ហង្សក្រហមឈ្នះ QPR ទាំងភ័យបុកពោះយប់មិញ (វីដេអូ)

2014-10-20 15:20:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហង្សក្រហម Liverpool ទទួលបាន៣ពិន្ទុពេញពីក្រុមម្ចាស់ផ្ទះ QPR យប់មិញ ក្រោយឈ្នះ ៣-២ ប៉ុន្តែវាជាជ័យជម្នះដែលធ្វើឲ្យអ្នកគាំទ្រភ័យបុកពោះ ដោយសារតែ៨នាទីចុងក្រោយមានការស៊ុតគ្នាទៅវិញទៅមកដល់ទៅ៤គ្រាប់ ដែលក្នុងនោះមានទាំងការធ្វើឲ្យចូលទីខ្លួនឯងផងដែរ។

ក្រុមរបស់លោក Brendan Rodgers បានបំបែកពងមាន់នៅនាទី៦៧ ដោយសារ Richard Dunne ធ្វើឲ្យចូលទីខ្លួនឯង ពេលព្យាយាមរារាំងបាល់ដែលទាត់ចេញពីចំហៀងដោយ Glen Johnson។ នេះជាគ្រាប់បាល់ទី១០ហើយរបស់ Dunne ដែលជាកំណត់ត្រាច្រើនបំផុតនៅ Premier League។

ខ្សែប្រយុទ្ធ Eduardo Vargas បានជួយឲ្យ QPR តាមស្មើនៅនាទី៨៧ ប៉ុន្តែហង្សក្រហមបាននាំមុខជាថ្មីនៅនាទី៩០ ដោយការស៊ុតរបស់ Philippe Coutinho ។ ដល់ម៉ោងបន្ថែមទៅហើយ Vargas បានស៊ុតគ្រាប់ទី២របស់ខ្លួន តាមស្មើ Liverpool ម្ដងទៀតទាំងមិនគួរឲ្យជឿ។

យ៉ាងណាក្ដី អ្វីៗមិនបញ្ចប់ដោយពិន្ទុស្មើគ្នា ២-២ នោះទេ ពោលគឺ Steven Caulker បានធ្វើឲ្យ Liverpool ទទួលបាន៣ពិន្ទុពេញ ក្រោយធ្វើឲ្យចូលទីខ្លួនឯងនៅពេលរៀបចប់ការប្រកួតទៅហើយ ពេលប៉ះបាល់ដែលទាត់ដោយ Raheem Sterling។

អ្វីដែលគួរឲ្យចាប់អារម្មណ៍មួយទៀត គឺខ្សែប្រយុទ្ធ Mario Balotelli របស់ហង្សក្រហម បានភ្លាត់ឱកាសស៊ុតបញ្ចូលទីល្អៗមួយចំនួនផងដែរ។

លទ្ធផលនេះជួយឲ្យ Liverpool ឡើងឈរលេខ៥ ជាបណ្ដោះអាសន្ន ដោយទទួលបាន១៣ពិន្ទុក្នុង៨ប្រកួត។ មួយគូទៀតកាលពីយប់មិញដែរនោះ គឺ Stoke City ឈ្នះ Swansea City ២-១៕