ទ្រព្យសម្បត្តិហូរហៀររបស់តារាសម្ដែងស្រីចិនទាំង ៣ ដែលល្បីថាពូកែរកលុយ

2015-09-17 21:10:02
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាភាពយន្តចិន Carina Lau, Charmaine Sheh, Fan Bing Bing សុទ្ធតែមិនលាក់លៀមថាខ្លួនត្រូវការលុយនិងចង់រកលុយដោយគ្រប់វិធីសាស្ត្រទាំងអស់។

Charmaine Sheh – តារាឯកប៉ុស្តិ៍ TVB មានទ្រព្យសម្បត្តិរាប់រយលានដុល្លារ

Charmaine Sheh មានឈ្មោះល្បីនៅទីផ្សារហុងកុងជាងនៅចិនដីគោក ដែលជាមូលហេតុទ្រព្យសម្បត្តិរបស់តារា TVB រូបនេះមិនត្រូវបានចុះផ្សាយច្រើន។ ប៉ុន្តែតារាសម្ដែងស្រីនេះបានធ្វើឲ្យអ្នកដទៃចាប់អារម្មណ៍នៅពេលប្រកាសថា "ជឿជាក់លើលុយកាក់ លុយធ្វើឲ្យខ្ញុំមានទំនុកចិត្ត"។ ចាប់ពីពេលនោះមក សារព័ត៌មានចាប់ផ្ដើមចាប់អារម្មណ៍ទៅលើទ្រព្យសម្បត្តិរបស់តារាវ័យ ៤០ ឆ្នាំរូបនេះ។ អ្នកកាសែតភ្ញាក់ខ្លួនព្រើតនៅពេលដឹងថា Charmaine មានទ្រព្យសម្បត្តិឡើងរហូតដល់រាប់រយលានយាន់ (ប្រមាណ ១៥០លានដុល្លារ)។

តួស្រីរឿង "Can't Buy Me Love” រកបានប្រាក់ចំណូលរាប់មិនអស់ពីការរកស៊ីអចលនទ្រព្យ។ Charmaine ធ្លាប់រកបាន១០ លានដុល្លារ នៅពេលលក់ភូមិគ្រឹះនៅ Beacon Hill។ តាមការស្ទាបស្ទង់ តារាដែលធ្លាប់ជាបវរកញ្ញាហុងកុងរូបនេះ ក្ដាប់អចលនទ្រព្យក្នុងដៃ ៦កន្លែងដោយក្នុងនោះមាននៅ Sai Kung, Happy Vally និង Nine Dragons។ តាមការប៉ាន់ស្មានតម្លៃអចលនទ្រព្យសរុបរបស់ Charmaine ឡើងដល់ ៩០លានដុល្លារ (ប្រមាណ ១៤១លានដុល្លារ)។

នៅពេលថ្មីៗនេះនៅពេលឮថា Charmaine Sheh ចង់ចុះចេញពីទ្រនំ TVB ប៉ុស្តិ៍ទូរទស្សន៍នេះដោយសារតែខ្លាចបាត់អ្នករកចំណូលឲ្យខ្លួនបាន ហ៊ានចំណាយ៦ លានដុល្លារអាមេរិក ដើម្បីទាក់ទាញតារាមួយនេះឲ្យនៅតទៅទៀត។

Fan Bing Bing – តារាសម្ដែងចិនរកលុយបានច្រើនជាងគេ

Fan Bing Bing ចាប់ផ្ដើមល្បីឈ្មោះនៅពេលដើរតួអ្នកបម្រើក្នុងរឿង "ព្រះនាងយេយេ" តែនៅពេលនេះតារាវ័យ ៣៥ ឆ្នាំរូបនេះបានក្លាយទៅជាតារាដែលមានឥទ្ធិពលជាងគេនៅប្រទេសចិន។ នៅពេលដែលនិយាយដល់រឿងលុយកាក់ Fan BingBing និយាយដោយចំហថា "ខ្ញុំគឺជាអ្នកមាន"។ Bing Bing បានសង្កត់ថា "លុយកាក់គឺជាអ្នកកំណត់ថានរណាម្នាក់ជោគជ័យឬក៏អត់" ក្រោយពេលត្រូវបានគេចោទថាខ្លួនគ្មានសមត្ថភាព។

