មង្គលការកូនភ្លោះជាមួយកូនភ្លោះ ស្វែងរកតាមហ្វេសប៊ុក៥ឆ្នាំទើបជួប

2015-11-13 17:03:39
ចំនួនមតិ 0 | ចំនួនចែករំលែក 0

ចន្លោះមិនឃើញ

មង្គលការក្នុងប្រទេសឥណ្ឌាមួយរបស់កូនកំលោះជាបងប្អូនភ្លោះជាមួយនឹងកូនក្រមុំជាបងប្អូនភ្លោះដូចគ្នា បានធ្វើឲ្យមនុស្សជាច្រើនចាប់អារម្មណ៍។

ខាងសារព័ត៌មានបានចាប់អារម្មណ៍មង្គលការខាងលើនោះ និងបានសាកសួរអំពីដំណើរដើមទងដែលពួកគេរកដៃគូជីវិតដែលជាបងប្អូនភ្លោះដូចគ្នា។

តាមប្រភពសារព័ត៌មាន អាពាហ៍ពិពាហ៍កូនភ្លោះពីរគូខាងលើគឺបានធ្វើឡើងក្នុង Thrissur រដ្ឋ Kerala ប្រទេសឥណ្ឌា។ កូនកំលោះជនជាតិឥណ្ឌាជាបងប្អូនប្រុសភ្លោះ គឺ Dinker និង Dilraj Varikkassery សព្វថ្ងៃធ្វើការក្នុងវិស័យព័ត៌មានវិទ្យា (IT) ចំណែកកូនក្រមុំគឺ Reena និង Reema ធ្វើការជាគ្រូពេទ្យទាំងពីរនាក់បងប្អូនភ្លោះ។

Dinker និង Dilraj ជាកូនកំលោះបានឲ្យដឹងថាតាំងពីរៀននៅវិទ្យាល័យមកម្ល៉េះ ពួកគេចូលចិត្តរបស់របរដូចគ្នា ស្លៀកសំលៀកបំពាក់ដូចគ្នា និងអ្វីៗទាំងអស់ស្ទើរតែដូចគ្នា។ លុះដល់ពេញវ័យ អាយុគ្រប់ការ Dinker និង Dilraj មានការងារធ្វើច្បាស់លាស់ក្នុងវិស័យ IT ដូចគ្នាទៀតនោះ ពួកគេបានគិតពីរឿងអនាគតគូស្រករស្រុះស្រួលគ្នាគឺសម្រេចចិត្តជ្រើសយកនារីជាកូនក្រមុំបងប្អូនភ្លោះដូចគ្នា។

មុននឹងបានជួបReena និង Reema កូនកំលោះ Dinker និង Dilraj បានឲ្យដឹងថាពួកគេបានស្វែងរកអស់រយៈ៥ឆ្នាំទើបជួបដៃគូដែលគេពេញចិត្ត ដោយប្រើគំនិតមួយគឺបង្កើត ក្រុមលើទំព័រហ្វេសប៊ុក ដាក់ឈ្មោះថា All Kerala Twins Group។ ក្រុមដែលប្រមូលផ្ដុំដោយសមាជិកជាបងប្អូនភ្លោះជាច្រើន ហើយពេលនោះហើយដែលDinker និង Dilraj មានឱកាសបានជួប Reena និង Reema និងចាប់ចិត្តស្រលាញ់បងប្អូនភ្លោះស្រីពីរនាក់នេះ ចំណែក Reena និង Reema ក៏ពេញចិត្តនឹង Dinker និង Dilraj ដែរ។

ទំនាក់ទំនងរវាង Dinker និង Dilraj ទៅកាន់ Reena និង Reema បានក្លាយជាស្នេហារឹងមាំ ចុងក្រោយពួកគេក៏ឈានដល់ថ្ងៃរៀបការនឹងគ្នា។ ក្នុងពិធីអាពាហ៍ពិពាហ៍របស់ពួកគេក៏បានអញ្ជើញ និងមានកូនក្មេងប្រុសស្រីជាកូនភ្លោះចូលរួមក្នុងកម្មវិធីថ្ងៃមង្គលនោះផងដែរ៕