អម្ពរ ទេវី ចង់បានភាគលាភពីការដាក់បញ្ចាំងភាពយន្តខ្លួនឡើងវិញ
- 2015-12-04 16:24:37
- ចំនួនមតិ 0 | ចំនួនចែករំលែក 0
អម្ពរ ទេវី ចង់បានភាគលាភពីការដាក់បញ្ចាំងភាពយន្តខ្លួនឡើងវិញ
ចន្លោះមិនឃើញ
អតីតតារាសម្ដែងជើងចាស់ ដែលបច្ចុប្បន្នកំពុងរស់នៅសហរដ្ឋអាមេរិក បានឆ្លើយប្រាប់ Sabay ម្សិលមិញនេះតាមរយៈសារអេឡិចត្រូនិកថា អ្នកនាងចង់បានផលប្រយោជន៍ ឬក៏ភាគលាភខ្លះពីការដាក់បញ្ចាំងភាពយន្តទាំងឡាយណាដែលមានខ្លួនចូលរួមសម្ដែង។
អតីតតារាល្បីទសវត្សរ៍ទី ៩០ រូបនេះ ថ្លែងដូច្នេះ បន្ទាប់មានដំណឹងថា ស្ថានីយទូរទស្សន៍ក្នុងស្រុកមួយ គ្រោងនឹងចាក់បញ្ចាំងភាពយន្តខ្មែរជំនាន់អ្នកស្រីសម្ដែងឡើងវិញទាំងអស់ ជាពិសេសខ្សែភាពយន្តដែលសម្ដែងដោយអ្នកស្រី និងលោក ទេព រិនដារ៉ូ។ អម្ពរ ទេវី ថ្លែងថា "រីករាយដែលបានលឺដំណឹងនេះ ប៉ុន្តែខ្ញុំគួរតែបានការលើកទឹកចិត្ត ឬក៏ទទួលបានអ្វីខ្លះ ទើបត្រឹមត្រូវ"។
សិល្បការិនីរៀមច្បងរូបនេះ បន្តថា ក្នុងតថភាពដូចគ្នានេះ ប្រសិនបើនៅសហរដ្ឋអាមេរិក ជាទីដែលអ្នកស្រីកំពុងរស់នៅផ្ញើខ្លួននោះ គឺអ្នកស្រីនឹងទទួលបានផលប្រយោជន៍ខ្លះពីការចាក់បញ្ចាំងភាពយន្តស្នាដៃអ្នកស្រីមិនខាន។ អ្នកស្រីថ្លែងថា "នៅអាមេរិក បើមានការចាក់បញ្ចាំងភាពយន្តឡើងវិញដូច្នេះ តារាសម្ដែងនឹងទទួលបានចំណែកខ្លះពីការចាក់បញ្ចាំងនេះ"។
អតីតដៃគូសម្ដែងស័ក្ដិសមរបស់លោក ទេព រិនដារ៉ូ បញ្ជាក់បន្ថែម កាលពីអតីតកាលសម្រាប់ការសម្ដែងរបស់អ្នកស្រីសម្រាប់សិល្បៈភាពយន្តខ្មែរ គឺអ្នកស្រីបានប្រឹងប្រែងខ្លាំងណាស់ ទើបសម្រេចបានសមិទ្ធផលមួយចំនួនទុកមកដល់បច្ចុប្បន្ន។ ដូច្នេះហើយ អ្នកស្រី គិតថា គួរតែបានផលិតប្រយោជន៍ខ្លះពីការសើរើស្នាដៃរបស់អ្នកស្រីមកចាក់បញ្ចាំងឡើងវិញនៅពេលនេះ។
ផែនការចាក់បញ្ចាំងភាពយន្តខ្មែរចាស់ៗឡើងវិញ ពិសេសរឿងសម្ដែងដោយអ្នកស្រី អម្ពរ ទេវី និងទេព រិនដារ៉ូ នេះ ត្រូវបានប្រកាសដោយស្ថានីយទូរទស្សន៍អាស៊ីអាគ្នេយ៍ថ្មីៗ។ តាមលោក ញាណ សុធី ទទួលបន្ទុកផ្នែកទីផ្សារ និងអ្នករៀបចំកម្មវិធីមួយរូបប្រចាំនៅទូរទស្សន៍អាស៊ីអាគ្នេយ៍ បានឲ្យដឹងថា នេះជាផែនការត្រៀមមួយ អនុលោមតាមចំណាត់ការរបស់ក្រសួងព័ត៌មាន ដែលតម្រូវឲ្យឆ្នាំថ្មីខាងមុខនេះ ស្ថានីយទូរទស្សន៍នានា បញ្ឈប់ការចាក់បញ្ចាំងភាពយន្តបរទេសក្នុងម៉ោងមាស ក្នុងពេលដែលអាស៊ីអាគ្នេយ៍ អត់ទាន់មានផែនការផលិតរឿងខ្លួនឯងសម្រាប់ឆ្នាំថ្មីនេះនៅឡើយ។
