បណ្ណាល័យចល័ត ៩ គ្រឿង កំពុងលើកកម្ពស់អំណាននៅកម្ពុជា

2015-12-22 17:30:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីលើកកម្ពស់អំណាន យានបណ្ណាល័យចល័តចំនួន ៩ របស់អង្គការ ស៊ីប៉ា កំពុងតែបំពេញតួនាទីរបស់ខ្លួនយ៉ាងសកម្មតាមភូមិស្រុក និងសហគមន៍នានានៅកម្ពុជា។

រថយន្តបណ្ណាល័យចល័ត ៨ គ្រឿង បានចុះពង្រឹងនៅទីតាំងចំនួន ១០០ ក្នុងខេត្ត ៤ និងរាជធានីភ្នំពេញ ខណៈម៉ូតូបណ្ណាល័យចល័ត ១ គ្រឿងចុះលើកស្ទួយវិស័យអប់រំក្នុងភូមិចំនួន ៦ ក្នុងខេត្តរតនគិរី។ រថយន្តបណ្ណាល័យចល័តរបស់ស៊ីប៉ា មិនត្រឹមផ្ដល់ការអប់រំលើការអានទេ ថែមទាំងផ្សព្វផ្សាយពីបញ្ហាចរាចរណ៍ បរិស្ថាន អនាម័យ និងការអប់រំផ្សេងៗដល់មនុស្សទូទៅ។

លោក ហុក សុទ្ធិ ប្រធានអង្គការស៊ីប៉ាបានថ្លែងថា៖ "យើងបង្កើតបណ្ណាល័យចល័ត ព្រោះកម្ពុជាយើង ការអានមិនទាន់រីកចម្រើន យើងអត់មានបណ្ណាល័យ តាមសហគមន៍ តាមទីសាធារណៈ។ អ៊ីចឹងហើយយើងឈរលើគោលការណ៍មួយថា យើងព្យាយាមយកសៀវភៅទៅដល់មនុស្ស ចល័តសៀវភៅដល់ភូមិ និងសហគមន៍ ដើម្បីឱ្យគាត់បានអាន ព្រោះក្នុងភូមិឃុំរបស់គាត់ អត់ទាន់មានបណ្ណាល័យ ហើយយើងក៏គ្រោងបង្កើតបណ្ណាល័យចល័តអាហារូបត្ថម្ភផងដែរ"។

ស៊ីប៉ា (Sipar) ជាអង្គការមនុស្សធម៌អន្តរជាតិ បង្កើតឡើងក្នុងឆ្នាំ ១៩៨២ នៅបារាំង ដើម្បីជួយជនភៀសខ្លួនមកពីបណ្ដាប្រទេសអាស៊ីអាគ្នេយ៍ តាមរយៈកម្មវិធីអំណាន។ ស៊ីប៉ា មកដល់កម្ពុជាក្នុងឆ្នាំ ១៩៩១ ក្នុងគោលបំណងធ្វើយ៉ាងណា ឱ្យកុមារ យុវជន និងមនុស្សពេញវ័យ ទទួលបានចំណេះដឹង ដែលជាជំហានដំបូង ដើម្បីប្រយុទ្ធប្រឆាំងនឹងភាពក្រីក្រ។ សកម្មភាពរបស់ស៊ីប៉ា គឺផ្ដោតលើសកម្មភាពកម្មវិធីធំៗចំនួនបួនគឺ៖

១. បណ្ណាល័យតាមសាលារៀន ២. ការអានសម្រាប់ទាំងអស់គ្នា (គ្រប់ពលរដ្ឋទទួលបានការអានដូចគ្នា) ៣. ការអភិវឌ្ឍន៍ការអប់រំនៅថ្នាក់ឃុំ ៤. ការបោះពុម្ពផ្សាយសៀវភៅ

អាន៖ ប្រធានអង្គការ Sipar៖ គ្រោះថ្នាក់ចរាចរណ៍ឆ្នាំនេះ សម្លាប់មនុស្សច្រើនជាងឆ្នាំមុន

អត្ថបទ៖ អ៊ុំ សុភក្តិ