មុនក្លាយជា ឯកឧត្ដម តើ នាយ ឃ្លោក មានប្រវត្តិបែបណា?

2014-10-23 17:02:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងនាយ "ឃ្លោក" ត្រូវបានព្រះមហាក្សត្រនៃព្រះរាជាណាចក្រកម្ពុជាព្រះបាទ នរោត្តម សីហមុនី ត្រាស់បង្គាប់តែងតាំងជាឯកឧត្ដមហើយ កាលពីថ្មីៗនេះ បន្ទាប់ពីតារាកំប្លែងរូបនេះបានជួយកិច្ចការសង្គមជាច្រើនកន្លងមក ។ បច្ចុប្បន្នលោក ជាទីប្រឹក្សាអគ្គលេខាធិការដ្ឋានព្រឹទ្ធសភា មានឋានៈស្មើអនុរដ្ឋលេខាធិការ។ មុនទទួលបានឋានៈជា ឯកឧត្ដម តើជីវិតពិតរបស់នាយ បែបណាខ្លះ?

ឈ្មោះ

ថ្ងៃខែឆ្នាំកំណើត

ទីកន្លែងកំណើត

ចំនួនបងប្អូន

កម្ពស់/ទម្ងន់

Email/Facebook

ទុំ សារ៉ុត ហៅ ឃ្លោក

១០ មករា ១៩៥៧

ភូមិ ព្រៃម្នាស់ ឃុំ សំឡី ស្រុក កំពង់រោទិ៍ ខេត្ត ស្វាយរៀង

១០នាក់

ប្រុស៦ ស្រី៤

១៧០ ស.ម

៨៥ គ.ម

គ្មាន

ស្ថានភាពគ្រួសារ

នាយឃ្លោក កើតនៅថ្ងៃទី ១០ ខែ មករា ឆ្នាំ ១៩៥៧ នៅភូមិព្រៃម្នាស់ ឃុំសំឡី ស្រុក កំពង់រោទិ៍ ខេត្ត ស្វាយរៀង។ ឈ្មោះពិតរបស់លោក គឺ ឈ្មោះ ទុំ សារ៉ុត។ លោកបានប្ដូរឈ្មោះថា នាយឃ្លោក បន្ទាប់ពីបានចូលសិល្បៈកាលឆ្នាំ២០០១។ លោក គឺជាកូនទី ៥ ក្នុងចំណោមបងប្អូន ១០ នាក់ ប្រុស ៦ ស្រី ៤។

ឪពុក ឈ្មោះ ព្រំ ឆែម ម្ដាយឈ្មោះ មាស ហ៊ាន គាត់ទាំងពីរ គឺជា កសិករ (ស្លាប់) នៅក្នុងសម័យខ្មែរក្រហម។ លោកមិនធ្លាប់មានសាច់ឈាមជាអ្នកសិល្បៈនោះទេ ពោលគឺ ក្នុងគ្រួសារលោក មានតែរូបលោកម្នាក់គត់។ លោករៀបអាពាហ៍ពិពាហ៍ក្នុងឆ្នាំ ១៩៨០ ជាមួយអ្នកស្រី ព្រំ សាបុណ្យ ដែលជាអ្នកខេត្តស្វាយរៀងដូចគ្នា។ បច្ចុប្បន្ន ភរិយារបស់លោក មានអាយុ៥០ឆ្នាំ។ លោកមានកូន៤នាក់ ប្រុស២ ស្រី២។ កូនប្រុសច្បងរបស់លោក បានស្លាប់ដោយសារគ្រោះថ្នាក់ចរាចរណ៍ កាលពី ថ្ងៃទី២២ ខែ វិច្ឆិកា ឆ្នាំ២០១១។

កាលលោក ធ្វើការនៅមន្ទីរឃោសនាការវប្បធម៌ និង ព័ត៌មានខេត្តព្រៃវែង ផ្ទះរបស់លោក ស្ថិតក្នុងសង្កាត់ កំពង់លាវ ក្រុងព្រៃវែង។ ក្រោយមក លោកបានប្ដូរ មករស់នៅភ្នំពេញក្នុងឆ្នាំ១៩៩៦ ហើយទីលំនៅបច្ចុប្បន្ន គឺនៅភូមិទួលគោក សង្កាត់ទូលសង្កែ ខណ្ឌឫស្សីកែវ រាជធានីភ្នំពេញ។

ការសិក្សា

លោករៀនបានត្រឹមថ្នាក់ទី ៩ កាលពីសម័យដើម នៅសាលាបឋមសិក្សាព្រៃម្នាស់ ស្ថិតក្នុងភូមិព្រៃម្នាស់ ឃុំសំឡី ស្រុក កំពង់រោទិ៍ ខេត្ត ស្វាយរៀង។ លោកបានប្រាប់ថា មូលហេតុដែលនាំឲ្យលោកមិនបានរៀនច្រើន ដោយសារតែជីវភាពក្រីក្រ ព្រោះឪពុកម្ដាយរបស់លោក គឺជាកសិករដែលមានជីវភាពលំបាក ហើយគួបផ្សំប្រទេសជាតិនៅសម័យនោះ ជួបសង្គ្រាមច្រើនពេក ទើបធ្វើឲ្យលោករៀនបានត្រឹមតែប៉ុណ្ណឹង។

