នាងឆ្នាសប៉ុន្តែគួរឱ្យស្រឡាញ់

2015-11-16 17:45:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលខ្ញុំរៀនឆ្នាំទីមួយ គ្រួសារខ្ញុំបានរើផ្ទះពីបឹងកេងកងមកនៅភ្នំពេញថ្មី ហើយនៅរំលងផ្ទះខ្ញុំពីរ បីផ្ទះមានផ្ទះចិនលក់ចាប់ហួយមួយ ដែលល្បីថាមានកូនស្រីស្អាតហើយកំពូលឆ្នាស ឈ្មោះ ឃីម។ ខ្ញុំឆ្ងល់ដល់ហើយ ម៉េចក៏ស្រីស្អាតចាំបាច់ត្រូវតែឆ្នាសអញ្ចឹង? ធ្វើស្លូតៗខ្លះទៅមិនបានទេហ្អី?

រីឯខ្ញុំមិនតមស្រីស្អាតទេ ទោះជាឆ្នាសយ៉ាងណាក៏ដោយ ខ្ញុំចង់តែពុតនិស្ស័យនោះចេញ។ ថ្ងៃមួយខ្ញុំបានទៅផ្ទះរបស់នាងដើម្បីទៅទិញ ទឹកផ្លែឈើមួយកេស ចៃដន្យនាងនៅផ្ទះលក់តែម្នាក់ឯង បានដៃខ្ញុំបណ្ដោយ... មិនមែនចង់បំពារបំពានលើនាងទេ តែចង់ដឹងថានាងនោះឆ្នាសប៉ុណ្ណា?

«អ្នកលក់!» ទៅដល់ខ្ញុំហៅភ្លាម «យកអី?» នាងដកភ្នែកពីទូរទស្សន៍ ហើយសួរខ្ញុំកំបុតកំបុយគួរឱ្យក្នាញ់ «ទឹកក្រូចមួយកេស» នាងក៏ដើរតាំងៗទៅលើកទឹកក្រូចមួយកេសដូចលើកសំឡីត្បាល់ត្រចៀក ហើយទម្លាក់ព្រុសលើ ធុងទឹកកកក្រហម។ «ខ្ញុំអត់យកអាហ្នឹងទេយកអាក្រោមគេបំផុត» «ស្អី?» នាងធ្វើមុខក្រមូវ «យកឱ្យអត់? បើមិនយកទៅទិញតូបផ្សេងក៏បានដែរ» ខ្ញុំគំរាមទើបនាងដើរទៅរើម្ដងមួយៗ។ បានធ្វើបាបនាងពិតជាពេញចិត្តខ្ញុំតែម្ដងហើយ។

លុះក្រោយៗមកទៀត ខ្ញុំក៏ទៅញ៉េះញ៉ោះនាងទៀតតែមិនមែនទៅតែម្នាក់ឯងទេ ខ្ញុំហៅគ្នា បួន ប្រាំម៉ូតូទៅទិញឥវ៉ាន់ផ្ទះនាង ហើយពួកម៉ាកខ្ញុំក៏ចង់ដឹងដែរថា ឃីម ហ្នឹងឆ្នាសដូចខ្ញុំថាឬក៏អត់។ តែរឿងមិនគួរកើត បានកើតឡើង ដោយសារមិត្តភ័ក្ដិខ្ញុំនិយាយញ៉ោះនាងថា «ចង់ទិញអ្នកលក់»។ នាងក៏មិនអន់ដែរ ក៏តបមកថា «ស្អីពួកអាឡប់ឯង?»។ មិត្តភ័ក្ដិខ្ញុំនោះវាក្ដៅស្លឹកត្រចៀកដែលមានស្រីជេរដូច្នេះ ព្រោះកន្លងមកធ្លាប់តែមានស្រីអែបអបវា តែស្រីភ្នែកតឹងនេះជេរវាកប់ៗមាត់។ វាគំហកទៅកាន់ឃីមខ្លាំងៗ ហើយខ្ញុំក៏មិននឹកស្មានថា ស្រីល្អិតភ្នែកតឹងហ្នឹងហ៊ានយកអាចានដែកដែលត្រងទឹកកករលាយក្រោមធុងមកជះលើពួកខ្ញុំដែរ។ គ្នាខ្ញុំ៧ នាក់មិនមានអ្នកណាឮមាត់ទេ គឺឮតែមាត់ស្រីល្អិតនោះញ៉ែតៗ ដូចម៉ែផាន់។ នាងជេរបានពីរោះណាស់រហូតដល់ខ្ញុំសរសេរមិនចេញ មួយសន្ទុះក្រោយមកម៉ារបស់នាងក៏ចេញមក គាប់ជួនប៉ាខ្ញុំជិះឡានទៅធ្វើការកាត់តាមនោះដែរ ឃើញហេតុការណ៍នេះក៏ចុះមកអន្តរាគមន៍ដែរ ចុងក្រោយចាស់ៗកាត់សេចក្ដីឱ្យពួកយើងសុំទោសគ្នាទៅវិញទៅមក។

