​បច្ចេកវិទ្យា​ និង​មុខងារ​ថ្មី​​ដែល​បាន​បំពាក់​លើ​ iPhone 6s Plus របស់​ក្រុមហ៊ុន Apple ​គឺ​ប្រាកដ​ជា​ធ្វើ​ឲ្យ​អ្នក​គាំ​ទ្រ​ទន្ទឹង​​​​ចង់​ប្រើ​​ស្មាតហ្វូន​មួយ​នេះ។ តែ​បើ​ងាក​មក​មើល​គូប្រជែង​​វិញ ​ត្បិត​តែ​បាន​ប្រកាស​មុន​បន្តិច​មែន​ ប៉ុន្តែ​​ការ​រចនា​ជំនាន់​ចុងក្រោយ​របស់​ Galaxy Note 5 ក៏​មិន​ចាញ់​ iPhone 6s Plus​ ប៉ុន្មាន​ដែរ។ មិន​ត្រឹម​តែ​ប៉ុណ្ណោះ ​មាន​ចំណុច​ខ្លះ​​អាច​វ៉ា​ដាច់​ផលិត​របស់​ Apple ថែម​ទៀត​ផង។ ជាក់​ស្ដែង​ដូច​ចំណុច​ទាំង​ ៨ ខាង​ក្រោម៖ ​

១).   កាមេរ៉ា​៖ ​សម្រាប់​ iPhone ជំនាន់​ចុង​ក្រោយ​នេះ​គឺ​បាន​បង្កើន​​ទំហំ​កាមេរ៉ា​ និង​​គុណភាព​ចាប់​យក​រូប​ភាព​បាន​កាន់​តែ​ច្បាស់។ ប៉ុន្តែ​នៅ​ឆ្នាំ​នេះ​​ក្រុមហ៊ុន​ Samsung ​ក៏​មិន​ចាញ់​ក្រុមហ៊ុន​ Apple ប៉ុន្មាន​ដែរ ដោយ​នៅ​លើ​ Galaxy Note 5 បាន​បំពាក់​កាមេរ៉ា​ទំហំ​ធំ​ជាង​ iPhone 6s Plus ​ហើយ​ថែម​ទាំង​មាន​ Aperture ​ធំជាង មាន​មុខងារ​​ប្រើ​ច្រើន​ជាង និង​​អាច​ថត​រូបភាព​ប្រភេទ​ RAW និង​ Manual Mode បាន​ថែម​ទៀត​ផង ​។

២).   S Pen: ​គ្រប់​ជំនាន់​ Galaxy Note ទាំង​អស់​សុទ្ធ​តែ​ត្រូវ​បាន​រចនា​ឡើង​បំពាក់​ជា​មួយ​នឹង​ប៊ិច។ តែ​ដោយ​ឡែក​សម្រាប់​ប៊ិច​ S Pen នៅលើ ​ Galaxy Note ជំនាន់​ចុង​ក្រោយ​នេះ​វិញ​ត្រូវ​បាន​រចនា​ឡើង​ដោយ​បង្កើន​នូវ​មុខងារ​នៃ​ការ​ប្រើ​ប្រាស់​ ហើយ​​ស្រួល​ប្រើ​​ថែម​ទៀត​ផង។ ចំណែក​ឯ​ iPhone 6s Plus វិញ​​មិនមានប៊ិចផ្ទាល់ខ្លួននោះទេ​​ ប៉ុន្តែ​វា​អាច​ប្រើ​ជា​មួយ​នឹង​ប៊ិច​ផ្សេង (3rd Party Pen ) ​បាន ​តែ​មិន​មាន​មុខងារ​ច្រើន​ និង​ងាយ​ប្រើ​ដូច​ទៅ​និង​ S Pen ប្រើ​លើ​ Note 5 នោះ​ទេ។

៣).   ប្រព័ន្ធ​សាក​ថ្ម​តាម​ប្រព័ន្ធ​ Wireless ( Wireless Charging)៖ Samsung ​មិន​​ត្រឹម​តែ​បាន​បញ្ចូល​នូវ​បច្ចេកវិទ្យា​សាក​ថ្ម​ Wireless Charging នោះ​ទេ បន្ថែម​ទៀត​នោះ ​បច្ចេកវិទ្យា​សាក​ថ្ម​​ Wireless Charging លើ​​ Galaxy Note 5​ ​​បាន​បង្កើន​ល្បឿន​សាក​បាន​កាន់​តែ​លឿន​ជាង​មុន​​ដល់​ទៅ​ ៣០ ភាគរយ។

៤).   សាក​ថ្ម​តាម​ខ្សែ​​បាន​លឿន៖ ក្រៅ​ពី​ការ​​សាក​ថ្ម​តាម​ប្រព័ន្ធ​ Wreless Charging លឿន​ហើយ​ ការ​សាក​ថ្ម​តាម​ខ្សែ​ ​​microUSB ​ក៏​អាច​​សាក​បាន​កាន់​តែ​លឿន​​ដែរ​ដោយ​វាមាន​បច្ចេកវិទ្យា​ Fast Charging ជួយ​បង្កើន​ល្បឿន​នៃ​ការ​សាក។ ចំណែក​​ឯ​​ Apple ​គឺ​ពុំ​ទាន់​បាន​បញ្ចូល​នូវ​មុខងារ​មួយ​នេះ​ទេ​ទៅ​លើ​ iPhone របស់​ខ្លួន។