ក្នុងកំឡុងពេលជិត ២០ ឆ្នាំក្នុងសិល្បៈ ប្រាក់ចំណូលរបស់ម្ចាស់ក្សត្រីក្នុងរឿង "The Empress of China” បានកើនឡើងគួរឲ្យកត់សម្គាល់។ អ្នកគាំទ្រហៅតារារូបនេះថា ថៅកែ Fan ក៏ដោយសារតែ នាងវីវក់នឹងការរកលុយពេក។ ក្នុងតារាងរបស់ទស្សនាវដ្ដី Forbes តារាមានសម្បុរសខ្ចីរូបនេះជាប់ចំណាត់ថ្នាក់លេខ ៤ ជាតារាស្រីដែលមានតម្លៃខ្លួនខ្ពស់ជាងគេ ដោយរកបាន ២១លានដុល្លារក្នុងឆ្នាំទៅ។ អ្នកដឹកនាំសម្ដែងទាំងឡាយទទួលស្គាល់ថា Fan BingBing ជាតារាទាក់ទាញទស្សនិកជនខ្លាំងដែលធ្វើតម្លៃខ្លួនរបស់នាងខ្ពស់កប់ពពក។

ចុចអាន៖Fan Bingbing ជាប់លេខ៤ជាតារាសម្ដែងស្រីរកចំណូលបានច្រើនជាងគេលើលោក

ជាមធ្យមក្នុងកម្មវិធីមួយ ដើម្បីអញ្ជើញ Fan Bing Bing ឲ្យចូលរួមម្ចាស់កម្មវិធីត្រូវចំណាយប្រមាណ ១ សែនដុល្លារ។ នៅក្នុងកម្មវិធីមួយនៅ Wuhan មិត្តស្រីរបស់ Li Chen រូបនេះ ត្រូវបានអញ្ជើញឲ្យចូលរួមក្នុងរយៈពេលមួយម៉ោង ដោយទទួលបានតម្លៃខ្លួន ៦ ម៉ឺនយាន់ក្នុង១នាទី (៩៤០០ដុល្លារ)។

Carina Lau – រាជិនីវិនិយោគហុងកុង

ពេលរំឭកដល់ Carina Lau គេស្គាល់ពីទេពកោសល្យវិនិយោគជាងសមត្ថភាពសិល្បៈរបស់តារាមួយនេះ។ តារាវ័យ ៤៩ ឆ្នាំរូបនេះធ្លាប់ប្រកាសក្តែងៗថា "លុយពិតជាអាចទាក់ទាញខ្ញុំបាន។ ហេតុអី ចាំបាច់ត្រូវពឹងពាក់មនុស្សប្រុសអ្នកមាននៅពេលដែលខ្លួនយើងអាចរកលុយបានច្រើន? ខ្ញុំស្រលាញ់លុយតែខ្ញុំមិនបន្ថោកខ្លួនដើម្បីវានោះទេ។ នៅចំណុចណាមួយលុយជាមធ្យោបាយដែលខ្ញុំបង្ហាញពីឥទ្ធិពលរបស់ខ្លួន"។

Carina Lau វិនិយោគទៅលើ ភោជនីយដ្ឋាន ក្លឹបរាត្រី ផ្សារទំនើបនៅ ហុងកុងនិងសៀងហៃ ដោយគ្រប់គ្រងជំនួញទាំងនេះដោយខ្លួនឯង និងរកបានចំណូលច្រើនលើសលុប។

គេហទំព័រ Sina បានឲ្យដឹងថាប្ដីរបស់ Carina តារាសម្ដែងល្បីឈ្មោះ Leung Chiv Vai ទោះបីរកលុយបានច្រើនមែនតែមិនអាចប្រៀបផ្ទឹមនឹងប្រពន្ធបានទេ។ អចលនទ្រព្យឈរឈ្មោះដោយ Carina មានមិនតិចជាង១០ កន្លែងទេនៅប្រទេសចិន។ ក្នុងឆ្នាំ ២០១៤ តារាសម្ដែងនេះមិនបដិសេធថាខ្លួនមានទ្រព្យសម្បត្តិប្រមាណ ៨០០លានដុល្លារហុងកុង (១០៣លានដុល្លារអាមេរិក)៕

ចុចអាន៖តារាល្បីៗដែលអ្នកមិនដឹងថា ជាអ្នកក្រមុនចូលសិល្បៈ

ប្រែសម្រួល៖ សុវណ្ណផៃ ប្រភព៖ zing