DJ ក្ដឹប៖ អ្នកធ្លាប់ក្រ ទើបដឹងថា លំបាកប៉ុណ្ណា

2015-10-07 21:31:30
ចំនួនមតិ 0 | ចំនួនចែករំលែក 0

ចន្លោះមិនឃើញ

DJ ក្ដឹប បានលើកឡើងថា ដោយសារកើតមកជាកូនអ្នកក្រខ្វះខាតមុខក្រោយ ទើបធ្វើឱ្យលោកយល់ច្បាស់ជីវិតបែបនេះ និង ចិញ្ចឹមចិត្តចង់ជួយពលរដ្ឋខ្មែរ កំពុងរស់នៅក្នុងស្ថានភាពដូចគ្នាដែរ។

នាយ ក្ដឹប និយាយថា៖ "ខ្ញុំក៏ជាអ្នកក្រដែរ អ៊ីចឹងមានតែអ្នកក្រទេ បានយល់ពីអារម្មណ៍អ្នកក្រដូចគ្នាថា អាទ័លហ្នឹងវាលំបាកប៉ុណ្ណានោះ នឹកឃើញរឿងនោះម្ដងៗចេះតែចង់ស្រក់ទឹកភ្នែក"។ តារាក្រមិចក្រមើមរូបនេះបន្តថា ដោយសារតែហេតុផលលើកឡើងទាំងអស់ហ្នឹងហើយ ទើបជំរុញឱ្យលោកតែងចូលរួមសកម្មភាពសប្បុរសធម៌នានា ដើម្បីស្វែងរកថវិកាជួយដល់អ្នកខ្សត់ខ្សោយ ទោះរូបនាយមិនបានទទួលកម្រៃក៏ដោយ។

តារា Rap ដដែល រៀបរាប់បន្តថា កន្លងមកធ្លាប់បានធ្វើសកម្មភាពជាច្រើនមកហើយ ដើម្បីជាប្រយោជន៍សម្រាប់ពលរដ្ឋខ្មែរកំពុងរស់នៅក្នុងជីវភាពលំបាក នៅតាមបណ្ដាខេត្តនានា ប៉ុន្តែរូបគេមិនដែលបង្ហាញ ឬផ្សព្វផ្សាយឱ្យនរណាបានដឹងនោះទេ។ ក្នុងនោះក៏បានចូលរួមសកម្មភាពសប្បុរសធម៌ជាមួយអង្គការមួយចំនួនផងដែរ តាមរូបភាពសិល្បៈ ក្នុងគោលបំណងតែមួយ។

ជាក់ស្ដែងថ្មីៗនេះ នាយក៏ទើបតែបរិច្ចាគប្រាក់ជាង ១ ម៉ឺនដុល្លារអាមេរិក ដែលបានពីការសម្ដែងនៅប្រទេសកូរ៉េជាមួយតារាចម្រៀង មាស សុខសោភា ជួយដល់មន្ទីរពេទ្យគន្ធបុប្ផាក្នុងការព្យាបាលជំងឺដល់កុមារក្រីក្រ។ នាយបន្តថា សកម្មភាពបែបនេះមិនទាន់បញ្ចប់នោះទេ និង ស្នើឱ្យបណ្ដាអ្នកឧបត្ថម្ភតាមបណ្ដាប្រទេសនានា ជួយជ្រោមជ្រែងរូបនាយ បានទៅសម្ដែងនៅក្រៅប្រទេសម្ដងទៀត ដើម្បីស្វែងរកមូលនិធិបន្តជួយដល់អ្នកក្រីក្រកំពុងត្រូវការជំនួយបន្ថែម៕

អានអត្ថបទ៖ តារាចម្រៀងល្បី ៣ រូបនាំយកថវិកាជាង ១០ ០០០ ដុល្លារជួយមន្ទីរពេទ្យគន្ធបុប្ផា

អត្ថបទ៖ សំ ជំនាញ

រូបថត៖ Facebook