១០ឆ្នាំក្នុងសិល្បៈ Rihanna ធ្លាប់មានទំនាក់ទំនងស្នេហ៍ជាមួយតារាណាខ្លះ?

2015-09-18 15:49:04
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមពេលបច្ចុប្បន្នតារាចម្រៀង Rihannaបានចូលប្រលូកក្នុងវិថីសិល្បៈអស់រយៈពេល១០ឆ្នាំគត់។ ក្រឡេកមកមើលជីវិតស្នេហារបស់តារាវ័យ២៧ឆ្នាំនេះវិញ អំឡុងពេល១០នេះតើម្ចាស់បទ "Where Have You Been?” ធ្លាប់មានស្នេហាជាមួយនរណាខ្លះ?

១. ក្នុងឆ្នាំ ២០០៧ Rihannaនិងតារាសម្ដែងអាមេរិក Shia LaBeouf ធ្លាប់ជាគូស្នេហ៍នឹងគ្នា។ ប៉ុន្តែអ្នកទាំងពីរមិនបានប្រកាសជាសាធារណៈពីទំនាក់ទំនងនេះឡើយ។ យ៉ាងណាមិញ ក្នុងឆ្នាំ២០០៩ LaBeoufបានទម្លាយប្រាប់ទៅកាន់ទស្សនាវដ្ដី Playboyក្រោយបែកបាក់គ្នាថា គេធ្លាប់មានស្នេហាជាមួយ Rihanna តាំងពីឆ្នាំ២០០៧។

២. អំឡុងឆ្នាំ ២០០៨-២០០៩ ម្ចាស់បទ "Diamonds” និងតារាចម្រៀង Chris Brown ធ្លាប់ភ្ជាប់ចំណងស្នេហ៍ជាមួយគ្នា ខណៈដែលអ្នកទាំងពីរត្រូវបានគេដឹងជាមិត្តភ័ក្ដិនឹងគ្នាតាំងពីឆ្នាំ ២០០៥។ ពួកគេបានចាប់ផ្ដើមមានទំនាក់ទំនងស្នេហានៅរង្វង់ឆ្នាំ២០០៨ ប៉ុន្តែតារាទាំងពីរដូងមិនបានប្រកាសឲ្យ មហាជនដឹងនោះទេ។ ទោះជាយ៉ាងណា ស្នេហាក្មេងខ្ចីត្រូវបានបញ្ចប់ និងបែកធ្លាយនៅពាក់កណ្ដាលឆ្នាំ២០០៩ ក្រោយ Brown បានប្រើអំពើហិង្សាទៅលើ Rihanna ហើយតារាចម្រៀងស្រីរូបនេះក៏បានបង្ហាញរបួសស្នាមឲ្យមហាជនបានដឹង។

៣. ពាក្យចចាមអារ៉ាមស្នេហារវាង Rihanna និង Drake បានកើតឡើង នៅក្នុងឆ្នាំ២០០៩។ ក្នុងកិច្ចសម្ភាសន៍ក្នុងកម្មវិធីវិទ្យុមួយ តារាស្រីស្បែកខ្មៅរូបនេះបានបង្ហើបរឿងក្នុងចិត្តថា គេនិង Drakeកំពុងព្យាយាមផ្ដើមមនោសញ្ចេតនានឹងគ្នា ប៉ុន្តែពេលវេលាហាក់មិនស័ក្ដិសម។ Rihanna បានបន្ថែមទៀតថា៖ "ខ្ញុំពិតជាចាប់អារម្មណ៍លើ Drake ប៉ុន្តែខ្ញុំគិតថាវាមិនអាចទៅរួច។ ពួកយើងមិនចង់មានអ្វីវែងឆ្ងាយទេ"។

៤. Rihanna ធ្លាប់ជាមិត្តស្រីរបស់កីឡាករបាល់បោះ Matt Kemp នៅឆ្នាំ២០១០។ លើនេះ Rihannaហ៊ានប្រកាសជាសាធារណៈ ចំពោះទំនាក់ទំនងស្នេហាមួយនេះ។ ដោយតារាចម្រៀងនិងសម្ដែងនេះបង្ហាញការពិតដោយមិនមានការអៀនខ្មាសជាមួយទស្សនាវដ្ដី Elle ថា៖ "ខ្ញុំមានមិត្តប្រុសម្នាក់។ ខ្ញុំសប្បាយចិត្តខ្លាំងណាស់។ ខ្ញុំមានអារម្មណ៍ថាមានសេចក្ដីសុខខ្លាំងណាស់"។

៥. ពាក្យចចាមអារ៉ាមស្នេហាបានលេចឡើងកាលពីដើមឆ្នាំ២០១៥ នៅពេលដែលតារាសម្ដែងក្នុងរឿង "Titanic” Leonardo DiCaprio បានទៅចូលរួមក្នុងពិធីកំណើតគ្រប់២៧ឆ្នាំរបស់ Rihanna ។ ប៉ុន្តែអ្វីៗក្លាយជាការពិត នៅពេលដែលអ្នកទាំងពីរបានចេញមកបញ្ជាក់ថា ពួកគេពិតជាមានទំនាក់ទំនងជាមួយគ្នាប្រាកដមែន។

៦.កាលពីខែកក្កដា ឆ្នាំ២០១៥ តារាចម្រៀង Rihannaនិងអ្នកប្រណាំងរថយន្ត F1 Lewis Hamiltonត្រូវគេសង្ស័យថាកំពុងមានទំនាក់ទំនងស្នេហាជាមួយគ្នា បន្ទាប់ពីអ្នកទាំងពីរបាននៅជាមួយគ្នាក្នុងភោជនីយដ្ឋាន Da Silvano ក្នុងទីក្រុងញីវយ៉ក។ ប្រភពមិត្តស្និទ្ធស្នាលរបស់ Rihanna បានប្រាប់សារព័ត៌មាន The Sunថា ៖” ពួកគេបានទាក់ទងគ្នាក្នុងឆ្នាំនេះហើយក៏ចូលចិត្តគ្នាទៅវិញទៅមក ផងដែរ។

៧. ក្នុងឆ្នាំ២០១៥ដដែល សេចក្ដីរាយការណ៍មួយបានបង្ហាញថា Rihanna និងតារារ៉េប Travi$ Scott អាចកំពុងមានស្នេហាជាមួយគ្នា ក្រោយពួកគេបានឱបកៀកកើយស្និទ្ធស្នាលក្នុងពិធីបង្ហាញម៉ូដ New York Fashion Week កាលពីចុងសប្ដាហ៍។ ពេលថ្មីៗនេះអ្នកទាំងពីរបានចូលរួមថតផ្សព្វផ្សាយឲ្យផលិតផល Puma ជាមួយគ្នាទៀតផង។