រឿងរ៉ាវ១០យ៉ាង ដែលគូស្នេហ៍គួរធ្វើ មុនពេលចូលរោងការ

2015-12-17 17:05:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ការស្វែងរកដៃគូអនាគតប្ដីប្រពន្ធសម្រាប់សាងគ្រួសារថ្មីមួយ គឺជាការលំបាក ព្រោះគ្រប់គ្នាត្រូវចំណាយពេលវេលាច្រើនខែ ច្រើនឆ្នាំ ក្នុងការពិសោធន៍ចិត្ត ស្វែងយល់ពីគ្នាឲ្យបានច្រើន។ លុះពេលអ្នកដាក់ចិត្ត ដាក់កាយ ស្រលាញ់មែនទែនហើយនោះ អ្នកគួរយល់ដឹងពីចំណុចខ្លះៗខាងក្រោម មុនសម្រេចដឹកដៃគ្នាចូលរោងការ។

១. រៀនស្វែងយល់ពីគ្នា ការរៀនស្វែងយល់ពីគ្នា ពិតជាសំខាន់ណាស់សម្រាប់គូអនាគតប្ដីប្រពន្ធ ព្រោះវាអាចឲ្យយើងស្វែងយល់ច្បាស់ពីចិត្តគំនិតគ្នាទៅវិញទៅមក ចំណងចំណូលចិត្ត និងការចុះសម្រុងគ្នាបានប៉ុណ្ណា។ រឿងល្អ និងរឿងអាក្រក់ ដែលធ្លាប់បិទបាំង ត្រូវបានបញ្ចេញឲ្យដឹងតាមរយៈសកម្មភាពរបស់ភាគីណាមួយ។ លើសពីនេះ វាជាឱកាសសម្រាប់អ្នកទាំងពីរសាងអនុស្សាវរីយ៍ល្អៗជាមួយគ្នាថែមទៀត។

២. ជួបឪពុកម្ដាយ ឬបងប្អូនទាំងសងខាង ការនាំមិត្តស្រី ឬគូអនាគត ទៅជួបឪពុកម្ដាយ គឺជារឿងសំខាន់មួយ ព្រោះអាចឲ្យលោកមានគុណទាំងពីរបានស្គាល់មុខមាត់ ភាពថ្លៃថ្នូរ អត្តចរិតឫកពា និងការនិយាយស្ដីរបស់អនាគតកូនប្រសា ឬចេះគួរសមចំពោះចាស់ទុំបានកម្រិតណា ជាដើម។

៣. ស្គាល់មិត្តភ័ក្ដិគ្នា ទៅវិញទៅមក អ្នកទាំងពីរត្រូវរាប់អាន ឬស្គាល់មិត្តភ័ក្ដិ របស់ដៃគូខ្លួនកាន់តែច្រើនកាន់តែល្អ បើអាចគួរចំណាយពេលវេលាមានកម្មវិធីសប្បាយៗ ដើរកម្សាន្តជាមួយគ្នា ដើម្បីឲ្យកាន់តែមានភាពជិតស្និទ្ធ ដូចមិត្តភ័ក្ដិយើងដែរ។ អ្នកនឹងមិនឯកា ក្រោយរៀបការជាប្ដីប្រពន្ធ ទៅរស់នៅខាងណាមួយ។

៤. ស្វែងយល់គោលដៅជីវិតរបស់ដៃគូ ចំណាយពេលសិក្សាពីក្ដីសុបិន និងផ្លូវដើររបស់ដៃគូ ដើម្បីឲ្យអ្នកទាំងពីរអាចដើរលើផ្លូវនោះបានដែរឬយ៉ាងណា ឬត្រូវរៀបគម្រោងដើរបន្ទាប់របៀបម៉េច។

៥. ដើរលំហែតំបន់ឆ្ងាយៗជាមួយគ្នា ការដើរកម្សាន្តទៅកាន់រមណីយដ្ឋានឆ្ងាយៗដូចជាមាត់សមុទ្រ ពិតជាពេលវេលាមួយដ៏រ៉ូមែនទិក សម្រាប់គូស្នេហ៍សាងភាពផ្អែមល្ហែម បំបាត់ភាពសៅហ្មង ហើយនាំមកវិញនូវតែភាពរីករាយ និងសុភមង្គល។

