តើមានបងស្រីឯណា ដូចបងស្រីខ្ញុំ?

2015-12-14 16:11:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ឱ្យតែស្ដាប់បទ «បងស្រី» របស់តារាចម្រៀងម្នាក់ខ្ញុំតែងតែនឹកឃើញដល់បងស្រីធំរបស់ខ្ញុំ។ ខ្ញុំតែងតែហៅគាត់ថា អ៊ីជ្រួញ មិនមែនមកពីគាត់ជ្រីវជ្រួញដូចមនុស្សចាស់ទេ តែគាត់មើលទៅចាស់ជាងមិត្តភ័ក្ដិគាត់ដែលមានអាយុស្របាលគាត់។

មូលហេតុដែលគាត់ចាស់ជាងអាយុព្រោះ តែគាត់ធ្វើការច្រើននិង គិតច្រើន។ គាត់គិតច្រើនព្រោះតែប្អូនៗ។ ពេលខ្លះខ្ញុំគិតថាគាត់ជាម្ដាយខ្ញុំ ព្រោះគាត់ជាជំហរមួយរបស់គ្រួសារ។

កាលនៅតូចខ្ញុំមិនសូវត្រូវគ្នានឹង អ៊ីជ្រួញទេ ខ្ញុំជាកូនពៅ ហើយក្បាលខូចទៀត។ ខ្ញុំចាំថាកាលនៅតូច អ៊ីជ្រួញកំពុងជូតផ្ទះ ហើយខ្ញុំដើរទៅរអិលអុកគូទ ខ្ញុំក៏រត់ទៅប្ដឹងប៉ា ហើយប៉ាក៏វ៉ៃអ៊ីជ្រួញ (ប៉ាក៏អញ្ចឹងដែរ អត់ស្ដាប់ហេតុផលទេ)។ ខ្ញុំមានអារម្មណ៍ថាស្ដាយក្រោយខ្លាំងណាស់ ដែលធ្វើបាបបងស្រីខ្លួនឯង។

