សិស្សអវត្តមានទម្លាយមូលហេតុមិនទៅប្រលងបាក់ឌុបលើកទីពីរ

2014-10-18 17:38:47
ចំនួនមតិ 0 | ចំនួនចែករំលែក 0

ចន្លោះមិនឃើញ

បាក់ឌុបលើកទីពីរ សិស្សអវត្តមានក្នុងថ្ងៃប្រលងមានចំនួនច្រើនលើសលប់ ហើយមូលហេតុចម្បងដែលរារាំងចិត្តបេក្ខជនមិនចង់ចូលរួមការប្រលងដោយសារគ្មានជំនឿថា អាចប្រលងជាប់។

ជាក់ស្ដែង កញ្ញា ស្រីនិច ប្រលងនៅមណ្ឌលជាស៊ីមបឹងកេងកង បានមកប្រលងត្រឹមមួយថ្ងៃប្រាប់ពីមូលហេតុថា មុនថ្ងៃប្រលងមកដល់ស្រីនិចដឹងខ្លួនច្បាស់ថា ប្រលងលើកនេះ មុខជាធ្លាក់ទៀតជាមិនខាន ប្រសិនបើនៅតែតឹងដូចលើកទីមួយនោះ។

ស្រីនិច បញ្ជាក់ថា៖ “បងអើយ!មិនមែនខ្ញុំខូច មិនចូលរៀនទេ។ ខ្ញុំទៅរៀនគួររាល់ថ្ងៃដែរ តែថ្ងៃទីមួយហ្នឹង ខ្ញុំធ្វើអត់បានសោះ ម្យ៉ាងតឹងពីខាងក្រៅទៀត ខ្ញុំគ្មានជំនឿថាជាប់ឡើយ។ ខ្ញុំបាក់ទឹកចិត្ត គ្មានកម្លាំងបន្តទៀតទេ ទោះមកប្រលងទៀតក៏មិនជាប់ដែរ។ ពេលធ្វើអត់បាន ខ្ញុំអស់សង្ឃឹមខ្លាំងណាស់ ចង់យំ។ ហើយខ្ញុំ Call សួរមិត្តភ័ក្ដិខ្ញុំ គេថាក៏អត់មកប្រលងម្ដងទៀតដែរ ដោយសារតែមិនមានលទ្ធភាពធ្វើដំណើរទៅមណ្ឌលប្រលង ព្រោះឆ្ងាយពីកន្លែងស្នាក់នៅពេក។ ប្រលងធ្លាក់លើកទីមួយ ខ្ញុំខ្មាសគេគ្រប់គ្រាន់ហើយ អត់ចង់ខ្មាសគេទៀតឡើយ" ។

កញ្ញាម្នាក់ទៀតសុំមិនបញ្ចេញឈ្មោះ រៀននៅវិទ្យាល័យទួលស្វាយព្រៃប្រាប់ថា បើមានសង្ឃឹមខ្លះ ប្រហែលកញ្ញាទៅ តែលើកនេះអត់សោះហើយដឹងមុនរួចទៅហើយថា ប្រលងធ្លាក់។

“ថ្ងៃនោះម៉ាក់ខ្ញុំដេញឲ្យមកប្រលងដែរ តែខ្ញុំប្រាប់ថា ខ្ញុំចង់រកស៊ីជាង។ ខ្ញុំគ្មានសមត្ថភាពលើការរៀនសូត្រទេ" ។

លោក រស់ សាលីន មន្ត្រីអ្នកនាំពាក្យក្រសួងអប់រំយុវជន និង កីឡា ធ្លាប់បានប្រាប់ Sabay ថា សិស្សអវត្តមានទាំងនោះអាចមានសមត្ថភាពទាប ឬដោយប្រការណាមួយ ដែលយើងមិនអាចដឹង។

លោក ហង់ ជួនណារ៉ុន រដ្ឋមន្ត្រីក្រសួងអប់រំបានផ្ដល់បទសម្ភាសន៍ឲ្យអ្នកសារព័ត៌មានក្នុងស្រុកមួយថា ក្រោយដំណើរការប្រឡងភាពអវិជ្ជមានទូទៅបានកើតឡើងតិចជាងលើកទី១ តែចំនួនបេក្ខជនបានអវត្តមានច្រើនរហូតជាង ៦៧០០ នាក់ ដែលលើកទីមួយមានតែជាង ១០០០ នាក់ ប៉ុណ្ណោះ។ សិស្សដែលប្រឡងជាប់លោកទី២នេះ គ្រប់និទ្ទេសទាំងអស់នឹងមិនទទួលបានអាហារូបករណ៍ពីសាលារដ្ឋនោះទេ តែពួកគេអាចមានឱកាសទទួលបានអាហារូបករណ៍ពីសាលាឯកជន។ លោកបញ្ជាក់ទៀតថា នៅឆ្នាំក្រោយមិនមានរៀបចំការប្រឡងលើកទី ២ ដូចឆ្នាំនេះទៀតទេ។

លទ្ធផលបាក់ឌុបលើកទី២នឹងប្រកាសនៅល្ងាចថ្ងៃទី៤ វិច្ឆិកា ២០១៤។

សូមអាន៖ ធ្លាយបេក្ខជនជិត១ម៉ឺននាក់ បោះបង់ចោលប្រលងបាក់ឌុបលើកទី២

អត្ថបទ៖ លឹម សុនា