប្រសិនបើទំនេរពីការងារបង្រៀននៅសាលាបឋម ឬការងារមើលការខុសត្រូវវង់តន្ត្រីនៅស្រុកកំណើត។ "ខ្ញុំអត់ខ្វល់ទេ គេផ្សាយផ្សាយទៅ ខ្ជិលនិយាយ ខ្ជិលតបតណាស់ ការពិតនៅតែជាការពិត គ្រាន់តែមិនសូវសប្បាយចិត្ត ដែលខ្ញុំនិយាយផ្សេង ហើយសរសេរផ្សឹង"។ ស្រីអ៊ីត បញ្ជាក់។

តារាកំប្លែងមានប្រភពមកពីខេត្តកំពង់ស្ពឺដដែលបញ្ជាក់ថា ប្ដីប្រពន្ធរបស់ពួកគេមិនទាន់អាចរស់នៅជួបជុំគ្នាបានគ្រប់ពេលវេលាដូចពីមុននៅឡើយទេ ព្រោះមានការមមាញឹករៀងខ្លួន។ ក្នុងនោះ រួមមានសម្ដែង កំប្លែង និងចម្រៀងក្នុងផលិតកម្ម សាន់ដេ ជាដើម។ យ៉ាងណា តារាកំប្លែងស្រីរូបនេះបញ្ជាក់ថា មិនបានភ្លេចប្ដីនៅស្រុកដូចព័ត៌មានផ្សាយកន្លងមក ដោយសង្ឃឹមថា ទស្សនិកជនឈប់មានការយល់ច្រឡំ ឬប្រើពាក្យរិះគន់ តែសូមបន្តការគាំទ្រផង៕

អានអត្ថបទ៖ រោងភាពយន្តផ្លាទីនៀមសម្ពោធកម្មវិធី “ទេសកាលភាពយន្តខ្មែរលើកទី៣”

អានអត្ថបទ៖ គង់ ចាន់ស្រីមុំ ថ្លៃបណ្ណាការទុកឲ្យម្ដាយ…

អត្ថបទ៖ សំ ជំនាញ