ដំរីចុះប្រេងនៅថៃសម្លាប់ហ្ម រួចរត់ចូលព្រៃពេលកំពុងដឹកទេសចរ

2015-08-27 20:01:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំរីឈ្មោលមួយក្បាលដែលគេប្រើដើម្បីដឹកទេសចរនៅក្នុងប្រទេសថៃ បានសម្លាប់ហ្ម រួចរត់ចូលព្រៃ អំឡុងពេលកំពុងដឹកភ្ញៀវនៅខេត្តឈៀងម៉ៃ វេលាម៉ោង៩:៣០នាទីព្រឹកថ្ងៃពុធម្សិលមិញ។

ដំរីមួយក្បាលនេះ ត្រូវបានគេរាយការណ៍ថាបានចុះប្រេង ពេលមានភ្ញៀវកំពុងជិះ រួចបានសម្លាប់ហ្មដំរីដែលកំពុងបញ្ជា។ ប៉ូលិសបានបញ្ជាក់ថា ក្រោយពីសម្លាប់ហ្មរួចហើយ វាបានរត់ចូលព្រៃ ទៅជាមួយទេសចរចិន៣នាក់ដែលកំពុងនៅលើខ្នងរបស់វា។

ដំរីផ្សេងទៀតដែលកំពុងដឹកភ្ញៀវទេសរ

យ៉ាងណាក្ដី គ្រួសារចិនដែលមានឪពុក ម្ដាយ និងកូនតូចនោះ មិនមានគ្រោះថ្នាក់អ្វីក្រៅពីភាពភ័យខ្លាចនោះទេ ក្រោយត្រូវបានជួយសង្រ្គោះដោយហ្មដំរីផ្សេងទៀត។ នេះបើយោងតាមការឲ្យដឹងពីលោកវរសេនីយ៍ Thawatchai Thepboon មេបញ្ជាការប៉ូលិសនៅស្រុក Mae Wang ក្នុងខេត្តឈៀងម៉ៃ។

ដំរីដែលជាសត្វមួយប្រភេទដែលថៃចាត់ទុកថាអត្តសញ្ញាណមួយរបស់ជាតិ។ វាគឺជាសត្វដ៏ពេញនិយមដែលគេប្រើសម្រាប់ទាក់ទាញទេសចរក្នុងប្រទេសថៃ ដែលគេប្រើវាឲ្យដឹកភ្ញៀវទេសចរនៅក្នុងតំបន់ទេសចរណ៍ជាច្រើននៅក្នុងប្រទេសនេះ។

ក្រុមការពារសិទ្ធិសត្វព្រៃជាច្រើន បានជំទាស់ថានេះជាសកម្មភាពដ៏ឃោរឃៅ និងធ្វើឲ្យសត្វត្រូវមករស់នៅយ៉ាងតប់ប្រមល់។ លោក Edwin Wiek មកពីអង្គការ Wildlife Friends of Thailand បាននិយាយថា៖ "ដំរីត្រូវបានគេប្រើរៀងរាល់ថ្ងៃ រៀងរាល់ខែ ជាទូទៅគឺពេញ៣៦៥ថ្ងៃក្នុងមួយឆ្នាំ។ ប្រសិនបើអ្នកត្រូវគេប្រើឲ្យធ្វើដូចនោះដែរ គឺអ្នកប្រាកដជាស្រ្ដេសស្លាប់។ ដំរីក៏មិនខុសពីមនុស្សដែរ ដែលពេលខ្លះពួកវាមួម៉ៅ ហើយពេលនោះយើងពិបាកនឹងគ្រប់គ្រងវាណាស់"។

ការលើកឡើងរបស់អ្នកការពារសត្វព្រៃខាងលើ អាចស៊ីគ្នាទៅនឹងរឿងរ៉ាវដែលកើតឡើង ហើយជាក់ស្ដែង នេះមិនមែនជាលើកទី១នោះទេដែលដំរីបានតបតទៅកាន់មនុស្សរហូតបង្កឲ្យមានអ្នកស្លាប់បែបនេះ។