៦. បង្ហាញទម្លាប់អាក្រក់របស់អ្នក ការសាកល្បងបង្ហាញទម្លាប់អាក្រក់នេះ គឺដើម្បីឲ្យដៃគូអ្នកស្គាល់ពីចំណុចអវិជ្ជមាន ហើយគាត់អាចទទួលយកបានដែរឬទេ ពេលរស់នៅជាមួយគ្នាមែនទែន ដូចជាដេកស្រមុក ភើ ខាំក្រចក ឬទម្លាប់ដើរលេងយប់ជាដើម។

៧. ត្រូវចេះប្រើពាក្យសុំទោស ការប្រើពាក្យនេះសំខាន់ណាស់ ព្រោះមនុស្សម្នាក់ៗ គ្មាននរណាថាមិនដែលប្រព្រឹត្តខុសឡើយ ហើយវាជាកាយវិការមួយបង្ហាញថាអ្នកបានដឹងកំហុសនោះ។ សម្រាប់បុរសវិញ ការទទួលស្គាល់កំហុសមួយមុខ មិនទាន់ធ្វើឲ្យមិត្តស្រីស្ងប់ចិត្តបានភ្លាមៗទេ បើអ្នកចេះលួងថែមទៀតរឹតតែប្រសើរ។

៨. ឆ្លងកាត់ភាពលំបាករឿងលុយកាក់ជាមួយគ្នា

បញ្ហាលុយកាក់ ជាបញ្ហាមួយដែលអាចធ្វើឲ្យប្ដីប្រពន្ធបែកបាក់ ដូច្នេះគូស្នេហ៍ទាំងឡាយគួររៀនឆ្លងកាត់ការលំបាកជាមួយគ្នាពេលមិនទាន់ចូលរោងការ។ វាអាចជាបទពិសោធន៍មួយ ដែលធ្វើឲ្យអ្នកទាំង២ អាចមានលទ្ធផលហែលឆ្លងពេលជួបបញ្ហានោះពេលក្លាយជាប្ដីប្រពន្ធ។

៩. ដើរផ្សារ ឬធ្វើម្ហូបជាមួយគ្នា បុរសចេះដើរផ្សារទិញឥវ៉ាន់ ឬទិញម្ហូប គឺគេមិនសូវឃើញមានច្រើនប៉ុន្មានទេសម្រាប់សង្គមយើង តែបើគាត់អាចធ្វើបាន នារីនោះនឹងកាន់តែសប្បាយចិត្ត ទុកចិត្ត និងឲ្យឈ្មោះប្ដីល្អមិនខាន ព្រោះពេលនាងមានរវល់ នាងមានដៃជំនួសស្រាប់។

១០. ស្វែងយល់ពីចំណង់ផ្លូវភេទទៅវិញទៅមក នៅពេលចាប់ផ្ដើមស្រលាញ់គ្នា ចាប់ដៃគ្នាភ្លាម ពួកគេទាំងពីរនាក់តែងស្រមៃដល់រាត្រីទឹកឃ្មុំដ៏អស្ចារ្យ ជាមួយមនុស្សដែលខ្លួនស្រលាញ់ ដូច្នេះត្រូវស្វែងយល់ពីគ្នាបន្តិចម្ដងៗថាដៃគូ របស់ខ្លួនចូលចិត្តប៉ុណ្ណា ប៉ុន្តែមិនមែនបានន័យថាអ្នកត្រូវប្រឡូករឿងនោះ មុនពេលរៀបការនោះទេ៕

ចុចអាន៖ ហេតុផល៦យ៉ាងដែលនារីៗច្រើនប្រចណ្ឌជាងមនុស្សប្រុស

ប្រែសម្រួល៖ ឡេង ភារុណ ប្រភព៖ metro