ដើមចមនៃការចូលសិល្បៈ

នៅឆ្នាំ ១៩៨០ លោកបានចូលបម្រើការងារនៅមន្ទីរឃោសនាការវប្បធម៌ និងព័ត៌មាន ខេត្តព្រៃវែង ក្នុងតួនាទី ជាអ្នកបញ្ចូលសំឡេងកុនចល័តក្នុងទឹកដី ខេត្ត ព្រៃវែង។ លោកបានប្រាប់ថា កាលដំបូងឡើយ លោកមិនមែនជាអ្នកបញ្ចាំងកុននោះទេ ប៉ុន្តែ ដោយសារសំឡេងរបស់លោកល្អ លោកក៏ត្រូវបានខាងមន្ទីរឃោសនាការវប្បធម៌ និង ព័ត៌មានខេត្តព្រៃវែង ប្រគល់តួនាទីជាអ្នកបញ្ចូលសំឡេងវិញ។

ដោយសារតែ ចង់ក្លាយជា តារាកំប្លែងមានឈ្មោះបោះសំឡេងនៅក្នុងពិភពសិល្បៈ លោកបានខិតខំស្វះស្វែងរកទ្រនំគ្រប់ច្រកល្ហក។ នៅឆ្នាំ ២០០១ លោកបានស្គាល់អ្នកបើកឡានឲ្យស្ថានីយទូរទស្សន៍ប៉ុស្តិ៍លេខ ៣ ម្នាក់ ឈ្មោះ អិត។ បន្ទាប់មក ដោយសារតែមានទំនាក់ទំនងល្អ ជាមួយអ្នកបើកឡាននោះ អ្នកបើកឡានបាននាំទៅជួប លោក ហ្វៃ សំអាង អ្នកគ្រប់គ្រងកម្មវិធីនៅស្ថានីយទូរទស្សន៍ប៉ុស្តិ៍លេខ ៣។

នៅទីបំផុត លោក ហ្វៃ សំអាង បានអនុញ្ញាតឲ្យលោកបានចូលលេង សាកល្បងក្នុងកម្មវិធី “Super Game” ជាមួយក្រុមកំប្លែងនាយកុយ។ នៅឆ្នាំនោះហើយ ដែលជាឱកាសធ្វើឲ្យលោកបានស្គាល់សមាជិក ក្នុងក្រុម កំប្លែង នាយកុយ ។

កាលនោះ សមាជិករបស់ក្រុមកំប្លែង នាយ កុយ មាននាយ វីតាមីនសេ នាយសានម៉ៅ នាងគ្រត យាយអឿន តាស៊ីស ជាដើម។ នៅឆ្នាំ២០០២ លោកត្រូវបាននាយកុយ អនុញ្ញាតឲ្យចូលរួមថតជាមួយក្រុមកំប្លែងគាត់ ក្នុងកម្មវិធី “យុទ្ធនាការមហាសប្បាយ” របស់ស្ថានីយទូរទស្សន៍ប៉ុស្តិ៍លេខ៣។

បន្ទាប់ពីកម្មវិធី យុទ្ធនាការមហាសប្បាយចាប់ផ្ដើមចាក់បញ្ចាំង នៅតាមកញ្ចក់ទូរទស្សន៍មក ទស្សនិកជនក៏ចាប់ផ្ដើមស្គាល់លោកជាបន្តបន្ទាប់ ។ លោកបានបញ្ជាក់ថា ប្រសិនបើមិនមាននាយកុយ ជួយជ្រោមជ្រែងទេ លោកមិនមានថ្ងៃនេះឡើយ។

បន្ទាប់ពីបានក្លាយជាសមាជិកក្នុងក្រុមកំប្លែងនាយកុយនឹងភាពជោគជ័យ ដោយមានការជួយជ្រោមជ្រែងពី លោក ជួង ជី ហៅនាយកុយ លោកក៏បានក្លាយជាសមាជិកពេញសិទ្ធិ ក្នុងក្រុមកំប្លែង។ បន្ទាប់មក លោកក៏មានឱកាសបានចេញសម្ដែង តាមកញ្ចក់ទូរទស្សន៍គ្រប់ប៉ុស្តិ៍ ព្រមទាំងកម្មវិធីផ្សេងៗជាបន្តបន្ទាប់។ អាចនិយាយបានថា នៅពេលដែលមានមុខ នាយកុយ ទៅសម្ដែងនៅទីកន្លែងណា គឺមានមុខ នាយឃ្លោកសម្ដែងជានិច្ច។ ជាមួយគ្នានោះដែរ លោកក៏ធ្លាប់បានថត ស្ប៉តពាណិជ្ជកម្ម សម្ដែងខារ៉ាអូខេ និងរឿង ជាច្រើនផងដែរ។

