អំឡុង​ពេល​ប្រកាស​កំពូល​ស្មាតហ្វូន​ iPhone 6s និង iPhone 6s Plus ​ក្រុមហ៊ុន Apple ​បាន​បង្ហាញ​​នូវ Hardware មុខងារ​ និងបច្ចេកវិទ្យា​ថ្មីៗ ​ដែល​បាន​បំពាក់​នៅលើ​ស្មាតហ្វូន​ទាំង​ពីរ​នេះ។ ប៉ុន្តែ​ក៏​នៅ​មាន​លក្ខណៈ​សំខាន់​មួយ​ចំនួន​ដែល​ពុំ​បាន​បញ្ជាក់​នោះ​ដែរ។

​ក្រុមហ៊ុន Apple ​បាន​បញ្ជាក់​តែ​ទៅ​លើ​បច្ចេកវិទ្យា​ថ្មី​ដូច​ជា​​ 3D Touch ​ជម្រើស​ពណ៌​ថ្មី​ កាមេរ៉ា​ ឈីប​ ក៏​ដូច​ជា​មុខងារ​ថ្មី​ៗ​មួួយ​ចំនួន​ទៀត។ ប៉ុន្តែ​អ្វី​ដែល​ជា​ចម្ងល់​នោះ​គឺ​​ក្រុមហ៊ុន​ពុំ​បាន​បញ្ជាក់​ពី​ទំហំ RAM ក៏​ដូច​ជា​កម្រិត​ថាមពល​ថ្ម​នោះ​ទេ។

ដោយ​ឡែក​​ ​​តាម​របាយការណ៍​ថ្មី​​ដែល​បាន​​ឲ្យ​ដឹង​ពី​បុគ្គលិក​ក្រុមហ៊ុន​ Apple ​បាន​បញ្ជាក់​​ថា ​​​​ស្មាតហ្វូន​ជំនាន់​ថ្មី​ទាំង​ពីរ​នេះ​​គឺ​បំពាក់​មក​ជា​មួយ​នឹង​ទំហំ RAM ​​​ពីរ​ដង​ធំ​ជាង​​ iPhone 6 និង iPhone 6 Plus។ ដូច្នេះ​តាម​ការ​បញ្ជាក់​នេះ​​​មាន​ន័យ​ថា​​ iPhone 6s និង s6 Plus ពិត​ជា​បាន​បំពាក់​ RAM ​ទំហំ 2GB ​​មែន។ ការ​បំពាក់​ RAM ទំ​ហំ​ថ្មី​ ​​បូក​រួម​ទាំង​ឈីប​ថ្មី​ CPU A9 ​ 64-bit ផង​នោះ​ វា​​រឹត​តែ​​បង្កើន​ល្បឿន​ដំណើរការ​ឲ្យ​កាន់​តែ​លឿន​​។

​ជា​មួយ​គ្នា​នោះ​ដែរ​ ថាមពល​ថ្ម​ដែល​ក្រុមហ៊ុន​ពុំ​បាន​បញ្ជាក់​នោះ​ ​​ក៏​បាន​លាត​ត្រដាង​តាម​រយៈ​​​វីដេអូ​​ Youtube ​មួយ​ដែល​បង្ហាញ​ពីដំណើរការ​ ​3D Touch ។ ក្នុង​វីដេអូ​នោះ​បាន​បង្ហាញ​ឲ្យ​ឃើញ​ថា ថា​​មពល​ថ្មលើ​ iPhone 6s ​​មាន​ត្រឹម​តែ​​ 1715 mAh ទាប​​ជាង​ថាមពល​ថ្ម​ 1810 mAh​ លើ​​ iPhone 6។ បើ​ទោះ​បី​ជា​ថាមពល​ថ្ម​ទាប​ជាង​ក៏​ដោយ​​ តែ​ឈីប​ A9 ​ថ្មី​នេះ​​គឺ​ជួយ​សំចៃ​ថាមពល​ដោយ​អាច​ប្រើ​បាន​ ១០ ម៉ោង​​សម្រាប់​ការ​ប្រើ​ 3G / 4G , ១១ ម៉ោង​​សម្រាប់​មើល​វីដេអូ​ និង​ ១៤ ម៉ោង​សម្រាប់​ការ​និយាយ​តាម​ប្រព័ន្ធ​​ 3G ដូច​ទៅ​នឹង iPhone 6។

ចំណែក​ឯ​ iPhone 6s Plus វិញ​គឺ​ពុំ​បាន​បញ្ជាក់​ពី​កម្រិត​​ថាមពល​ថ្ម​​នោះ​ទេ​ ​តែ​តាម​ពាក្យចចាមអារ៉ាម​​បាន​ឲ្យ​ដឹង​ថា​ វា​​មាន​ថាមពល​ថ្ម​​  2750mAh ទាប​ជាង​ថាមពល​ថ្ម​ 2910mAh ​លើ​​ iPhone 6 Plus ។ យ៉ាង​ណា​ក្ដី​​វា​ប្រហែល​ជា​មាន​រយៈ​ពេល​ប្រើប្រាស់​ដូច​គ្នា៕

អាន​បន្ត៖ វីដេអូ​បង្ហាញ​​ពី​ការ​ប្រើ​​​ 3D Touch ​​លើ​ iPhone 6s និង iPhone 6s Plus

ប្រែ​សម្រួល៖ សំនៀង

ប្រភព៖ redmondpie