សៀវភៅ ១ ក្បាលរៀនពីរឆ្នាំ ឡើងថ្នាក់លុបហើយ យកសរសេរឡើងវិញ

2015-12-21 19:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកសណ្ឋានពណ៌សស្ទើរប្រែជាប្រផេះ កំពុងអង្គុយត្រៀបត្រាលើតង់ ក្រោយម្លប់ជ្រៃ រង់ចាំទទួលអំណោយពីសប្បុរសជន កុមារតូចៗក្នុងសាលាបឋមសិក្សា អង្គជុំ ភូមិតាអោក ឃុំឈ្វាំង ស្រុកពញាឮ ខេត្តកណ្ដាល មានទឹកមុខមិនជាស្រស់បស់ប៉ុន្មានឡើយ ព្រោះថាពួកគេមួយចំនួនជាកូនកំព្រា និងភាគច្រើនជាកូនអ្នកមានជីវភាពខ្សត់ខ្សោយ។

បើតាមការឱ្យដឹងរបស់លោក ទន ដារ៉ា ប្រធានកម្មវិធីអភិវឌ្ឍន៍តំបន់ស្រុកពញាឮ នៃអង្គការ World Vision បានប្រាប់ថា ក្នុងបឋមសិក្សា «អង្គជុំ» មានសិស្ស ៦៥៣ នាក់ដែលភាគច្រើន ជាក្មេងកើតក្នុងគ្រួសារមានជីវភាពលំបាក។

“ខ្ញុំខ្លោចចិត្តណាស់! ពេលរៀនចប់ថ្នាក់ទី២ ឡើងទី៣ ពួកគេបានយកសៀវភៅចាស់មួយក្បាលហ្នឹង (សរសេរខ្មៅដៃ) លុបចេញ ហើយយកមកសរសេររៀនវិញ។ ក្នុង ១០០ នាក់ ៣០ ភាគរយ ដែលបានយកសៀវភៅចាស់ៗ មកសរសេរឡើងវិញ"។

ចំណែកនាយិកា ពេជ សាវន បានថ្លែងឱ្យ Sabay ដឹងថា ក្នុងចំណោមសិស្សសរុប ៦៥៣ នាក់ មានជាង ៣០០ នាក់ប៉ុណ្ណោះ ជាកូនអ្នកធូរធារ ហើយ ៥០ ភាគរយ ជាកូនអ្នកជំពាក់បំណុលគេ។ អ្នកស្រីដែលបម្រើការងារវិស័យអប់រំតាំងពីឆ្នាំ ១៩៧៩ រូបនេះបន្តថា កង្វះសម្ភារសិក្សារបស់សិស្ស និង អគារសិក្សា ជាបញ្ហាប្រឈមខ្លាំងបំផុត ក្នុងបឋមសិក្សាមិនឆ្ងាយពីភ្នំពេញមួយនេះ។

“សិស្សយើងមានច្រើនមែនទែន យើងខ្វះអគារសិក្សាមួយខ្នង ៨ បន្ទប់។ សព្វថ្ងៃយើងមានអគារ ២ ខ្នង មួយខ្នងមាន ៦ បន្ទប់ ជាអំណោយសម្ដេចហ៊ុនសែន ក្នុងឆ្នាំ ២០០៤ និងមួយខ្នងទៀត ៤ បន្ទប់ កសាងដោយប្រជាជន និងព្រះសង្ឃ ក្នុងឆ្នាំ១៩៦០។ មួយបន្ទប់ យើងយកធ្វើជាទីចាត់ការ និងមួយជាបណ្ណាល័យ ប៉ុន្តែអគារនេះចាស់ហើយ ថែមទាំងមានស្នាមប្រេះទៀត ហើយយើងក៏បានសុំកុដិលោកមួយបន្ទប់ទៀត ព្រោះខ្វះ"។

សរុបសាលាបឋមអង្គជុំ មាន ៧ បន្ទប់ ដោយមានមត្តេយ្យបីថ្នាក់ផងដែរ។ ក្នុងមួយបន្ទប់ មានសិស្សចាប់ពីជាង ៣០ នាក់ទៅ ៤០ នាក់ និងត្រូវរៀនពីរពេលព្រឹក-ល្ងាច។ ចំពោះចំនួនសិស្សដ៏ច្រើននេះដែរ លោកគ្រូអ្នកគ្រូ បានបង្ហើបឱ្យដឹងថា ពិតជាពិបាកក្នុងការបង្រៀន។