ជួបគ្រោះថ្នាក់ ត្រូវទៅព្យាបាលនៅវៀតណាម

នៅថ្ងៃទី ២២ ខែកក្កដា ឆ្នាំ២០១១ លោកបានជួបគ្រោះថ្នាក់ ដោយត្រូវកម្មកររបស់លោក អាយ៉ែ ឡានអាប៊ុលកិន កែងជើងស្ដាំ នៅការដ្ឋានលក់ខ្សាច់របស់លោក ក្នុងពេលដែរលោក កំពុងតែឈរបញ្ជាឡាន។ ភ្លាមៗ បន្ទាប់ពីគ្រោះថ្នាក់ លោកត្រូវបានគេបញ្ជូនទៅព្យាបាលនៅមន្ទីរពេទ្យឯកជនមួយ ក្នុងរាជធានីភ្នំពេញ ប៉ុន្តែដោយរបួសលោកមានសភាពខ្លាំងពេក លោកត្រូវបានបញ្ជូន ទៅព្យាបាលនៅប្រទេសវៀតណាម។ ការព្យាបាលជំងឺរបស់លោក បានចំណាយពេលរហូត ដល់ទៅ ៤ខែ ដោយត្រូវចំណាយប្រាក់អស់ជាង១ម៉ឺនដុល្លារ។ បច្ចុប្បន្នជំងឺរបស់លោកបានជាសះស្បើយអស់ហើយ ប៉ុន្តែកន្លែងរបួស មានស្នាមសម្លាកខូងខ្លាំងមិនដូចសភាពដើមនោះទេ។

មុខរបរក្រៅពីសិល្បៈ និង បច្ចុប្បន្ន

ដោយ ទទួលបានជោគជ័យក្នុងការងារជាអ្នកសិល្បៈជាបន្តបន្ទាប់ លោកក៏បានបើករបររកស៊ី មួយកន្លែង គឺ អាជីវកម្មលក់ខ្សាច់។ នៅក្នុងនោះ លោកមានឡាន ជាង១០គ្រៅគ្រឿង សម្រាប់ដំណើរការអាជីវកម្ម ។ បច្ចុប្បន្ន តារារូបនេះ បានបើក ក្រុមហ៊ុននាំចូលផលិតផលអាហារបំប៉នសុខភាពល្បីឈ្មោះ អ៊ីវ៉ូ (EVO) ដែលបានដំណើរការអស់រយៈពេល ២ ឆ្នាំ មកហើយ។ នាយឃ្លោក ក៏ជាអតីតកងអង្គរក្ស របស់សម្ដេចអគ្គមហាសេនាបតីតេជោ ហ៊ុន សែន ដែលមានឋានន្តរសក្ដិ វរសេនីយ៍ត្រី “ស័ក្ដិ៤” តែលោកបានចូលនិវត្តន៍កាលពីឆ្នាំ ២០១៣។

តារាមានកំណើតមកពីខេត្ត ស្វាយរៀងម្នាក់នេះ ត្រូវបានព្រះមហាក្សត្រនៃព្រះរាជាណាចក្រកម្ពុជាព្រះបាទ នរោត្តម សីហមុនី ត្រាស់បង្គាប់តែងតាំងជាឯកឧត្ដម កាលពីដើមឆ្នាំ ២០១៤ នេះ បន្ទាប់ពីតារាកំប្លែងរូបនេះ បានជួយកិច្ចការសង្គមជាច្រើនកន្លងមក ដូចជា សាលារៀន ស្រះទឹក និង ជួយវត្តអារាមជាដើម ។ បច្ចុប្បន្នលោក ជាទីប្រឹក្សាអគ្គលេខាធិការដ្ឋានព្រឹទ្ធសភា មានឋានៈស្មើអនុរដ្ឋលេខាធិការ។

ទន្ទឹមនឹងការទទួលបានងារដ៏ខ្ពង់ខ្ពស់នេះ បច្ចុប្បន្ន នាយ ឃ្លោក បានដកខ្លួនដាច់ឆ្ងាយពីសិល្បៈដែលធ្លាប់ជួយលើកស្ទួយកិត្តិយស កេរ្តិ៍ឈ្មោះ អស់រយៈពេលជាច្រើនឆ្នាំ។ បែបនេះក្ដី តារាកំប្លែងជើងចាស់រូបនេះបានបញ្ជាក់ថា លោកមិនភ្លេចគុណសិល្បៈដាច់ខាត ការឈប់ពីអាជីពកំប្លែងនេះ គ្រាន់តែផ្អាកមួយរយៈសិនប៉ុណ្ណោះ ព្រោះទើបតែទទួលបានការតែងតាំងបានងារជាឯកឧត្ដម លោកត្រូវធ្វើការងារច្រើន ហើយការលេងសើចក៏ត្រូវការកាត់បន្ថយជាងកាលពីពេលមុនបន្តិចផងដែរ ៕

មើលអត្ថបទ៖ សកម្មភាព តារាចូលរួមថតចម្រៀងត្រៀមព្រះរាជពិធីបុណ្យអុំទូក! មើលអត្ថបទ៖ ផលិតករភាពយន្តដ៏ល្បីតំណាងឲ្យខ្មែរមួយរូបជាប់ពានរង្វាន់ពហុវិស័យអាស៊ី

អត្ថបទ៖ ខុត សីហា