ចាប់តាំងពីថ្ងៃនោះមក ឱ្យតែពេលខ្ញុំទៅទិញអីនៅផ្ទះរបស់នាង នាងតែងតែថាគ្មានលក់ទេ ស្អីក៏ដោយក៏នាងថាអត់មានលក់ដែរ សូម្បីតែខ្ញុំឃើញរបស់នោះដាក់តាំងជ្រងោៗ ក៏ដោយ។ ប្រហែលជានាងខឹងនឹងខ្ញុំហើយ មានអី! ខ្ញុំដឹងថានាងខឹងតើ តែខ្ញុំចូលចិត្ត។

ថ្ងៃមួយពេលទៅទិញរបស់នៅទីនោះ ក៏ជួបនឹងម៉ារបស់នាងនៅលក់តែម្នាក់ឯង គាត់ពីមពើមលក់តែម្នាក់ឯងខ្ញុំក៏សម្រេចចិត្តថាគេចសាលាមួយថ្ងៃជួយលក់ចាប់ហួយគាត់។ លុះល្ងាចបន្តិចគាត់កាន់ទូរសព្ទមួយហុចមកខ្ញុំ ឱ្យតេទៅចៅរបស់គាត់ ផ្ដាំឱ្យនាងទិញម្ហូបផង។ ខ្ញុំចុចរកឈ្មោះចៅគាត់ហើយ ខ្ញុំឱ្យគាត់អ្នកនិយាយ តែខ្ញុំក៏បានកត់លេខនាងទុកដែរ។

ពីរបីថ្ងៃក្រោយមកខ្ញុំក៏តេទៅនាង អុកឡុកនាងពេញមួយយប់ ដោយខ្ញុំបានទិញស៊ីមជាច្រើនទុកធ្វើបាបនាង។ ជួនទៅខ្ញុំក៏តេទៅទារលុយតុងទីននាង ជួនទៅក៏តេទៅចោទថានាងប្រពន្ធចុងគេ ជួនទៅតេទៅនាងម៉ោង ១២យប់លេង ឯជួនកាលទៀតតេទៅប្រាប់នាងឱ្យមកបូមលូបង្គន់។ គ្រប់ពេលដែលខ្ញុំធ្វើបាប នាងដឹងតែជេរហើយស្រីឆ្នាសហ្នឹងនោះ កំពុងតែជំនាញខាងជេរផង។

(រូបតំណាង)

តែលើកនេះចង់ធ្វើបាបនាងទៀតក៏លែងបានព្រោះនាងបិទទូរសព្ទ ស្អែកហើយ ស្អែកទៀត ស្អែកប៉ុន្មានដងក៏នាងបិទទូរសព្ទដែរ។ ពេលទៅទិញឥវ៉ាន់ផ្ទះនាង ក៏មិនឃើញគឺឃើញតែម៉ាក់របស់នាង និងម៉ារបស់នាងប៉ុណ្ណោះ។

ខ្ញុំមានអារម្មណ៍ថាបាត់នាង ដូចបាត់ការងារមួយក្នុងជីវិតប្រចាំថ្ងៃរបស់ខ្ញុំដែរអញ្ចឹង ព្រោះពីមុនយ៉ាងហោចណាស់ក៏ចំណាយ ១០ នាទីរាល់ថ្ងៃក្នុងការរករឿងនាងដែរ។

ប្រហែលជាមួយអាទិត្យក្រោយមកខ្ញុំដាច់ចិត្តលបសួរ ម៉ារបស់នាង គាត់ក៏ប្រាប់ថានាងជាប់អាហារូបករណ៍ទៅរៀននៅថៃបាត់ហើយ។ ស្មានតែនាងជេរពូកែ តែរៀនក៏ពូកែដែរ! ខ្ញុំឮហើយស្រងាកចិត្តភ្លាម ដឹងដែរថានាងមិនត្រូវជាស្អីនឹងខ្ញុំទេតែ ដូចម៉េចមិនដឹងទេ ពិបាកនិយាយ ពិបាករៀបរាប់។