អ៊ីជ្រួញ តែងតែត្រូវប៉ាម៉ាក់ស្ដីបន្ទោស រហូត ហើយគាត់រ៉ាប់រងការងារក្នុងផ្ទះ ទាំងអស់ ចំណែកបងស្រីបន្ទាប់គេយកលេសរវល់រៀនគ្មានពេលមកជួយការងារគាត់ទេ។ ឯខ្ញុំវិញខ្ជិលរលួយក្នុង គិតតែដើរលេងបាញ់ឃ្លីជាមួយក្មេងក្នុងភូមិ។ ម៉ាក់ខ្ញុំជាអ្នកលក់បន្លែនៅផ្សារ ប៉ាជាអ្នករត់កង់បី ដូច្នេះគាត់ពុំមានលទ្ធភាពគ្រប់គ្រាន់សម្រាប់ឱ្យខ្ញុំរៀនទេ បើពុំមានបងស្រីធំ។ អ៊ីជ្រួញត្រូវឈប់រៀន ក្រោយចប់ទី១២ ហើយធ្វើការនៅក្រុមហ៊ុនតូចតាច ដើម្បីយកលុយឱ្យខ្ញុំនិងបងស្រីបន្ទាប់ខ្ញុំរៀនបន្ត។ គាត់ប្រាប់ទៀតថា គាត់មិនចង់ឱ្យពួកខ្ញុំឈប់រៀនទេ ជាពិសេសគាត់ចង់ឱ្យខ្ញុំរៀនឱ្យចប់ និង ក្លាយជាវិស្វករម្នាក់។ បងស្រីទីពីរ របស់ខ្ញុំគាត់បានរៀនចប់បរិញ្ញាបត្រហើយមានការងារធ្វើហើយ ប៉ុន្តែគាត់រកបានត្រឹមតែផ្គត់ផ្គង់ក្រពះខ្លួនឯងប៉ុណ្ណោះ។ ពេលខ្ញុំកំពុងរៀនឆ្នាំទីមួយ ខ្ញុំស្ទើរនឹងបញ្ឈប់ការសិក្សាព្រោះ គ្រួសារទាល់ខ្លាំងមែនទែន ដោយប្រាក់ខែបងស្រីទីពីរ និង អ៊ីជ្រួញត្រូវចំណាយទៅលើថ្លៃវះកាត់រលៀកខ្នែងពោះវៀនរបស់ប៉ាអស់ហើយ ចំណែកខ្ញុំគ្មានលុយបង់សាលាទេ ត្រូវផ្អាករៀនមួយឆ្នាំ។ ក្រោយពេលប៉ាជាពីជំងឺ មានអ្នករកស៊ីពោះម៉ាយកូនពីរម្នាក់ ចង់បានអ៊ីជ្រួញ ដូច្នេះអ្នកផ្ទះទាំងអស់ ទាំងម៉ាក់ទាំងប៉ា ទាំងបងស្រីទីពីរ បងប្អូនមីងមា ទាំងអស់បង្ខំឱ្យអ៊ីជ្រួញរៀបការជាមួយអ្នកមាននោះ ទាំងដែលដឹងហើយថាអ៊ីជ្រួញមិនបានស្រឡាញ់។ អ៊ីជ្រួញពិបាកចិត្តណាស់ មានតែប្អូនប្រុសម្នាក់នេះទេដែលយល់ចិត្តគាត់ ដូច្នេះខ្ញុំក៏ប្រាប់គាត់ថា «បើមិនស្រឡាញ់គាត់ទេ ប្រកែកទៅ!»។ តែអ៊ីជ្រួញបែរជាលើកហេតុផលថា ពោះម៉ាយនោះជាអ្នកមាន បើគាត់មិនរៀបការទេ ខ្ញុំនឹងអត់បានរៀន។ គាត់តបហើយ ខ្ញុំឈប់ស្ដាប់ ហើយដើរទៅកាន់កន្លែងដេករបស់ខ្ញុំវិញ ដោយលួចយំអាណិតបងស្រី គាត់ចង់រៀបការជាមួយនឹងមនុស្សដែលគាត់មិនបានស្រឡាញ់ដើម្បីយឹតយោងគ្រួសារ និង ឱ្យប្អូនបានចូលរៀនវិញ។ ប៉ុន្តែចាត់ទុកថាជាព្រេងវាសនារបស់អ៊ីជ្រួញ មានប្រុសអាល្លឺម៉ង់ម្នាក់ស្រឡាញ់គាត់ ដែលស្គាល់គ្នាតាមរយៈមិត្តភ័ក្ដិណែនាំ។ ដូច្នេះគាត់ក៏សម្រេចចិត្ត រៀបការនឹងបងថ្លៃជនជាតិអាល្លឺម៉ង់នោះ ហើយអ្នកផ្ទះក៏មិនជំទាស់ដែរ។ ៣ ឆ្នាំមុន នៅថ្ងៃគាត់ឡើងយន្តហោះ ផ្អើលអស់ពូមីង យាយតានៅឯស្រុកមកហែហមជូនដំណើរអ៊ីជ្រួញ ឡើងកកកុញប្រលានយន្តហោះ។ គាត់មិនដែលជិះយន្តហោះ ក៏មិនដែលទៅក្រៅប្រទេស លើកនេះត្រូវទៅតែម្នាក់ឯងទៀត ព្រោះប្ដីគាត់ ទៅអាល្លឺម៉ង់តាំងពី ៦ ខែមុនម្ល៉េះ។ ខ្ញុំចេះតែបារម្ភចេះតែខ្លាច គាត់ខ្លួនមួយត្រូវរស់នៅជាមួយប្ដីសាសន៍គេ មិនដឹងគេស្រឡាញ់គាត់ស្មោះឬអត់? គេធ្វើបាបគាត់អត់? តិចគេជាពួកជួញដូរមនុស្សទៅ? ពេលណាគាត់បានមកខ្មែរម្ដងទៀត? មុនដំបូងគ្មានអ្នកណាស្រក់ទឹកភ្នែកអី បន្តិចទេ តែពេលអ៊ីជ្រួញ check in រួចត្រូវឡើងជណ្ដើរយន្តទៅ ម៉ាក់ មីង អ៊ំស្រី និយាយទៅស្រីៗ នាំគ្នាស្រក់ទឹកភ្នែកលាន់ធ្វើឱ្យខ្ញុំទប់ចិត្តស្ទើរមិនបានដែរ។ ពេលនោះខ្ញុំឃើញអ៊ីជ្រួញខ្ទប់មុខយំដែរ ហើយសម្លឹងមកពួកខ្ញុំទាំងអាល័យ។ ពេលគាត់ចេញទៅ ខ្ញុំពិបាកចិត្តមួយភ្លែតគឺបាត់ហើយ តែបើឱ្យគាត់នៅខ្មែរទៀត មិនដឹងថាគាត់ត្រូវជួបនឹងរឿងអីខ្លះទេ? ពេលនេះប្រហែលគាត់បង្ខំចិត្តរៀបការនឹងប្រុសពោះម៉ាយ ដែលគាត់មិនស្រឡាញ់ផងក៏មិនដឹង! គាត់លំបាកតាំងពីក្មេងមកហើយ យឹតយោងគ្រួសារ គាត់មានអម្រែកច្រើនណាស់ ដោយត្រូវលះបង់យុវវ័យរបស់គាត់ ទៅធ្វើការយកលុយមកឱ្យប្អូនៗរៀន។ អ្វីដែលគួរឱ្យខឹងទៀតនោះគឺ ពូមីងនៅឯស្រុកមកបេះបោចខ្ចីលុយពីក្មួយទៀត ហើយមិនដែលឃើញសងទេ ព្រោះដឹងថាអ៊ីជ្រួញជាមនុស្សចិត្តទូលាយ។

