ទំនៀមទម្លាប់៦យ៉ាង របស់ប្រជាជនចិន ដែលជនបរទេសមិនអាចយល់បាន

2016-02-02 18:02:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិនជាប្រទេសមួយដែលមានឥទ្ធិពលខ្លាំងនៅអាស៊ី និងមានវប្បធម៌ប្រពៃណីប្លែកៗ ធ្វើឲ្យជនបរទេសជាច្រើនចង់ដឹង និងស្វែងយល់។ នាឱកាសបុណ្យចូលឆ្នាំចិននឹងចូលមកដល់នាពេលខាងមុខឆាប់ៗនេះ វិបសាយចិនមួយ បានបង្ហាញពីទំនៀមទម្លាប់៦យ៉ាងដែលជនបរទេសភាគច្រើនចង់ដឹង៖

១. អាហារពិសេសក្នុងថ្ងៃបុណ្យ

នាឱកាសពិធីបុណ្យនីមួយៗ ក្នុងប្រទេស ប្រជាជនចិនតែងមានម្ហូបអាហារប្លែកៗផ្សេងៗគ្នា សម្រាប់បរិភោគទៅតាមថ្ងៃពិសេសរបស់ពួកគេ។ តួយ៉ាងពិធីបុណ្យសែននំចាំង ជាដើម។

រូបថតអ្នកទេសចរទៅលេងនៅខេត្ត Jiangxi ប្រទេសចិន កាន់នំ ចាំង ឬ "Zong Zi" ធ្វើពីបាយដំណើបស្អិតរុំស្លឹកឫស្សីឬស្លឹកត្រែង។

២. ឲ្យអំាងប៉ាវ

ក្នុងថ្ងៃបុណ្យចូលឆ្នាំថ្មីរបស់ខ្លួន ប្រជាជនចិនតែងមានទម្លាប់មួយ គឺការឲ្យអាំងប៉ាវក្រហមមានលុយនៅខាងក្នុង ឬប្រជាជនចិនហៅថា Hongbao ជាទម្លាប់មួយដែលអ្នកអាយុធ្វើការ ឲ្យទៅកាន់ សាច់ញាតិ បងប្អូន ក្មេងៗនៃសមាជិកគ្រួសារ។ នាឱកាសពិសេសនោះ ឪពុកម្ដាយចិន ឲ្យអាំងប៉ាវទៅកូនៗ គឺមានន័យថា នាំសំណាងដល់ពួកគេ និងជាការបង្រៀនដល់ក្មេងៗឲ្យចេះគ្រប់គ្រងលុយកាក់ផងដែរ។

៣. ដាក់ផ្លែឈើ ឬអាហារនៅមុខរូបថតអ្នកស្លាប់

ប្រជាជនចិនតែង ដាក់តាំងរូបថតសាច់ញាតិបងប្អូនអ្នកដែលបានស្លាប់ទៅ ដើម្បីជាការគោរពរំឭកនិងបង្ហាញពីក្ដីស្រលាញ់ទៅពួកគេ។ ជាមួយគ្នានេះគេតែងមានដាក់ផ្លែឈើ និងអាហារមួយចំនួននៅពីមុខរូបថត ដោយជឿថាព្រលឹងអ្នកស្លាប់នឹងមានអ្វីហូបគ្រប់គ្រាន់នៅពេលទៅកាន់ពិភពថ្មី។

៤. ជល់កែវអបអរដោយការគោរព

នៅពេលមានពិធីបុណ្យជប់លៀង ញ៉ាំអាហារ និងមានការជល់កែវអបអរសាទរ ប្រជាជនចិនតែងមានទម្លាប់គោរពគ្នាទៅវិញទៅមក។ ប្រសិនបើនរណាម្នាក់ចង់ជល់កែវជាមួយនោះ គេត្រូវបន្ទាបមាត់កែវទាបជាងអ្នកផ្សេង ជាការបង្ហាញពីសេចក្ដីគោរពនិងឋានៈផ្សេងគ្នា។

៥. ដុតក្រដាសលុយ (ក្រដាសសែន)

ការដុតក្រដាសសែនលុយ (លុយខ្មោច) ឬជាកាដូ ដូចជាឡានក្រដាស ផ្ទះក្រដាស ក្នុងពិធីបុណ្យឆេងម៉េង(សែនផ្នូរ) និងថ្ងៃខួបនៃសាច់ញាតិដែលបានចែកឋានទៅ ប្រជាជនជនចិនមានជំនឿថា គឺជាការគោរពជូនដល់ព្រលឹងអ្នកស្លាប់ ឲ្យទទួលបានរបស់ទាំងនោះប្រើប្រាស់ ក្នុងពិភពថ្មីរបស់ពួកគេ។

៦. លេងសើចនៅថ្ងៃអាពាហ៍ពិពាហ៍

ប្រជាជនចិនតែងមានទម្លាប់លេងសើចជាមួយអ្នកទើបរៀបការថ្មីថ្មោង ដើម្បីឲ្យគូស្នេហ៍នោះកាន់តែស្និទ្ធស្នាលឡើង។ កំលុងពេលរៀបការ មិត្តភក្តិរបស់កូនកំលោះតែងតែមានគំនិតប្លែកៗ នាំឲ្យ កូនកំលោះនិងកូនក្រមុំ ឡើងសម្ដែងឬធ្វើសកម្មភាពអ្វីមួយជាគូ៕