ភូមិ ៦ នៅសៀមរាបធ្វើឱ្យទេសចរចាប់អារម្មណ៍ ព្រោះតែជីវភាពប្រជាជន

2015-12-08 16:30:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទអង្គរវត្ត ជាតំបន់ទេសចរណ៍ប្រវត្តិសាស្ត្រទីមួយ ក្នុងចំណោមតំបន់ទេសចរណ៍នានា ដែលភ្ញៀវជាតិ និងអន្តរជាតិទៅទស្សនាច្រើន ហើយក្នុងនោះភូមិទី ៦ សង្កាត់ចុងឃ្នៀស ខេត្តសៀមរាប ក៏ជាកន្លែងទាក់ទាញទេសចរ បរទេសមួយផងដែរ។

កន្លែងពោរពេញដោយផ្ទះជាច្រើនខ្នង ជាពិសេសផ្ទះតូចៗមានជើងសសរប៉ិនកំភួនជើង មនុស្សចាស់នៅចម្រុះគ្នា បញ្ជាក់ពីជីវភាពរបស់អ្នកភូមិ ជាហេតុផលសំខាន់មួយ ក្នុងការទាក់ទាញជនបរទេសគ្រប់ទិសទីមកទស្សនានៃជីវិត ក៏ដូចជា វប្បធម៌នៃការរស់នៅរបស់អ្នកភូមិ។

ព្រោះតែប្រជាជនមានជីវភាពក្រីក្រ តំបន់ទេសចរណ៍មិនប្រវត្តិសាស្ត្រនេះ បានធ្វើឱ្យលំហូរទេសចរបរទេស កើនឡើងជាបន្តបន្ទាប់។ នេះបើតាមការរៀបរាប់របស់អ្នកស្រី សុភី ដែលកំពុងឈរពរកូនតូច។

អ្នកភូមិ ៦ រូបនេះបានបញ្ជាក់យ៉ាងដូច្នេះថា ៖ "គេឃើញអ្នកស្រុកនៅទីនេះក្រ ទើបគេ [បរទេស] មកមើល។ គេឃើញលំបាក គេចេះតែមកមើល គេជួយ...បារាំងមកច្រើនជាងគេពេលខែនេះ [ខែប្រាំង]"។

ចំណែកអ្នកភូមិមួយរូបទៀតឈ្មោះ ផាត បានបង្ហើបពីមូលហេតុផ្សេងមួយទៀតថា ការចល័តផ្ទះចុះឡើងតាមទឹកទន្លេសាប ជាកត្តាជំរុញឱ្យទេសចរបរទេស ចាប់អារម្មណ៍ និងមកទស្សនា ឥតដាច់។ លោកបន្តថា កាលពីមុន ពេលទឹកឡើងខ្លាំងម្ដងៗ ផ្ទះអ្នកភូមិជាច្រើនខ្នង ត្រូវចល័តរកទីទួលសុវត្ថិភាព បើមិនដូច្នេះទេអ្នកភូមិត្រូវបង្ខំរើឥវ៉ាន់ចេញ ដោយបន្សល់ទុកតែសំបកផ្ទះប៉ុណ្ណោះ។ យ៉ាងណាមិញប៉ុន្មានឆ្នាំនេះ ប្រជាជនក្រីក្រក្នុងតំបន់នេះ មិនសូវជារើផ្ទះដូចមុនទេ ព្រោះតែទឹកទន្លេមានកម្រិតទឹកទាប។

ចំណែកលោក ក្រុង ក្រាន អ្នកភូមិដែលត្រូវបានអ្នកក្បែរខាងគោរពស្រលាញ់ បានបង្ហើបឱ្យ Sabay ដឹងថា ជីវភាពក្រីក្រលំបាកតោកយ៉ាក ជាកត្តាជំរុញឱ្យបរទេសមកទស្សនា។ "អ្នកនៅនេះក្រណាស់! ពេលបរទេសមក អ៊ីចឹងទៅ អ្នកភូមិខ្លះគេជួយ គេឃើញលំបាកគេអាណិត។ អ្នកខ្លះរកតែអង្ករច្រកឆ្នាំងមិនបានផង"។ បុរសចិត្តមានចិត្តធម៌ថ្លែងបញ្ជាក់។

កាលពីល្ងាចថ្ងៃទី ៥ ខែធ្នូឆ្នាំ ២០១៥ លោក Peter មកពីប្រទេសប៉ូឡូញ ជាជនបរទេសម្នាក់ ក្នុងចំណោមភ្ញៀវផ្សេងទៀត ដែលបានមកទស្សនា ភូមិទី ៦ សង្កាត់ចុងឃ្នៀសនេះ។ លោកប្រាប់ថា លោកពិតជាអាណិត ពេលឃើញប្រជាជនច្រើនគ្រួសារ មានជីវភាពក្រីក្របែបនេះ ជាពិសេសក្មេងៗដែលត្រូវការការសិក្សាជាចាំបាច់។

នៅតាមបណ្ដោយផ្លូវទៅតំបន់រមណីយដ្ឋានភ្នំក្រោម ប្រជាពលរដ្ឋខ្លះដែលកំពុងរស់នៅក្នុងភូមិទី ៦ ចម្ងាយ ១១ គីឡូម៉ែត្រពីទីរួមខេត្តសៀមរាបនេះ បានពឹងផ្អែកលើមុខរបរបើកទូកដឹកភ្ញៀវ នៅបឹងទន្លេសាបក្នុងភូមិសាស្ត្រ សង្កាត់ចុងឃ្នៀស ខេត្តសៀមរាម៕

ចំការស្នេហ៍ក្បែរបង្កើយ បានទៅលេងហើយពិតជាជក់ចិត្ត

ប្រាសាទបាសែត អតីតទីកន្លែងដ៏ស័ក្ដិសិទ្ធិមួយដែលគេមិនសូវស្គាល់

អត្ថបទ៖ អ៊ុំ សុភក្តិ