២ឆ្នាំក្រោយមកទៀត គឺនៅពេលដែលខ្ញុំរៀនឆ្នាំទីបី ប៉ាម៉ាក់ ខ្ញុំហើយនិងប្អូនប្រុសខ្ញុំ នាំគ្នាទៅលេងថៃ ជាចៃដន្យខ្ញុំក៏បានជួបនាងនៅក្នុងរថភ្លើងក្រោមដីនៅបាងកកពេលត្រឡប់មកពីដើរផ្សារវិញ។ នាងជាមួយនឹងមិត្តភ័ក្ដិខ្មែរនាងជាច្រើនទៀត មិនបានឃើញខ្ញុំទេ តែខ្ញុំឯណេះវិញ ឃើញគេហើយដូចរើសបានលុយ មួយរយដុល្លារអញ្ចឹង។ ភ្នែកនាងនៅតែតូចដូចដើម ឯការស្លៀកពាក់ស៊ីវិល័យគួរសម ខ្ញុំខំដើរទៅក្បែរប្រុងសួរនាំនាងដែរប៉ុន្តែ ដល់ស្ថានីយដែលពួកខ្ញុំត្រូវចុះទៅសណ្ឋាគារវិញហើយ ខ្ញុំក៏ត្រូវបង្ខំចិត្តចុះមុននាងបាត់ទៅ។

ចាប់តាំងពីពេលមកពីថៃវិញមិនដែលជួបនាងសោះ ចង់ជួបនាងខ្លាំងក៏មិនដឹងធ្វើយ៉ាងណា កាលនៅលើរថភ្លើងបានជួបហើយតែពេលវេលាមិនអំណោយផល។

ឥឡូវនេះហួសអស់ហើយ ប៉ះចំប៉ាខ្ញុំកំពូលអ្នករើផ្ទះផង ឱ្យតែចេះចំណេញលក់ៗហើយ ដូច្នេះខ្ញុំក៏ត្រូវរើផ្ទះម្ដងទៀត ទៅនៅម្ដុំតាខ្មៅវិញព្រោះជិតកន្លែងធ្វើការគាត់។ ឥឡូវរៀនចប់អនុបណ្ឌិតហើយមានការងារធ្វើ ពួកម៉ាកជំនាន់ទៅរករឿងឃីមជាមួយខ្ញុំនោះមានកូន ពេញផ្ទះអស់ហើយ នៅតែខ្ញុំទេ ព្រោះចេះតែចាំៗទៅក្រែងបានជួបនាង! តែបើពីរឆ្នាំទៀតនៅតែមិនបានជួបទៀត ធ្វើម៉េចទេចឹង បើគ្មាននិស្ស័យ មានតែយកប្រពន្ធតាមម៉ាក់តាមប៉ាទៅ។

ប៉ុន្តែ... កាលពីមុនភ្ជុំខ្ញុំក៏សាកល្បងទៅភ្នំពេញថ្មីម្ដងទៀតក្រែងលោ នាងត្រឡប់មកពីស្រុកថៃវិញ។ ការគិតរបស់ខ្ញុំនៅតែមិនខុសមែន នាងបានត្រឡប់មកវិញហើយ ភ្នែកនាងនៅតែតែតឹងដដែល តែពោះនាងធំដូចអ្នកផឹកខួបប្រាំង ខួបវស្សា ខ្ញុំថែមទាំងបានឃើញប្រុសម្នាក់អាយុប្រហែលសាមសិបឆ្នាំជាងអង្គុយនៅក្នុងផ្ទះលក់ចាប់ហួយនោះទៀតផង ហើយឃើញនាងកំពុងតែអង្គុយចុចទូរសព្ទក្បែរប្រុសម្នាក់ហ្នឹង មិនប្រាប់ក៏ដឹងដែរថានាងរៀបការហើយ មានកូនក្នុងផ្ទៃទៀត។

ខ្ញុំគ្មានមុខទៅរករឿងនាងដូចកាលមុនទេ មានតែបកឡានត្រឡប់ទៅផ្ទះនៅតាខ្មៅវិញ ហើយជូនពរឱ្យស្រីឆ្នាសរបស់ខ្ញុំឱ្យឆ្លងទន្លេដោយសុវត្ថិភាព៕

ចុចអាន៖ លួចស្រលាញ់មនុស្សម្នាក់រយៈពេល៨ឆ្នាំ ទីបំផុត…

ចុចអាន៖ វិលវិញបានទេ ឲ្យចៅសម្រេចសន្យាសិន? អត្ថបទ៖ P.T 

មានអត្ថបទពាក់ព័ន្ធនឹងមនុស្សដែលអ្នកចងចាំ ចង់ឲ្យ Sabay ចុះផ្សាយ សូមទាក់ទង៖ អ៊ីមែល៖ kong.chanvanneng@cidc.com.kh ឬ ទូរសព្ទ៖ ០១០ ៧០០ ៧២៧

ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