យ៉ាងណាក៏ដោយ លោកថា អ្វីៗស្ថិតក្នុងការជជែកគ្នា ដោយមិនទាន់ដឹងថា ចាប់បញ្ចាំងនៅពេលណាឲ្យច្បាស់ និងមានរយៈពេលប៉ុណ្ណានៅឡើយ។ ដោយឡែករឿង ពាក់ព័ន្ធអតីតតារាសម្ដែង អម្ពរ ទេវី ចង់ទាមទារភាគលាភពីការដាក់បញ្ចាំងរាល់ភាពយន្តសម្ដែងដោយអ្នកស្រី លោក សុធី ប្រាប់ថា លោកមិនទាន់អាចឆ្លើយបាននៅពេលនេះទេ ដោយរង់ចាំជជែកគ្នាក្នុងក្រុមការងារសិន។ “អូហ៍...ខ្ញុំទើបតែលឺនាពេលនេះ អីចឹងចាំនិយាយគ្នាសិន លទ្ធផលយ៉ាងណា ចាំខ្ញុំប្រាប់ទៅវិញ"។
ចំពោះករណីនេះ អ្នកស្រី អម្ពរ ទេវី បញ្ជាក់ថា អ្នកស្រី នឹងរកវិធីដើម្បីបានពិភាក្សាគ្នាជាមួយម្ចាស់គម្រោង។ ទោះបែបនេះក្ដី លោក ទេព រិនដារ៉ូ ដែលជាដៃគូសម្ដែងជាមួយ អម្ពរ ទេវី ក្នុងរឿងជាច្រើនដែលស្ថិតក្នុងគម្រោងដាក់បញ្ចាំងដោយទូរទស្សន៍អាស៊ីអាគ្នេយ៍ដែរនោះ ប្រាប់ថា លោកមិនមានគម្រោងទាមទារភាគលាភឡើយ។
ប្រព័ន្ធច្បាប់ពាក់ព័ន្ធនៅសុំាញុំា ជាមូលហេតុមួយនាំឲ្យលោក ដារ៉ូ មិននឹកភ្នកដល់ការទាមទារដូចខាងលើ ដោយសិល្បកររៀមច្បងរូបនេះ និយាយដោយចាត់ទុកថា នេះជាការរួមចំណែកមួយផ្នែកជួយជាតិ។ “គេយកមកចាក់បញ្ចាំងវិញ មួយផ្នែកជួយដល់វិស័យភាពយន្តយើង មួយផ្នែកដូចជា Promote ខ្ញុំដែរ អីចឹងដូចជាមិនចង់ទាមទារអីទេ ចាត់ថាជាវិភាគទានជួយជាតិទៅចុះ។ ម្យ៉ាង យើងយកថ្លៃឈ្នួលផ្ដាច់ពីថៅកែកុនទៅហើយ មិនដឹងថាច្បាប់កាលហ្នុងគេគិតម៉េចៗផង"។
សិល្បករជើងចាស់ដែលនៅមានទីផ្សារថតភាពយន្តរូបនេះ សង្ឃឹមថា ភាពយន្តចាស់ៗរបស់លោក និងមិត្តរួមអាជីពផ្សេងទៀត នឹងជាទីចាប់អារម្មណ៍របស់ប្រិយមិត្តមួយចំនួន ពិសេសអ្នកដែលធ្លាប់គាំទ្រភាពយន្តទាំងនោះកន្លងមក។
ក្រសួងពាណិជ្ជកម្ម ទើបនឹងចុះកម្មសិទ្ធិបញ្ញាបទចម្រៀងលោក ស៊ិន ស៊ីសាមុត ចំនួន ៧៣ បទ និង១បទរបស់រាជនីសំឡេងមាស រស់ សេរីសុទ្ធា ដែលនឹងធានាដល់ការទទួលបានរបស់ម្ចាស់កម្មសិទ្ធិនូវភាគលាភពីការប្រើប្រាស់ស្នាដៃរបស់ខ្លួនក្នុងសកម្មភាពពាណិជ្ជកម្មនានា។ យ៉ាងណាមិនទាន់ដឹងថា ច្បាប់នេះនឹងមានវិសាលភាពដល់ខ្សែភាពយន្ត ឬយ៉ាងណានៅឡើយ ខណៈព្រឹកនេះ លោក ស៊ឹម សុខេង ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម មិនទាន់អាចទាក់ទងបាន។
ប៉ុន្តែតាមប្រសាសន៍ឯកឧត្ដម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មកន្លងមកបានឲ្យដឹងថា ម្ចាស់កម្មសិទ្ធិបញ្ញាអាចប្រើប្រាស់សិទ្ធិទាមទារផលប្រយោជន៍ពីស្នាដៃរបស់ខ្លួនបាន លុះត្រាស្នាដៃនោះត្រូវបានចុះបញ្ជីកម្មសិទ្ធិបញ្ញារួចរាល់ និងមានការទទួលស្គាល់ជាផ្លូវការ ទើបការទាមទារផលប្រយោជន៍ពីស្នាដៃរបស់ខ្លួន អាចធ្វើទៅបានក្រោមការគាំពារនៃច្បាប់៕ តា គង់ ណៃ គ្រោងយកបទចម្រៀងចាប៉ី ទៅចុះកម្មសិទ្ធិបញ្ញា ការប្រគំតន្ត្រីជួយក្រុមគ្រួសារ អធិរាជសំឡេងមាស ស៊ីន ស៊ីសាមុត មានការគាំទ្រច្រើន កំពុងមានចម្រូងចម្រាស ម៉ៅ ហាជី បញ្ចេញតម្លៃខ្លួន អត្ថបទ៖ ទារិកា
រូបភាព៖ FB អម្ពរ ទេវី