៥).   ផ្ទៃ​បង្ហាញ​អេក្រង់៖ ​កម្រិត​បង្ហាញ​នៅ​លើ​ iPhone 6s Plus (1920 x 1080 ស្មើ​នឹង 401 ppi)​ គឺ​ទាប​ជាង​​កម្រិត​បង្ហាញ​នៅ​លើ​ Note 5 (2560 x 1440 ស្មើ​នឹង 518 ppi)។  ប៉ុន្តែ​​ iPhone ក៏​​នៅ​តែ​ផ្ដល់​នូវ​ការ​កម្រិត​បង្ហាញ​ច្បាស់​។ យ៉ាង​ណា​ក្ដី​ផ្អែក​ទៅ​តាម​កម្រិត​ ppi ​ ស្មាតហ្វូន​របស់​ Samsung គឺ​អាច​បង្ហាញ​បាន​ច្បាស់​ជាង។

៦).   RAM៖ ចំពោះ​ទំហំ​ RAM ​ដែល​ Apple ​បាន​បំពាក់​លើ​ iPhone 6s Plus គឺ​ទាន់​មាន​ការ​បញ្ជាក់​ច្បាស់​ពី​ក្រុមហ៊ុន​នៅ​​ឡើយ​។ បើ​ទោះ​បី​ជា​ការ​បញ្ជាក់​ពី​ប្រភព​ផ្សេង​គ្នា​ពី​ទំហំ​ RAM លើ​ iPhone ជំនាន់​ក្រោយ​នេះ​ក៏​ដោយ​ក៏​ទំហំ​ដែល​ឲ្យ​ដឹង​នោះ​មាន​ត្រឹម​តែ​ 1 ទៅ 2 GB តែ​ប៉ុណ្ណោះ​។​ តែ​សម្រាប់​ Samsung វិញ​បាន​បំពាក់​ទំហំ​ដល់​ទៅ​​ 4GB ​ប្រភេទ​​ LPDDR4 RAM ​ចូល​ទៅ​ក្នុង​​ Note 5 ​ដូច្នេះ​វា​មិន​មាន​បញ្ហា​ក្នុង​ការ​ដំណើរការ​កម្មវិធី​ធំៗ​ និង​ច្រើន​ក្នុង​ពេល​តែ​មួយ​នោះ​ទេ។

៧).   ប្រព័ន្ធ​ចំណាយ Samsung Pay៖ ចំពោះ Apple Pay ​គឺ​ជា​ប្រព័ន្ធ​ចំណាយ​លុយ​ទំនើប​មួយ។ ប៉ុន្តែ​សម្រាប់​ប្រព័ន្ធ​ចំណាយ​ថ្មី​របស់​ក្រុមហ៊ុន Samsung ដែល​ទើប​តែ​ដាក់​ឲ្យ​ប្រើ​ប្រាស់​ជា​លក្ខណៈ​សាកល្បង​នេះ​វិញ ( Samsung Pay beta ) ​គឺ​រឹត​តែ​ទំនើប​​ដោយ​វា​អាច​ប្រើ​ប្រាស់​បាន​គ្រាប់​ជា​មួយ​នឹង​គ្រប់​ស្ថានីយ​ទូទាត់​ប្រាក់​ទាំង​អស់​នៅ​សហរដ្ឋអាមេរិក។

៨).   Split screen apps៖ ​នៅ​លើ​ Samsung Galaxy Note 5 ​អាច​ឲ្យ​អ្នក​ប្រើ​ប្រាស់​បើក​ដំណើរការ​​ និង​ប្រើ​ប្រាស់​កម្មវិធី​ច្រើន​នៅ​លើ​ផ្ទៃ​ Windows ​​អេក្រង់​ទូរសព្ទ​​​ក្នុង​ពេល​តែ​មួយ និង​​​គ្រប់​ទម្រង់​អេក្រង់​មិន​ថា​ផ្ដេក​ ឬ​បញ្ឈរ​នោះ​ទេ​។ តែ​ចំពោះ​ iPhone 6s Plus វិញ​គឺ​អាច​ប្រើ​កម្មវិធី​បាន​ច្រើន​​ក្នុង​ពេល​តែ​មួយ​ដែរ​​តែ​​​បាន​​នៅ​លើ​ផ្ទៃ​ផ្ដេក​នៃ​​អេក្រង់។

បើ​ទោះ​បី​ជា​ចំណុច​ខាង​លើ​នេះ​បាន​បង្ហាញ​ឲ្យ​ឃើញ​ថា​ Galaxy Note 5 ​មាន​ប្រៀប​ជាង​ iPhone 6s Plus ក៏​ដោយ​ ប៉ុន្តែ​ក៏​នៅ​មាន​ចំណុច​ជា​ច្រើន​ផ្សេង​ទៀត​ដែល​អាច​តម្រូវ​តាម​ចំណង់​ចំណូល​ចិត្ត​របស់​អ្នក​ប្រើ​ប្រាស់ផ្សេងៗ​គ្នា៕

អាន​បន្ត៖ មុន​នឹង​ដំឡើងទៅ​​ iOS 9 ស្អែក​នេះ​ តើ​អ្នក​ប្រើប្រាស់​iPhone, iPad និង iPod ត្រូវ​​ដឹង​​អី្វ​​ខ្លះ?

ប្រែ​សម្រួល៖ សំនៀង ប្រភព៖ zdnet