ជំនឿដែលពាក់ព័ន្ធជាមួយម្ដាយ និង ទារកទើបនឹងកើត
- 2015-11-23 17:44:24
- ចំនួនមតិ 0 | ចំនួនចែករំលែក 0
ជំនឿដែលពាក់ព័ន្ធជាមួយម្ដាយ និង ទារកទើបនឹងកើត
ចន្លោះមិនឃើញ
បើទោះបីជាវិទ្យាសាស្ត្រជឿនលឿនយ៉ាងណាក្ដី ក៏មនុស្សមិនអាចកាត់ផ្ដាច់ពីជំនឿអរូបិយនានា ដូចជាការបន់ស្រន់ និងត្រណមមួយចំនួន។ ថ្ងៃនេះ Sabay សូមលើកយកត្រណមដែលពាក់ព័ន្ធជាមួយម្ដាយ និង ទារក យកមកបង្ហាញដល់ប្រិយមិត្ត។
អ្នកស្រី នី ជាចាស់់ទុំម្នាក់ ដែលធ្លាប់ធ្វើជាយាយម៉ប (ឆ្មប) បុរាណ និងចាស់ស្រុកធ្លាប់ដឹងពីជំនឿ ត្រណមច្រើន។ សព្វថ្ងៃលោកយាយនី រស់នៅឃុំត្រមែង ស្រុកឈូក ខេត្តកំពត។ គាត់ថា ជំនឿទាំងអស់ដែលយើងប្រតិបត្តិគឺចេះតែធ្វើតៗគ្នាមកតាំងពីដូនតាមក មិនដឹងថា ត្រូវឫខុសជាមួយវិទ្យាសាស្ត្រយ៉ាងម៉េចទេ តែយើងធ្លាប់សុខសប្បាយ យើងចេះធ្វើតាមគ្នារហូតមក តែសម័យឥឡូវ ខ្លះក៏គេធ្វើតាម ខ្លះគេអត់ជឿ អត់ធ្វើតាម។ ត្រណម ឫជំនឿដែលពាក់ព័ន្ធជាមួយទារក និង ម្ដាយដែលទើបឆ្លងទន្លេថ្មីៗមានដូចជា៖ បើនៅពពោះ មិនទាន់គ្រប់ខែ ចាស់ពីបុរាណមិនអោយដេរ ឫទិញខោអាវទុកទេ ដោយខ្លាចកូនមិននៅជាមួយ (អាចរលូត ឬស្លាប់ក្នុងពោះ)។
១.ការដាក់កាំបិតលើក្បាលដំណេកទារក៖ ក្រោយពីឆ្លងទន្លេហើយ អ្នកមានជំនឿតគ្នាពីបុរាណមក លោកអោយយកកាំបិតដាក់លើក្បាលដំណេករបស់ក្មេងទើបនឹងកើតនោះ។ ការដែលធ្វើដូចនេះ គឺដើម្បីកុំឲ្យខ្មោចព្រាយបិសាច ប្រលឹងអរូបទាំងឡាយមកលេង មកពញ្ញាក់ បន្លាចក្មេង។
២.ការដាក់ឈ្មោះ ៖ ចាស់ពីដើមលោកដាក់ឈ្មោះកូនចៅ មិនពិរោះទេ ដូចជាក្អុក ក្អាត់ ជាដើម ។ លោកយល់ថា ការដាក់ឈ្មោះពិរោះពេក ឫវែងពេកមិនល្អ ខ្លាចកូនឈឺ ព្រោះរាសីមិនដល់។
៣.ការសួរសុខទុក្ខ៖ បើយើងទៅលេងអ្នកទើបឆ្លងទន្លេហើយថ្មីៗ ហើយផ្ទះគេមានឆ្អើរភ្លើង គេហាមមិនអោយសួរសំណួរដែលទាក់ទង នឹងពាក្យក្ដៅ ត្រជាក់ដូចជា សូរថា៖ ភ្លើងក្ដៅពេកអត់? ឫក៏សូរថា មានដែលយល់សប្ដិអាក្រក់អីទេ? ហាមផ្ដាច់មិនឲ្យសួរទេ បើហ៊ានសួរ ពេលអ្នកមកលេងត្រលប់ទៅវិញ អ្នកឆ្លងទន្លេនឹងមិនស្រួលតាមសម្ដី ដែលយើងថាហ្នឹង ប៉ុន្តែសម័យឥឡូវគេអត់អាំងភ្លើង រឿងសួរក្ដៅអី ដូចជាមិនសូវអីប៉ុន្មានទេ។ ហើយមួយទៀត បើឃើញទារកធាត់ គេនិយាយថា “ថ្លោស ឫមានព្រលឹង” គេមិនឲ្យថា “ធាត់” ទេ។
៤.ការនាំទារកឆ្ងាយពីផ្ទះ៖ ពេលនាំទារកទៅឆ្ងាយពីផ្ទះ បុរាណលោកឲ្យយកកំបោរ លាបទងត្រចៀកក្មេង កុំឲ្យខ្មោចព្រាយសួរនាំ ឬ នៅពេលដើរជិតដល់ផ្ទះអ្នកដែលយើងទៅលេង ចាស់បុរាណឲ្យបេះស្លឹកឈើ ក្ដាប់នឹងដៃ ពេលទៅដល់ផ្ទះនោះ ឲ្យគ្រវាស ហើយនិយាយបួងសួងកុំឲ្យមានព្រលឹងអរូបមកយាយីក្មេង។
៥.ពេលទៅលេងទារកទើបនឹងកើតថ្មីៗ គេច្រើនមានរបស់ជាប់ដៃ ដូចជាលុយ ជារបស់ប្រើប្រាស់ដូចជា ប្រេងកូឡា ម្សៅជាដើម (ពេលឲ្យក្មេងគេនិយាយឲ្យក្មេងឆាប់ធំ កើតស្រូវ កើតអង្ករជាដើម)។ ក្រៅពីត្រណមខាងលើ តើប្រិយមិត្តណាមានដឹងថា មានត្រណមអ្វីខ្លះទៀតទេ? សូមជួយចែករំលែកជាមួយ Sabay។
អត្ថបទ៖ ឡុច គីមសាយ
មានអត្ថបទថ្មី និង ប្លែកៗ កើតមានគ្រប់ទីកន្លែង ប្រិយមិត្តចង់រាយការណ៍ ឬ ចង់ឲ្យ Sabay ចុះផ្សាយ សូមទំនាក់ទំនងតាម៖
-ទូរសព្ទ៖ 017 55 76 88 -អ៊ីមែល៖ prak.chanseyha@cidc.com.kh
-លេខទូរសព្ទ៖ 099 588 880 -អ៊ីមែល៖ bin.bunna@cidc.com.kh
ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ!