ទម្លាប់៧យ៉ាងជួយអ្នក សម្រេចជាបុគ្គលជោគជ័យ

2016-01-25 20:40:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ទម្លាប់ក្នុងការធ្វើអ្វីមួយមានភាពច្បាស់លាស់ គឺជាគន្លឹះជួយជំរុញឲ្យក្លាយជាបុគ្គលម្នាក់ដែលមិនចំណាយពេលវេលាឥតប្រយោជន៍។ ក្នុងសិក្ខាសាលាស្ដីពី "សិល្បៈនៃការដឹកនាំ" លោក បណ្ឌិត សាម អ៊ីន បានចែករំលែកពីទម្លាប់ដែលបុគ្គលជោគជ័យរាប់ពាន់នាក់តែងធ្វើ ៖

១/ សកម្មមុន ៖ កុំទម្លាប់ចាំនរណាម្នាក់ប្រាប់អ្នកថាត្រូវធ្វើអ្វីនៅថ្ងៃនេះ តែត្រូវដឹកនាំខ្លួនឯង បំផុសគំនិតខ្លួនឯងថាថ្ងៃនេះត្រូវធ្វើអ្វីដែលល្អបំផុត។ ២/ ចាប់ផ្ដើមជាមួយគោលដៅ ៖ ចាប់ផ្ដើមជាមួយអ្វីដែលជាគោលដៅដែលកំណត់ស្រេច ដោយបន្តធ្វើជារៀងរាល់ថ្ងៃ កុំខកខាន។

៣/ ធ្វើរឿងចាំបាច់ជាមុន ៖ បើទោះមានការងារជាច្រើនក្ដី ក៏ត្រូវផ្ដល់អាទិភាពលើការងារមួយណាគួរធ្វើមុនដែលចាំបាច់ ដើម្បីឲ្យការងារមានប្រសិទ្ធភាព។ ៤/ គិតឈ្នះឈ្នះ ៖ ពេលសហការជាមួយអ្នកដទៃ ត្រូវគិតប្រយោជន៍រួមកុំគិតតែប្រយោជន៍ផ្ទាល់ខ្លួន។ បើអ្នកគិតតែខ្លួនឯង នោះគ្មានអ្នកណាចង់ធ្វើការជាមួយនោះទេ។

៥/ យល់ពីគេ មុននឹងឲ្យគេយល់ពីអ្នក ៖ មនុស្សជាទូទៅ នៅពេលមានទំនាស់តែងចង់ឲ្យគេស្ដាប់ខ្លួនឯង ឲ្យគេយល់ពីខ្លួនឯងដោយមិនចង់ស្វែងយល់ពីគេនោះទេ។ ប៉ុន្តែបុគ្គលជោគជ័យតែងផ្ដល់ឱកាសសម្រាប់ដល់ដៃគូ ទុកពេលឲ្យគេរៀបរាប់បញ្ហាហើយព្យាយាមយល់ពីគេវិញ។

៦/ សំយោគ ៖ ស្ដាប់គំនិតអ្នកដទៃនិងគំនិតខ្លួនឯង ដើម្បីមានគំនិតទី៣ ដែលស្របគ្នាក្នុងការសម្រេចកិច្ចការធំ។ ៧/ សំលៀងរណា៖ ចាប់ផ្ដើមអនុវត្ត និងពុះពារឧបសគ្គឲ្យបាន។

លោក សាម អ៊ីន បន្តថា ការជោគជ័យវាមិនអាចកើតឡើងដោយចៃដន្យឬដោយស្វ័យប្រវត្តបានទេ គឺត្រូវរៀនពីទម្លាប់ជោគជ័យ ហើយបទពិសោធន៍ពីបុគ្គលជោគជ័យ វាជាជម្រើសរបស់អ្នក។

អត្ថបទ៖ លឹម សុនា