ជុំវិញបញ្ហានេះ អ្នកស្រីនាយិកា ពេជ សាវន បានដាក់សំណើសុំសាលាមួយខ្នង ទៅអង្គការមូលនិធិមួយរបស់អាមេរិក ប៉ុន្តែមិនទាន់ដាក់សំណើ ទៅមន្ទីរក្រសួងអប់រំនៅឡើយទេ។ "អង្គការគេហ្នឹង សួរយើងថាចង់បានអី ខ្ញុំក៏ប្រាប់ថាចង់បានអគារសិក្សាមួយខ្នង ៨ បន្ទប់ តែមកដល់ពេលនេះជាងពីរឆ្នាំហើយ គេមិនទាន់ឆ្លើយតបយ៉ាងម៉េចទេ។ ខ្ញុំក៏មិនទាន់បានដាក់សំណើរទៅខាងមន្ទីរដែរ ព្រោះខ្លាចជាន់គ្នា។ ព្រោះខ្វះខាតដូច្នេះ គ្រប់ថ្នាក់ទាំងអស់ត្រូវរៀនពីរវេន"។

ដោយមើលឃើញពីទុក្ខលំបាក និងជាអ្នកធ្លាប់មានជីវភាពលំបាក និងដើម្បីចូលរួមជួយសង្គមនោះ លោក សួស សុភក្តិ (ឡារី) រួមទាំងមិត្តភ័ក្ដិ និងសប្បុរសជននានា បាននាំយកអំណោយបន្តិចបន្តួចជូនដល់សិស្សានុសិស្ស ២០០នាក់ និងលោកគ្រូអ្នកគ្រូ។ អំណោយសប្បុរសមានដូចជា កុំព្យូទ័រលើតុមួយគ្រឿង ឡេបថប់មួយគ្រឿង ចំណែកសិស្សក្នុងមួយនាក់ទទួលបានសៀវភៅ២ក្បាល ប៊ិច១ដើម ខ្មៅដៃ១ដើម សាប៊ូដុសខ្លួន១ដុំ ថ្នាំនិងច្រាស់ដុសធ្មេញ លុយ ១ពាន់រៀល និងនំប៉័ងសាច់ ១ កំណាត់។

លោក បញ្ជាក់ថា៖ “ពីមុនយើងបានធ្វើម្ដងហើយលើសិស្ស ២០០ នាក់ ហើយម្ដងនេះយើងបានធ្វើម្ដងទៀត ដោយឱ្យអ្នកគ្រូលោកគ្រូជ្រើសតែសិស្សក្រីក្រ ២០០ នាក់ទៀតប៉ុណ្ណោះ។ យើងធ្វើនេះតាមលទ្ធភាព ហើយយើងនឹងបន្តខំជួយគាត់ឱ្យបានគ្រប់គ្នា។ យើងចង់ឃើញពួកគាត់ បានរៀនសូត្រដូចក្មេងដទៃទៀត"។

https://www.youtube.com/watch?v=D1htrjvpEbg&feature=youtu.be ដោយឡែក លោក ទន ដារ៉ា ប្រធានកម្មវិធីអភិវឌ្ឍន៍តំបន់ស្រុកពញាឮ នៃអង្គការ World Vision ក៏បានបញ្ជាក់ដែរថា សាលបឋមសិក្សាអង្គជុំ ជាសាលាគំរូ និងមានច្បាប់ទម្លាប់មួយ ជាហេតុនាំឱ្យមានសិស្សច្រើន សម្រុកពីភូមិផ្សេងៗមករៀនរួមមាន ភូមិព្រែកផ្ចឹក ភូមិតាអោក ភូមិស្លែងមានជ័យ ភូមិកាកាប និងភូមិស្វាយ។

យ៉ាងណាក្រៅពីខ្វះខាតអគារសិក្សា សាលាមួយនេះ ក៏ជួបបញ្ហាខ្វះគ្រូផងដែរ ដោយបច្ចុប្បន្នមានគ្រូក្របខ័ណ្ឌតែ ៩ នាក់ប៉ុណ្ណោះ ហើយសាលានេះទៀតសោតបានខ្ចីគ្រូពីសាលាផ្សេងចំនួនពីរនាក់ ជួលនិងគ្រូកិច្ចសន្យា២នាក់។

បើប្រិយមិត្តចង់ជួយបរិច្ចាគថវិកា និងសម្ភារសិក្សា ដល់សិស្សនៃសាលាបឋមអង្គជុំ អាចទាក់ទងលោក ឡារី តាមរយៈលេខទូរសព្ទ ០៩៨ ៨ ២២២២ ៤ / ០១២ ៥២៦ ៥៧៨ លោក ទន ដារ៉ា ប្រធានកម្មវិធី អភិវឌ្ឍន៍តំបន់ស្រុកពញាឮ នៃអង្គការ World Vision, ០៩៣ ៤២ ៩៩ ៤៩៕