នៅស្រុកខ្មែរ តើខេត្តក្រុងណាដែលនារីវ័យក្មេងមានផ្ទៃពោះច្រើនជាងគេ?

2015-12-23 17:21:13
ចំនួនមតិ 0 | ចំនួនចែករំលែក 0

ចន្លោះមិនឃើញ

មណ្ឌលគិរី-រតនគិរី បានជាប់ជាខេត្តដែលនារីអាយុចាប់ពី ១៥ ដល់ ១៩ ឆ្នាំ មានផ្ទៃពោះ និងក្លាយជាម្ដាយច្រើនជាងគេបំផុត ក្នុងប្រទេសកម្ពុជា គឺមាន ៣០% តាមពីក្រោយដោយខេត្ត ស្ទឹងត្រែង-ព្រះវិហារ មាន ២៥% និងក្រចេះមាន ២០%។ លោកស្រី ជី សុជាតិ នាយិកាប្រតិបត្តិអង្គការខ្មែរ បម្រើសុខភាពប្រជាជន PSK បង្ហាញឱ្យដឹង តួលេខនេះក្នុងសន្និសីទកាសែតស្ដីពី «ទិវាពន្យារកំណើតពិភពលោកនៅកម្ពុជា» កាលពីម្សិលមិញ។

ចំពោះមូលហេតុលោកស្រីថា ៖ “មកពីនារីក្មេងៗយើងតាមបណ្ដាខេត្តឆ្ងាយៗ មិនសូវទទួលបានការយល់ដឹង ព័ត៌មានគ្រប់គ្រាន់នៅឡើយទេ ពីបញ្ហាពន្យារកំណើត មធ្យោបាយពន្យារកំណើត និងផែនការគ្រួសារ។ នៅភ្នំពេញដូចជាមិនសូវមានបញ្ហា ដូច្នេះការពន្យារកំណើតពិតជាមានសារៈសំខាន់ណាស់"។

ការមានបុត្រធីតាច្រើន និងនៅវ័យក្មេង មិនបានផ្ដល់ផលល្អដល់សេដ្ឋកិច្ចគ្រួសារទេ ហើយថែមទាំងធ្វើឱ្យប៉ះពាល់ដល់ សុខភាពម្ដាយ និងទារក ដូច្នេះលោកស្រី ជី សុជាតិ បានថ្លែងថា មនុស្សគ្រប់រូបត្រូវមានចំណេះដឹងលើការពន្យារកំណើតថា បើចង់ពន្យារកំណើត ត្រូវទៅរកនៅឯណា។ ទោះយ៉ាងណាមិនមែនមនុស្សទាំងអស់ដឹងពីបញ្ហាពន្យារកំណើត និងផែនការគ្រួសារទេ ជាពិសេសយុវវ័យ។

“យុវវ័យនៅមានបញ្ហាប្រឈមច្រើន...បញ្ហារបស់យុវវ័យ គឺគាត់នៅមិនទាន់បានព័ត៌មានពីបញ្ហាសុខភាពបន្តពូជបានល្អិតល្អន់នៅឡើយទេ។ យុវវ័យក្នុងសាលាអាចដឹងខ្លះ ប៉ុន្តែយុវវ័យក្រៅសាលា មិនទាន់ដឹងលំអិតទេ ហើយគេមិនលើកទឹកចិត្តឱ្យគាត់និយាយពីបញ្ហាផ្លូវភេទ បើកចំហទេក្នុងសង្គមខ្មែរយើង។ បញ្ហាមួយទៀត គឺយុវវ័យយើងទទួលបានឥទ្ធិពលច្រើនពីវប្បធម៌ខាងក្រៅ ហើយការអង្កេតថ្មីៗនេះ គេរកឃើញថា មានយុវវ័យច្រើនប្រឡូកក្នុងការរួមភេទនៅវ័យក្មេង។ អ៊ីចឹងយើងត្រូវផ្សព្វផ្សាយ ផ្ដល់ចំណេះដឹងដល់ពួកគាត់"។

លោកស្រីបន្ថែមថា បើតាមតួលេខបានមកពីការអង្កេតវិទ្យាសាស្ត្រទូទាំងប្រទេស ដែលចុះផ្សាយដោយក្រសួងផែនការ យុវវ័យអាយុចាប់ពី ១៥ ដល់ ១៩ ស្មើ ១២ % នៅកម្ពុជាកំពុងប្រឈមបញ្ហានេះ។ ក្នុងនេះយុវវ័យ ៧% បានក្លាយជាម្ដាយ និងយុវវ័យ ៥% កំពុងមានផ្ទៃពោះ។ ទោះបីជាយ៉ាងណា លោកស្រីមិនបានដឹង តួលេខជាក់លាក់ថា មានយុវវ័យប៉ុន្មាននាក់ឡើយ។

ទិវាពន្យារកំណើតពិភពលោក ត្រូវបានគេធ្វើឡើង ដើម្បីបង្កើនការយល់ដឹងពីការពន្យារកំណើត ជាពិសេសយុវវ័យ។ ដើម្បីអបអរទិវានេះ ក្រុមយុវជនចតុមុខ នឹងរៀបចំការប្រគំតន្ត្រី និងការសម្ដែង នៅថ្ងៃទី ២៥ ធ្នូ ឆ្នាំ២០១៥ ដែលមានការចូលរួមពីតារាល្បីៗ ដូចជា កញ្ញា មាស សុខសោភា លោក ហេង ពិទូ លោក Jimmy Kiss និងតារាល្បីៗជាច្រើនទៀត និងមានសិក្ខាសាលាមួយនៅថ្ងៃ ៣០ ខែធ្នូ ខាងមុខ។ គួរបញ្ជាក់ថានេះជាលើកទីមួយ ដែលទិវាគាំទ្រពីក្រសួងសុខាភិបាល ក្រុមហ៊ុន Bayer Health Care អង្គការ USAID អង្គការ UNFPA និងអង្គការ PSI/PSK មួយនេះធ្វើនៅកម្ពុជា៕

ចុចអាន៖ បណ្ណាល័យចល័ត ៩ គ្រឿង កំពុងលើកកម្ពស់អំណាននៅកម្ពុជា

ចុចអាន៖ មូលហេតុ និងដំណោះស្រាយ ការអស់កម្លាំងអំឡុងពេលធ្វើការ

អត្ថបទ៖ អ៊ុំ សុភក្តិ