ឥឡូវគាត់ទៅអាល្លឺម៉ង់បាត់ហើយ គាត់រួចផុតពីអម្រែកទាំងនោះហើយ វាល្មមដល់ពេលដែលគាត់ត្រូវធ្វើដើម្បីសុភមង្គលខ្លួនឯងម្ដងហើយ។

(រូបតំណាង)

យល់សប្ដិមុនជួបខាងក្រៅ

ប៉ុន្តែទឹកចិត្តបងស្រីរបស់ខ្ញុំ មិនបោះបង់ចោលប្អូនឡើយ ទៅបានកន្លះឆ្នាំគាត់បានផ្ញើលុយមកផ្ទះហើយឱ្យខ្ញុំចូលរៀនវិញ។ គាត់ឥឡូវចេះកាចច្រើនណាស់ គំរាមមិនឱ្យពូមីងណាបេះបោចលុយដែលគាត់ផ្ញើមកទេ គឺទុកសម្រាប់ឱ្យខ្ញុំបង់សាលា ឥឡូវខ្ញុំរៀនឆ្នាំទីបួនហើយ។

ខ្ញុំក៏មិនយល់ដែរថាហេតុអី ពូមីងអ៊ំ នៅឯស្រុក ឱ្យតែពេលអ៊ីជ្រួញតេទៅលេងម្ដងៗ តឿនឱ្យអ៊ីជ្រួញផ្ញើលុយឱ្យគាត់ធ្វើផ្ទះធំ ទិញគោទិញដី ធ្វើមើលតែអ៊ីជ្រួញទៅអាល្លឺម៉ង់ហ្នឹងដើម្បីកើបលុយចឹង! គាត់ត្រូវការចាយដូចតែអ្នកនៅខ្មែរដែរតើ! នេះសំណាងហើយដែលអ៊ីជ្រួញទៅអាល្លឺម៉ង់បាត់ បើនៅខ្មែរវិញមិនដឹងសាច់ញាតិ តោងទាមម៉េចខ្លះទេ។

អ៊ីជ្រួញផ្ញើរូបគាត់ឱ្យមើល គាត់មានកូនស្រីម្នាក់ហើយ ហើយប្ដីគាត់ស្រឡាញ់គាត់ណាស់។ ខ្ញុំសែនសប្បាយចិត្តពេលដែលឮបែបនេះ ខ្ញុំសង្ឃឹមថាគាត់នឹងត្រឡប់មកលេងខ្មែរឆាប់ៗជាមួយនឹងបងថ្លៃរួមទាំង ក្មួយរបស់ខ្ញុំ។ ខ្ញុំពិតជាអរគុណដល់បងស្រីដែលមានមេត្តាធម៌របស់ខ្ញុំណាស់ ហើយខ្ញុំប្ដេជ្ញាថានឹងកាន់សញ្ញាប័ត្រវិស្វករឱ្យគាត់ ឱ្យទាល់តែបាន៕

ចុចអាន៖ យឺតពេលហើយទើបស្តាយក្រោយ

អត្ថបទ៖ អ៊ុក ជិនធា

មានអត្ថបទពាក់ព័ន្ធនឹងមនុស្សដែលអ្នកចងចាំ ចង់ឲ្យ Sabay ចុះផ្សាយ សូមទាក់ទង៖ អ៊ីមែល៖ kong.chanvanneng@cidc.com.kh ឬ ទូរសព្ទ៖ ០១០ ៧០០ ៧២៧

ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