ស្ពានកញ្ចក់ឆ្លងជ្រោះកម្ពស់១៨០ម៉ែត្រ ដាក់ឲ្យដំណើរការហើយ
- 2015-09-25 16:30:04
- ចំនួនមតិ 0 | ចំនួនចែករំលែក 0
ស្ពានកញ្ចក់ឆ្លងជ្រោះកម្ពស់១៨០ម៉ែត្រ ដាក់ឲ្យដំណើរការហើយ
ចន្លោះមិនឃើញ
ស្ពានកញ្ចក់មួយខ្សែដ៏កម្របានឃើញ បានបើកឲ្យដំណើរការហើយកាលពីថ្ងៃព្រហស្បតិ៍ទី ២៤ កញ្ញាម្សិលមិញនៅតំបន់រមណីយដ្ឋាន Shiniuzhai ខេត្តហ៊ូណាន ប្រទេសចិន។ ស្ពាននេះបានជាប់ជាស្ពានបាតកញ្ចក់វែងជាងគេបំផុតក្នុងលោក ដែលមានប្រវែង ៣០០ម៉ែត្រ និងកម្ពស់ ១៨០ម៉ែត្រ ដើម្បីឆ្លងជ្រោះ។
ក្រោយបើកសម្ពោធដាក់ឲ្យដំណើរភ្លាម ក្រុមអ្នកទេសចរបានរៀនដើរទាំងអាការៈវិលមុខ ភ័យញ័រខ្លួន ដើម្បីចង់ក្លាយជាអ្នកទៅទស្សនាដំបូងគេដែលបានដើរកាត់។ ពួកគេទាំងអស់តម្រូវឲ្យដើរពាក់ស្រោមជើងទន់ខាងក្រៅ ដើម្បីអាចឆ្លងកាត់បាន។
រូបភាពជាច្រើនសន្លឹកត្រូវបានបង្ហោះលើប្រព័ន្ធអ៊ីនធឺណិត ដោយបង្ហាញឲ្យឃើញអ្នកទេសចរមានភាពភ័យខ្លាចបន្តិច និងក្រាញតោងខ្សែកាបស្ពាននៅមួយកន្លែងមិនហ៊ានដើរទៅមុខទៀតឡើយ។
ពីមុនកន្លែងស្ពានកញ្ចក់ឆ្លងនេះ ជាស្ពានឈើដែលបានភ្ជាប់កំពូលភ្នំ Stone Buddha ហើយឥឡូវស្ពាននេះវែងជាងស្ពានឈើមុនទៅទៀត។ ក្រុមវិស្វករចំនួន ១១នាក់ បានធ្វើកិច្ចការលើស្ពាននេះ ដែលចំណាយពេលជាងបីបួនខែហើយ ដើម្បីជំនួសស្ពានបន្ទះក្ដារ និងក្លាយជាស្ពានកញ្ចក់ដែលវែងជាងគេបំផុតទៀតផង។
អ្វីដែលគួរឲ្យព្រឺព្រួចមួយទៀតនោះគឺ ស្ពាននឹងយោលបន្តិច ពេលមនុស្សដើរឆ្លងកាត់។ ក្រុមអ្នកជំនាញប្រាប់ថា កញ្ចក់នេះមានសភាពស្វិតរឹងមាំជាងកញ្ចក់បង្អួចធម្មតាចំនួន ២៥ដងឯណោះ៕
ចុចអាន៖ ចិនកម្ទេចស្ពានឆ្លងក្រុងប្រវែងជិត២៥០ម៉ែត្រ តែ២វិនាទីប៉ុណ្ណោះ
ចុចអាន៖ ស្ពានជិត១១គ.ម បត់បែនលើទន្លេតាមជ្រលងភ្នំនៅចិន អមដោយទេសភាពស្អាតអស់ទាស់!
ចុចអាន៖ ទិដ្ឋភាពស្ពានពោងឆ្លងកាត់ទន្លេដែលទាហានចិនប្រើពេលត្រឹម១៥នាទីរួចស្រេច
ប្រែសម្រួល៖ ឡេង ភារុណ ប្រភព៖ dailymail